Libya: News and Views      LibyaNet.Com      Libyan music      Libya: Our Home

send

الثلاثاء 31 أغسطس 2010

previous letter                 next letter                 list of all letters

همسات في أذن وضاح بن فضاح

نلاحظ هذه الأيام أن كل من تبور تجارته ويصاب بالإفلاس ويهدده النسيان ويعميه الحقد يلتجيء فجأة الى جمال الحاجي. وفجأة وبدون سبب يدبج مقالة تُخوّن الرجل!!... بالرغم انه لم يلحق أي ضرر بأي شخص كان، بل العكس هو من وقع عليه الضرر لين شبع... وكأننا نحن في المعارضة الليبية في الخارج تبارك الله نمللك السلاح النووي وعلى الجاسوس جمال الحاجي أن يأتي للنظام بمعلومات عن مكان تخزينه... وقد زاد هوس وعدم حياء هولاء المفلسين إلى الحد الذي وصل بالرقعي وهو من كبار الثرثارين (من أنصار نظرية ثر وفر) أن يدعي بأن وفاة المرحوم والد جمال الحاجي ما هي إلا قصة ملفقة من أجل الحصول على التعاطف من الليبيين اللي يتجسس عليهم... رغم أن المرحوم بلغ من العمر ما يقارب التسعين سنة ورغم أن أهل طرابلس واروا جسده الطاهر التراب. توه يأهل الخير باللاهي قولولي ايش عنده الرقعي مازال من أسرار وهو في شهر واحد كتب 90 مقالة ونشر 230 تعليق...بــع. هو حتى نساء شارعه في مانشستر لو اجتمعوا كلهن ما يقدرن يقولن نصف القطاف اللي قاله.

توه هالبوشنة هذا مازال عنده وقت باش يخطط لإنقلاب او يدير شيء فيه تُمرة للعباد باش يدوراه النظام ويتجسس عليه ،هو مش حتى قادر يحرك مخاريقه لإعتصام على بُعد 200 مترو من حوشه اؤوين؟ في مانشستر، املاه لو عمكم الرقعي ساكن في بنغازي ايش ايصير فيه..عليا الطلاق ايشخ في سرواله لما يسمع كلمة اعتصام ؟!!

الذي أحب أن اعرفه ما هو الشيء لدينا الذي يستحق الجوسسة!!!! ما هو كل اللي عندنا في الطبق... اللي مش منشور في المواقع تلقوه في غرف البالتوك وكلاب النظام اتسجل.... والاعتصامات كميشة في لندن.. وكميشة في مانشستر وحارتين في أمريكا وواحد يرقص سولو في ألمانيا بارك الله فيهم قاعدين يخبشوا ويطلعوا في اعتصامات... والبقية النوم ولا الدبلوم وياريتها تنحرق... ولما تسمع كلامهم أتقول أهُم جنرالات المعارضة..ويا ويلك يلي تعادينا يا ويلك ويل وفي النهاية ترسي على بيان.

طبعا ما نبوش نتكلموا على حزب العشة الخطير واللي من نفخه ايطير ..او حزب شلوف وهذا ماجاب الله، هو من كترت شهرتهم حتى انسينا اساميهم بسم الله خميسة وقرين بس راكم تاخدوهم بالعين!!!

وتوه جي تستور، سيدنا فلطاح بن شطاح وتفكر بعد نومة أهل الكهف ان فيه معارضة ونفض الغبار علي نفسه وقال وحدوووه..وطاح زي السكران في رمضان هبك يمين يسار ... لكن البوني كان كله في الهوا. يالله شد عندك...مش بس الحاجي ولكن محمود شمام وحسن الامين وعبدالرازق المنصوري وجمعة القماطي ومفتاح الطيار وسويسي واقدورة وبن حميدة كلهم خونة ودونك ليهم يارقعي وانت قد وقدود وعندك علاش ما تكتب وتعلق عام كامل.

طبعا سيدنا فلطاح بن شطاح هذا معارض كبير قد الدنيا وآه لو عرفتوا منو هالسي فلطاح هذا والمقالة اللي كتبها خطيرة والمعارضة في خطر ومن كترت حرصه على سلامة المعارضة نسى يكتب اسمه الصحيح وكتب اسمه الفني وكأنه في فلم غوار.

اني عندي اقتراح للسيي فلطاح شنو رايك تفكنا من اسطوانة الحاجي اللي ملّت الناس منها وتحكينا على قصة الجُب في تشاد وكيف الحاجي وشمام والامين والمنصوري والقماطي والطيار وسويسي واقدوره وبن حميدة الله لا تسامحهم عزقوك فيه... اهو تغيير جو وقصه مرعبة ومثيرة وحقيقية وصارت.. وأكثر اثارة من خرافت الثوري بالعشة والثرثار الرقعي..وصدقني صاحبك الرقعي اكير واحد سيستفيد وحيكتب عليها 70 مقالة مقاتلة و300 تعليق صاعق .وخلي الرقعي يولع نار نار نار يااستعمار.

أما الحاجي وعصابته فاقترح عليك تصدر حُكم بالاعدام عليهم كلهم من تواه وتوتيلهم احبال سمحة ومشانق امليحة ،ولما تورث الكلب المسعور الله يلعنه دنيا وآخراه علقهم في ميدان الشهداء وخلي اصحابك بوالعشة والرقعي يدرجحوا فيهم... ويلقعادكم تراجوا ياليبيين لو عبيتوا على هالكواسم راهو يجيكم عمكم والبلح.

عبدالرحمن


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home