Libya: News and Views      LibyaNet.Com      Libyan music      Libya: Our Home

send

الأربعاء 30 ديسمبر 2009

previous letter                 next letter                 list of all letters

دجال في الهيئة العامة للصحافة؟!!

والله يا أخوان الصحافة الليبية حالها يبكي ويقتل من البكاء كأنه ما فيش ناس تشوف ولا تسمع بشن اللي قاعد يصير وقالك نبو صحافة حرة وقوية ونزيهة تحارب الفساد اللي موجود في كل مكان في هالبلاد .. يقولوا ( فاقد الشي لا يعطيه ) وهيئة الصحافة مسكينة بروحها غاطس فيها الفساد والخراب نين معاش تبان ؟؟
من سبعة شهور تقريباً جابولها واحد اسمه ( محمد بعيرة ) .. أسف بعيو بعيو .. حطوه أمين لجنة إدارة الهيئة العامة للصحافة وقالوا هذا إن شاء الله بيجيب الصيد من ودنه ويخلي الصحف التابعة للهيئة تللش في السماء ، فيه ناس يعرفوه كويس قالوا انتم تحلموا بعيو هذا حايهد عاليها على واطيها ومش حا يخلي فيها رشادة راكبة على الثانية ..
ومن حد حط رجلة فيها وهو يقول الخير جايكم على قدومي وخشوها هلها وحاتشوفوا انا شن اندير والناس صدقت وقالت الدنيا جت ،، وطاح فيها يا شيخ هدان وتخريب وصرف فلوس بالهبل شي لازم وشي مش لازم ، شي حق وشي كذب ، واستمر السي بعيو في الدعاية والترويج وتقديم نفسه على أساس أنه أبو زيد الهلالي وألا عنتر بن شداد متع الصحافة الليبية ، وصار يقول للناس أش من سرقة كانت وأش من فساد كان وأش من خراب أكتشفه على أساس هو يصلوا على طرفه !!
وبعدين جاب واحد مقاول أسمه ( القرواش ) بلدياته من مصراته اشبح قبل قداش لاهف هو واياه وقاله دونك ياقرواش قيم فيها الأذان ما تخليش فيها فيها سقف راكب على حيط ولا كرسي جنب طاولة وجاب واحد ثاني عيل صغيريفنص فيه يموت مسكه العلاقات اسمه ( علاء ) يخاف من بعيو وما يخافش من ربي بعيو يخطط ويرسم والوليد علاء ينفذ ويعدله كداش مئة الف دخل لجيب بعيو ماهو صاحب واحد من الصغار كيف عاد وكل شوية جايب مجموعة من امانة الثقافة لكن فيسع ما يعرفوا اللعبة وياخدوا بعضهم ويولوا من وين جو ..
والكذبة الكبيرة اللي ما خلتش هي كذبة ( البطاقات الطبية ) اللي حاول بعيو يكسب بها الراي العام في الصحافة الليبية وصدقوها المساكين لكن عاد ما قدرش يستمر فيها وبسرعة ما فضح روحة بروحة وسحب البطاقات المصروفة ،، وما فيش مناسبة إلا ويقول فيها على نفسه ( انا درت اللي ما قدروش وزراء الدولة الليبية يديروه .. انا صرفت .. أنا أعطيت .. أنا جبت .. أنا رفعت .. انا بعثت .. وكانه غير مش خايف على رأسه يطير فيها راهو قال أنا اللي قمت بالثورة مش معمر القذافي ) والغلابة والمساكين مخدوعين فيه ويصدقوا فيه يحسابوه حق كاط على ستة حتى اللي كان مسيب الصحافة رجع وصدق كذب بعيو وتزلفيته على الناس !
وبدأ عمك بعيو يشكشك فيها بدون عرف هذا حطه مدير تحرير وهضاك حطه مساعد رئيس تحرير وهذا حوله غادي وهذا جيبة جاي وهذا اليوم يشكره وغدوة يسبه وهضاك اليوم يحصه مسئول وغدوة ينحيه وواحد يجيبة الصبح والعشية يقوله روح والأخر العشية يعطيه وفي الليل ياخذ منه وقرار يصدره اليوم وفي نفس اليوم يلغيه ونهار ثاني يصدر قرار وبعده يصدر قرار مخالف ليه فيه من دارله اربعة قرارات كل واحد مكلفة فيه بمهمة أكتر من 600 قرار في ظرف سبعة شهور والحبل على الجرارة ..
الحصيلة الجماعة معاش عرفوا كيف يتصرفوا ولا كيف يخدموا والصحافيين بدو يخدموا على أساس كل ساعة وعلمها حتى الحوافز والمكافآت يصرف فيها السيد بعيو على مزاجه واحد يعطيه 100 دينار والأخر يعطيه 1000 دينار وواحد ما يعطيهش شي والغلابة كل شهر يلقوا في معاشهم ناقص واحد 50 والأخر 100 كيف بيغطي هالنصاب المبالغ اللي يصرف فيها مغرب ومشرق من غير حسيب ولا رقيب وحاسب البلاد ما فيهاش رجالة زي ما يقول ديمة .
واللقاقة أخ من اللقاقة ما يتموش شورهم حايطين بيه واحد يسوق بيه وواحد يمشي وراه حرس لما ينزل من السيارة يرفع في الشنطة وواحد يفتح في الصنصير ويبخ في معطر الجو وتضحك لما يتجمعوا حوله كلهم وهو بينهم زي الحتروبة وكانه طويل شوية راهو مش عارف كيف دار سبحان الله يضع سره في أضعف خلقة !!
ولما انكشفت اوراقة وفاحت رائحته تلخبطت عليه ومعاش عرف كيف يتصرف طبعاً ماهو حبل الكذب قصير طاح في الجماعة اللي خايف منهم وعارفهم يشكلوا عليه خطر اللي وقفه عن العمل وقفه واللي نقله نقله واللي منعة من الكتابة منعة واللي فصله فصله واللي لفقله تهمة لفقله يحساب الناس يخدموا في مزرعة بوه وجاب ناس ما يعرفوش ثلث الثلاتة قدامه قداش طبعاً هو تطوير الصحافة والحفاظ على الكفاءات وتشجيعها مش المخطط متاعه نهائياً همه الوحيد هو لمان الفلوس وقداش مليون بيطلع بيه من الصحافة وأجعل من كون وأجعل من خدم لكن والله إلا ما يصرفه على نفسه وصغاره يبر ودوايات ودعوة المظاليم ما فيش بينها وبين الله حجاب .
نهايته توة واحد دجال .. سارق .. كيف هذا مازال يخلوه يقعد فيها حتى يوم لو كان فيه من قلبة على هالبلاد .. لا حول ولا قوة إلا بالله .. وحسبنا الله ونعم الوكيل .

المبروك اللافي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home