Libya: News and Views      LibyaNet.Com      Libyan music       Libya: Our Home
Libyan Poet Ben Shwaikha
الشاعر الليبي بن شويخة

Friday, 7 July, 2006

النصّ الالهي

شعـر : بن شويخة

مكتوب فى عـلمه تسير قســـــايم .. لا جــارها ولانـــــا أولاد عـمـــــايم

مكتوب عند العــــــــــــــــــــــالي .. نقــــرأ كلامــــــه يرتســـــم مـــوالي
ونقعد نزازي حايسات احـــــوالي .. بين الرجــــا واليـاس عقــــلي عايــم
تمنيت اللي فـ باله يجي فـــى بالي .. ويروم خاطــــري هلي زويله رايــم
راجيت فى عدّ الزمان ليـــــــــالي .. وانا خمـم والأفكــــــــــــــــــار توايم
ما خاب ظني وأبتسم طـــــــــوالي .. ومن جلوتي صرحت رانــــي هــايم
راقت وما ظنيتها تصــــــــــــفالي .. وكبرت بعـــــد كانت هبـــاء وعدايم
تحايت وشالت نـــارهم فالعـــــالي .. من يوم خزرته شبت عيون الحايـــم

مكتوب فى عـلمه تسير قســــــايم .. لا جــارها ولانـــــا أولاد عـمـــــايم

مكتوب مـــــــــــــــــــوش كتيبـــه .. لا شلوشة لا ســـــــــحر لا تعتيبــــه
هذي عيـن ضربته تقـــول حـريبه .. تفطـّر الناوي فى أمبـــــــــاته صـايم
هضا مبسم ما تنفـــع معـــاه طبيبه .. لا شـــــــــــــيخ يفتي لا مــلامة لايم
هضا حّن فى طعمه تقـــــول زبيبه .. كان لامسك تحلف عليـــــــــه نسايم
هضا قلب عشق العاشقين ســـريبه .. ما لقيت فى وصفه كلام مــــــــلايـم
هضا جوف متهندس علي صاحيبه .. أنكانهو خطــــم يمكن تصير جرايـم
هذى روح منقاها اتقــول أذهيبـــــه.. كان جاورت راهو اســــــعيدك قـايم
تلاقينا بلا موعد ولا ترتيبـــــــــــه .. لا فى خيال ولا أحـــــــــــــلام النايم
حضنته ما عنديش فيها ريبــــــــــه .. هّوَ علمّ وأنا رقيق عزايــــــــــــــــم

مكتوب فى عـلمه تسير قســــــايم .. لا جــارها ولانـــــا أولاد عـمــــــايم

بن شويخه


Libya: News and Views      LibyaNet.Com      Libyan music       Libya: Our Home