Libya: News and Views      LibyaNet.Com      Libyan music      Libya: Our Home

send

الأحد 30 أغسطس 2009

previous letter                 next letter                 list of all letters

السيد سيف الاسلام.. انت الرئيس والملك

بدون مقدمات ولا مقبلات انت الرئيس وانت الملك ولما لا؟ وانت ابن ملك الملوك، ونقيب الرؤساء العرب! حتى وان كانوا غير متفقين معه، الا انه في الحقيقة هو كذلك؟.
انت الرئيس غصبا عن الي يبي والي ما يبي والي مش عاجبه يمشي يشرب من مياه البحر! هذا ان وجد مكان يشرب منه، لان يسيادة الرئيس البحر تم احتكاره وتقسيمه وفقا لخطوط العرض والطول بين عصابات لم نعرف لها ساس من راس تقاسمت البحر واجرته لشركات اجنبية تنهب خيارات وطننا ومن علي اليابسه لا يعرف ما يدور في البحر!.
انت الرئيس والي مش عاجبه يمشي يرمي نفسه في البحر! هذا ان وجد مدخل اليه ؟ لان يسيادة الرئيس كل الليبين علموا بان السواحل الليبية تم استعمارها من الدول الامبريالية المعادية للانسانية وحقوق الانسان ومعادية للاشتراكية؟ ولكن هذه المرة الاحتلال تم بالموافقة والتوقيع علي اتفاقيات طويلة المدي ويشهد عليها القاصي والداني؟ هذا يعني يسيادة الرئيس لا مجال لتحرير هذه الارضي الا بعد عشرات لا بل مئات السنين.
سيادة الرئيس ما تم تحريره بعد الثورة لا يساوي شي امام هذا الاحتلال الموثق في اكبرمؤسسات المجتمع الدولي.
انت الرئيس والي مش عاجبه يمشي ايملاح ولا يمشي حتي يشرب من مياه المجاري المتوفرة في كل ربوع ليبيا والي يبي يروي يمشي لحوض المجاري الي في شعبية انجيلة، وكان يبي حاجة فريش! ينتظر الشعبيات والتجمعات السكانية الجديدة المنتشرة في كل انحاء ليبيا وخصوصا تلك الي في الجنوب او في غرب ليبيا سوف تتوفر فيها المستنقعات لعدم التفكير في الصرف الصحي. ولاء.. يمكن الخبراء كانوا عارفين بان اغلب الليبين سوف يشربوا من هذه المستنقعات لان مش عاجبهم الي ايصير.
انت الرئيس غصبا عن الجميع والي مش عاجبه يمشي يرمي نفسه في اي زباله من تلك المنتشرة والمتوفرة بكثرة في جميع انحاء ليبيا؟.
انت الرئيس والي مش عاجبة يمشي يهاجر ويخدم بره لان فرص العمل متوفره في مقاهي التيك اوي والبارات في اوروبا؟. انت الرئيس والي مش عاجبة يمش ايشوفلة فندق.. ولا خربة.. ايجيبها لواحد من مدراء الاستثمار يعطيه فيها نسبة.. ويمشي يرقد في حوشة، هوينه العجيلي والزرتي وغيرهم علاش الدوله امديرتهم؟؟.
انت الرئيس والي مش عاجبه يمشي يشكي ، كان القي مركز شرطة يقدر ياخد شكوته والا حتي يسمعله؟
انت الرئيس والي مش عاجبه يمشي يرمي روحه في اي حفرة! هوينه الحفر كثيرة ومنتشرة في كل الطرق الرئيسية والفرعية؟.
انت الرئيس والي مشي عاجبة يمشي ايملاح.. زيه زي المقاتلة والاخوان الشكلات المقلبه؟.
انت الرئيس والي مش عاجبة مصيره اسود من مصير ضحايا بوسليم والايدز والفائد والجهمي وغيره؟؟
انت الرئيس والي مش عاجبة يمش ايدير ما دار الشامس وغنيوه وسليمان وغيرهم؟.
انت الرئيس والي مش عاجبه يمشي يرعي الغنم زي مادار زمان واحد سماه عمر النامي؟؟.
انت الرئيس والي مش عاجبه يمشي يحفر علي الاثار ويضيع وقته علي الاقل ايكون شارك في طمس التاريخ الليبي؟.
انت الرئيس والي مش عاجبه يمشي يشكي لواحد من خوتي كان القي منهم حد صاحي والا موجد في البلاد والا حتي تعرفوله امكان؟.
انت الرئيس والي مش عاجبه يمشي يشكي لمبراطور اغلاء اتصالات واحقرها في العالم ؟؟.
انت الرئيس والي مش عاجبه يمشي يشكي لمركز الرقابة علي الاغدية كان القي من ياخد شكوته ولا حتي ايكلمه؟.
انت الرئيس والي مش عاجبه يمشي يعبي تنك بنزينه كان اقدر ايعابيه؟ بالمناسبة نسمعنا رئيس البنزينه قدم استقالته مبربوحة والعقبه لامثاله.
انت الرئيس والي مش عاجبه يمش يشكي لسعيد حفيانه الي اقدر ايدر من الحبه قبه؟؟.
انت الرئيس حتي وان لم تسيطر علي زمام الامور، وانت الرئيس حتي وان معظم حاشيتك لا يهمهم الا جمع اكبر قدر من المال، يعني الضحك علي الدقون؟ انت الرئيس و ان كنت لازلت لاتعلم الصديق من العدو، انت الرئيس وان اخفقت في كل اهدافك وطموحاتك.
انت الرئيس والي مش عاجبه يضرب راسه في الحيط؟.

الغزال


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home