Libya: News and Views      LibyaNet.Com      Libyan music       Libya: Our Home
مركز التوثيق الليبي
The Libyan Documentation Centre

الخميس 2 ديسمبر 2010


ديرها ياعميرينا تربح ... وخلينا نفرحو بيك !!

والله معاد عرفنا القايد شن يبي بالزبط ؟! ..
أمس دار روحه صلاح الدين وبيقربع سويسرا الكافرة الفاجرة, وبيقود المسلمين ويجيش الجيوش, ويفتح قلاع وحصون سويسرا!..
واليوم طلعلنا "نحن قادة السلام" على قولته , وهو عايش بعقلية الخيم يحسابها السياسة بين الدول العظمى تمشي باليبر والفتنة والنميمة , التي تدل على عقليته . امس قاللنا في كتابه الآغبر : أن السود سيسودون العالم ..
واليوم يقول ان الصينيون سيصينون العالم !
وانا توا نبي انقوله هنا : انتا يا سي معمر تخلط عليك البلا اللي تاخد فيه , وياواقي من شطحاتك لتجيب اخرتنا. نقولك يا عميرينا كانك تقرأ في كلامي هذا انتا ما قصرتش حاولت تكون مجاهد ما نفعش ..
درت روحك كارلوس ما مشاش معاك ..
لبست ريش الحمامة ودرت روحك حميمة ..
ورقوها لك الجماعة , لا جيت شيخ ولا ملحد ولا قايد ولا منظّر .. وحتى ملك ملوك على االسود ما مشتش معاك ..
وورقولك السود ورجعوك ايد تالي ويد لقدام .
ننصحك يا عميرينا نصيحة لله ..
ولا بلاش الله لانك ما تعرفاش ..
ننصحك نصيحة , والنصيحة كانت زمان بجمل , وانا نعرف انه يهون عليك كل شيء الا البل ..
ونقولك خذ نصيحيتي وانا متنازلك ع الجمل ..
ننصحك بحاجة وحيدة مزال ما درتها وما جربتهاش ..
حط يدك تحت مخدتك واجبد البلجيكي وحطّه في مليغتك ودوس على الزناد ! ..
صدّقني .. والله الا في مصلحتك انتا , غير جرّب الهايك وديرها وريّحنا منك ومن تدريه الكبيده ..
لآنك والله الا جبتها شباشب ..
وصار الواحد غير مجرد يسمع اسمك يحس بروحه بيرجّع اللي كلاه من عام ..
ديرها .. ديرها تربح .. وخلينا نفرحو بيك !!

أيوب الليبي
27/11/2010
ـــــــــــــــــــ
وصلتني هذه الخاطرة من ليبيا , وأنشرها كما هي , مع تصميم من وحي كلمات : أيوب الليبي .
محمد مخلوف




arabscreen@yahoo.com
1/12/2010

 


Libya: News and Views      LibyaNet.Com      Libyan music       Libya: Our Home