Libya: News and Views      LibyaNet.Com      Libyan music       Libya: Our Home
الخميس 14 مايو 2009

فكرة وتصوير : طارق الهوني


طارق الهـوني


بنغازي .. أمّي

من ديوان (أنا والليل .. خوت) باللهجة المحكية
للشاعر سالم العالم

فكرة وتصوير : طارق الهونى

بنغازى....أمي
ان كانْ غابت أمي
ْوطعم الملح ف دموعي
وطعم الزيتون ف فمي
بنغازي.. نعرفها..مخبيها تحتْ جفني
في تشم ريحتها .. مهما نغيب ..تعرفني
وتعرف مايكدرني ... وتعرف مايكيفني
مثل .. أمي ... شففها لونه ..د مي .

* * *

وتعرف صوت ضحكاتي
وتسمعها فْ اشعاري
تشكل نبض كلماتي
وتقراها ف تعابيري
وتلقاها ف تعابيري
وتلقاها ف حكاياتي
وتعرفني لياليها
وتعرف كل شطحاتى
وتدكرنى مقا هيها
وتدكر من هم اصحابي
وتدكر أجمل اوقاتى

* * *

بنغازي
تعلمت العشق منها
وحضرت جل غياتى
ومازال الشجر فيها
محفر من مساميري
رسمت قلوب .. نقشت اسهام .. نقشت اسمي
بجنب حروف صحباتى
وشافتيني ف ملاعبها
فارح بانتصاراتي
وسخرت من تخلبيطي
وحزنت لانهزاماتي
ومهما نتوه ف الدنيا
ومهما نسير ف الزحمة
تميز صوت خطواتي
ومن وقع الخطا ع الارض
تعرف كان أنا فرحان
ولآغارق ف همي
وتحضني بدفا لحلام
وتقرا علي واتسمي
مثل ..أمي
بنغازي .. ياحنان الأ م
ضميني بعطف ضمي
بنغازي حنونة وكل حد تضم
وْالخير فيها ع الجميع يعم
واللي ماعرف بنغازي
ما عرفش .. كيف الارض .. كيف الشجر
كيف الموج .. كيف البحر
كيف الشمس .. كيف القمر و الليل
يبقن أم

* * *

بنغازي ... عروس اليمْ
ْوحلم الضيفْ واللافي
ثلاقيك بكرم هلها .. وديما ودها صافي
ولو مرة زمان البرد حاصرنا
نلود بحضنها الدافي
وكان الصهدْ شفشفنا ... علينا نجود
بنسمة ريح هفها في

* * *

قمرها في سهاريها ’مونسها
وما تغنى نجوم الليل ... الا في مجالسها
وهي بالنور محتفلة
شذى لنسام ينعسها
تغفي غفية الطفلة
ويصحي الليل يحرسها
وبرموشه يغطيها
وْ ف جفونه يدسد سها
وتضحك كان هب الرياح
وداعب زهرة الدفلى
بكفوفه تحسسها
وتفرح لهطول المطر
علي غفله
ويد الموج تلمسها

* * *

مراكبها .. ف غروب الشمسْ
تشق اليم مطمانة
تطا وع راي ريسها
وترجع في غبا ش الفجر
بخير الله مليانة
تواكبها ...تسابقها ... نوارسها

* * *

بنغازي
هواها عطر انفا سي ... وتسكني
وناف روحي نتنفسها
مثل أمي
نوشمها علي صْدري
وتغرب شمسها ف دمي
بنغازي اولاد بلاد ... ربة عصر واجواد
وحتى صغيرهم يسمى .. قدر وهمة
ومايخيبش وسط الميعادْ
يفرح كان الضيف لفاله ... برقة حالهْ
يرحبه . . وبود يضمهْ
رحبك . . اجعنا الزمان ما يكبك
وْمرحبا بضيوفنا
ان ما تساع الآرض .. نشيلوك فوق كفوفنا
مرحبا .. ايش حالك ... قعمز و هد رز ... تريح
مْ الهم فضي بالك .. راك في بنغازي
لا تحيرْ ، لا اتوه ، لا تتعب ... لا ينقص عليك الزاد
والحوش حوشك ... والخدود وساد

* * *

بنغازي .. أهل الكرم والجود بالموجود
ْواطفال ديما فارحة بالعيد والميلود
نصنع قناديل الورق
مثلونة ونحط فيها شموع ... ونرسم عليها ورود
وعند الشفق ... نطلع نقند ل بيها .. نغني غناويها
هضا قند يل وقنديل .. يشعل في ظلمات الليل
هضا قنديلك يا حوا .. يشعل م المغرب لا توا
هضا قند يل النبي .. فاطمة جابت علي
هضا قنديل الرسول .. فاطمة جابت منصورْ
واخر الليل تبدا الحضرة ف زاوية بن عيسى
لا ميش لابارود ، لا خط لوح ، لا العاب رخيصة
ونمسي ونا فرحان .. ونصبح فطوري ..’ رب .. سمن وعيش

* * *

بنغازي ملاعبنا بين البحر .. والشابي وسوق الحشيش
ومنزل رفيق المهدوي .. وسوق الجريد .. احدا سيدنا خريبيش
واحلام تكبر في قلوب صغيره
واحنا صغار وندرسوا في مدرسة لامير
و لا عويلة ونلعبوا في مدرسة لاميرة
ولما يخش الصيف .. يلمنا ميعاد نا ف جنان سي الشريف
وتنسم علينا انسام م الكورنيش
وتبدا شطا نتنا مع لطيور … نصوب مقا لعنا علي لخليش
الجازر بيدك ليسرى .. مربوط فيه ستيك
وبليمنه نحط النواة ف الجلدة
وتمقصد . .. وتطلقها النواة .. ساعات تصدف وحدة
واغلب الرمي يطيش . .!!
وايه . . يايمي . . . مهما عليك نغيب
ديما هوايا تحضني وثلمي
وسبحان .. يا بنغازي … ياامنا سبحان
حتى ونحنا كبار .. مازال فينا طفل
يذكر ايام زمان
ومازال فينا للمكان … مكان !!

الشاعر سالم العالم
من ديوان (أنا والليل .. خوت )
شعر باللهجة المحكية

فكرة وتصوير : طارق الهونى


Libya: News and Views      LibyaNet.Com      Libyan music       Libya: Our Home