Libya: News and Views      LibyaNet.Com      Libyan music       Libya: Our Home
Libyan Poet Ben Shwaikha
الشاعر الليبي بن شويخة

Sunday, 25 December, 2005

اضافة الى ( الدجاجة وانفلونزا الطيور : مازلت نا هي نا )

شعـر : بن شويخة

قرأت هذا الصباح على موقع ليبيا وطننا قصيدة للشاعر المقتدر شحات الفاخري حول موضوع انفلونزا الطيور وعلاقته بالدجاج ، فأحببت أن اشارك الشاعر موقفه المؤازر للدجاجة التى بدورها لا زالت تقف مع المواطن راقد الريح فى صراعه مع غلاء المعيشة ، وارتفاع اسعار اللحوم ، فكانت هذه الابيات :

يقول الفاخري على لسان الدجاجة :

مازلت نا هـــــــي نا .. حتى انكان جبتوا فيّ ميّة دا .. لذيذة اللـــــحم.

فقلت :

مازلت نا محســـــــــــــــــــــــوده .... نغذي فجواجي بوالعين الســـوده
نخلي اسماح موّردات خـــــــدوده .... والفخذ من فخــــــــذي يزيد نمـا
من فحم لوني نصبغــــه مكــدوده .... ومن لون بيضي يوصفو العضا
والهدب اللي مخلي العرب ممدوده .... من رهف ريشي ســـارقـات بها
وانكانك برّمت شور نهــــــــــوده .... راهن على وصف الصفار ســوا
والثغر اللي يبرق بياض رعــوده .... من قشر دحيي رافعات لـــــــوا
وحَمَار شفته هلي رقيّـق عــــوده .... من عرف ديكي ساحبه الطـــــــلا
وفى طنجرة هلي ضواء جرعوده .... دقايق وما نعطـــــــل نكون غدا
وفى جوف خاوي شملته مشـدوده .... ننزل ومــــا نخلف وراي لضا
لا نحيّره فى غسل وان أرقــــوده .... ولا نشغله كان الحبيّب جــــــــــا
لا جدي لاني عجــــــــل لاني دوده .... موصوفه من ســـيدي الفقي دواء
ولكن زمـــــــان الشايعات وروده .... امخلي بونيـّة العـــــــز عـــــزا
والمؤتمـــــر الشعبي يهـد اهدوده .... مّبزم ومو قـــــــــــادر يدير ندا

مازلت نا هـــــــي نا .. حتى انكان جبتوا فيّ ميّة دا .. لذيذة اللـــحم.

مازلت شـــــــــــــــوق الناس .... ومازالت للفقري لحـم وأنصاص
وللطنجرة مازلت نا لانـــفاس .... لامقدم ولا موخر ، اســعار رخا
ومازلت بالعيله انحس أحساس .... بصدري نفاديهم ان صار غلاء
ومازلت للعيل فطـــور وباس .... مع التن بيضي ما عليه اعـــــــلا
لا ننزكم لا يصيدني منخاص .... جيبو الطبيب ، وراهنو بســــــخا
هذي اشـاعة دارها وســـواس .... من عنز عانس فاتها الشــــــراء
وغانم رخاني ما نشر قرطاس .... فى موقعه يوري أســباب الظاء

مازلت نا هـــــــي نا .. حتى انكان جبتوا فيّ ميّة دا .. لذيذة اللـــــحم.

بن شويخه


ـ إتصلت بأحد الاصحاب وتجاذبنا اطراف الحديث حول موضوع الدجاج فأخبرني أنه قد وصلته رسالة مكتوبة على الموبايل تحمل هذه الابيات بالخصوص :
هنتي علينا كيف يا الدجاجــــه .. وانت عـمار البيت والثلاجه
هنتي علينـــــا كيــــف .. وانت الوسع قتا يجينا ضيف
من قال يبرمن يا سمحت التوصيف .. الايام عليك وتقعدي وجواجه


Libya: News and Views      LibyaNet.Com      Libyan music       Libya: Our Home