Libya: News and Views      LibyaNet.Com      Libyan music       Libya: Our Home
مركز التوثيق الليبي
The Libyan Documentation Centre

الإربعاء 26 يناير 2011


طول الموح يجيب العلّة

 

ذايح الاوطان

شعر : أبوشيهان

هذه القصيدة قيلت على لسان أم تخاطب ولدها المهاجر وتصور حنينها إليه، وتشوقها لعودته ،

مشيرة الى الظروف التى دعته إلى الهجرة ، وآملة قرب عودته ليعيش فى وطنه حرا عزيزا .


يا ذايح الاوطان اسم الله       طول الموح يجيب العلّة

***
اسم الله يا ذايج الاوطان      ومتغرب فى كل مكان

ومتغيهب فى هالزمان       الّلى والى سالم ،ما خلّا

***
اسم الله يا ذايح من مدّه      يا مخلى عينى فى شدّه
موحك طال ، بعيد الردّه         ست سنين بعد الهلّة

***
اسم الله يا ذايح متغرب       يا بووجه إن تاق يطرب

مغير عليك الدمع يسرب       ما خلّا فى الماقى بلّه

***
اسم الله يا ذايح يا غالى       يا ذايح الاوطان وجالى

عيدك فى الغربة زيوالى       شق نياط العقل ، وسلّه

***
اسم الله يا ذايح فى موحك له مدة مطاول ذوحك

طول الموح يزيد جروحك وكتافك يستاعر حلّه

***
اسم الله يا ذايح فى الدنيا        كبدى من موحك منطنيه

دز جواب يجى بالعنيه        يحكى بالّلى صاير كله

***
اسم الله يا ذايح متطوح       متباعد ، ديما متموح

لو يهديك الله وتروح       ع الخاطر تلزم لك طلّه

***
اسم الله يا ذايح متباعد       فى نومه ديما متواعد

هو واياك العقل وقاعد        فيك يرجى يابس فى ظلّه

***
اسم الله يا ذايح البرور        ويا جالى مدّه وشهور

ياقلّة رايس بابور         يجيبك ، والظلمة تجلّى

***
اسم الله يا ذايح وتزازى       يا منحاز على بنغازى

يا قلّة مندوه يعازى         يوصل لك والا توصل له

***
اسم الله يا ذايح صبّار         على طرابلس لاويك جضار

وفزان وخيرة الاميار          عليهن دمعك دار مشلّه

***
اسم الله يا ذايح متغيب        يا غالى ع العين حبيب
لو تلقى مرسول قريب         شوق سلام العين يعله

***
اسم الله يا ذايح لبعاد       ومتغرب فى كل بلاد

خويل وما تابى تنقاد          ولا عمرك ترضى بالذلّة

***
اسم الله يا ذايح الاوهام          على الله العودة هالايام

وكان طالت ما تفوت العام          بجاه الله وشرع الملّة

***
رد أم علي :

ذايح يا بينى             متغرب يا زهوة عينى

مبرك يوما فيه تجينى           تضبح لى والباب نحلّه

***
اشتقنا للجية          عمتك والخالة والخيّه

واخرى جيرانك جمليّه         لو يلقو من زولك طلّه

***
يا ما راجينا         يوم وصولك وتمنينا

ياغالى موحك طانينا         وحق اللى فى الخلوة صلّى

***
زيدى يا ودّه       همك ماهوهذا حدّه

من تخطير بعاد الردّه          جملة الفواهق منحلّه

***
ويزيد اريافى       حال المينه ماهو خافى

ربّى يجعل ها القذافى            من قسم النار ولا ولّى

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

من كتاب الشعر الشعبى فى معركة الأنقاذ ( على العقربى - السنوسى بلالة)
منشورات دار الانقاذ

 


arabscreen@yahoo.com
26.1.2011

 


Libya: News and Views      LibyaNet.Com      Libyan music       Libya: Our Home