Libya: News and Views      LibyaNet.Com      Libyan music       Libya: Our Home
الجمعة 11 يونيو 2010

صـنـدوق الإذلال

الكاتب المسرحي : رافع القاضي

فيلادلفيا
www.philaddelphia.com
الاربعاء 9-6-2010


رافع القاضي

مرة أخرى عودة لموضوع (موت قاعد الخاص بالتقاعد) والعرب لوله عندهم مثل ايقولوا فيه: "الشبعان ما ايفتش للجيعان" والحقيقة أن جماعة التقاعد ايدوخوا وخاصة المحالين للتقاعد قبل الغلا والزيادة فهم ما زالت مرتباتهم لا تتعدى المائة وخمسون دينار.

خلونا نحكوا بدون عاطفة ونتحدث بموضوعية انتم يا جماعة راكم وضعكم زي وضع الكتيب السماوي كان يضرب يعور كنت ما تاخذشي حاجة بدءاً بالعدالة والسكر والرز وحتى التايد وخرفان العيد وطاسات الشاهي والملابس وعجل السيارات وانتهاءً بالمولود الداخل لهذه الحياة إلى الخارج منها فالكتيب عمره ما قصر مع حد ولكن النهاية كانت سيئة فأصبح الكتيب لا يغني ولا يسمن من جوع سبحان امغير الأحوال يرفع من يشاء ويذل من يشاء كتيب كانت له قيمة فأصبح لا يساوي شئ كذلك أنت يا متقاعد تبي الزيادة ايش المصلحة اللي فيك نين ايزيدوك حتى في الحوش لا قيمة لك سوى شيل الكناسة وإلا جيب الخبزة وإلا طفي الضي وسامر (من روح من العيال ومن اللي ما روحشي) شغلا بسيطة حتى اجديتي اديرها، اكويس ايزيدو مرتبك عليش خليك مهان.

وبعدين حاجة أخرى ليش أيام وأنت في الوظيفة ليش ما حوشت شي حاجة لروحك ، تشتغل بشرف.. وكلني ياشرف .. طيح اسعدك كان كل شئ تحت ايدك لكن مادرت شي حساب ليوم التقاعد وانك سوف تأخذ مئة وخمسون دينار لا تكفي لعلاج السكر والضغط والكلسترول والظهر والكرعين فأنت مستشفى متحرك.

كان زمان فيه مستشفى اسماه مستشفى الضمان الاجتماعي ويقدم لك كل الخدمات اليوم على رأي بوعبعاب الله يرحمه اللي ايقول (راح الغالي وأيامه).

منذ أيام احتفلوا بتكوين (صندوق الإذلال) صندوق التقاعد .. تصوير .. يافطات .. تهنئة للمتقاعدين .. وزغرتي ياعازة .. وان كان في العمر بقية سوف اكتب مسرحية جديدة سأسميها "راجلك متقاعد ياعازة".

وبعدين عليش الزيادة وانشاء الله ما تردوا كولوا خبزة شعير وميت بير .. آسف مويت مجاري .. لان الابيار تحولت إلى مجاري.

وبعدين هم إنشاء الله يقدروا ايزيدوا مسؤولين التقاعد لأنهم كلهم يأخذوا في زيادة على مرتباتهم مقابل بيش يفضولكم. اكويس تبوا تأخذوا زمانكم وزمان غيركم.

وبعدين اتقولوا إن المرتب يعدي في علاج ، بلا علاج موتو خيرلكم حتى اللي واخذ دار ايفضيها لواحد بيش يجوز فيها وتحول ها الغمة من الطريق. راهم جماعة التقاعد يفكروا في مستقبل عيالكم.

وبعدين المئة وخمسون دينار راهن حق عشر كيلو لحم وابشروا راهو طالع ها الأيام اختراع جديد بتريا ايركبوها للمتقاعدين جهاز شحن ومعاش يأكل يعني من يوم وغادي عندك حاجتين تشحنهن الموبايل والمتقاعد .. وزغرتي يا عازة.

دوختونا خلاص يكفي انا درنا مكاتب فخمة وكل مكتب فيه صندوق (هل أنت راض عن خدماتنا أم لا ترضى) وكان ما ترضى البحر قدامك واخبط راسك في الساس.

يكفي أننا قدمنا للمجتمع خدمات لا تنسى من بينها فنادق فخمة مبيت ليلة بثلاث مئة دينار وهذا شرف للمتقاعدين نحنا المهم أن يبقى مظهرنا قدام الناس كويس وانتوا في ........ عيطوا صرخوا ديروا توصيات اكتبوا حجابات الزيادة والله ما اتشوفوها ومكاتب نقابتكم والله ما فيه واحد ايعدل عليها واكتبوا وقولوا لكن ما فيش حد ايعدل عليكم.

بالله ما اتحشموش على وجوهكم تأخذوا زمانكم وزمان غيركم وبعدين رانا موش امغير نحنا اللي موش ديرلكم قيمة حتى هلكم وعائلاتكم خذوا قرار (ممنوع اللحم في العزا) يعني حتى عزاكم رز يابس واللي ايجوكم ايقولوا الله لا يرحم صاحب المعزا. السبوع يذبحوا فيه الزواج يذبحوا فيه عيد الميلاد يذبحوا فيه حتى عصيدة المولود اليوم في صالة اما انتم في وفاتكم رز يابس واللي ياكلوا يدعون عليكم بقلة الرحمه يعني ختاماً حتى هلكم ما قدروكم يبي ايقدركم صندوق التقاعد.

يا شياب يا عياب يا اللي ما اتحشموا على وجوهكم تبوا زيادة حتى اتعيشوا في كرامة .. عيب .. عيب .. عيب.

لكن اصدقوا اللي قالوا: "اللي ايتحشموا ماتوا" ان شاء الله اتموتوا آمين آمين يا متقاعدين.


Libya: News and Views      LibyaNet.Com      Libyan music       Libya: Our Home