Libya: News and Views      LibyaNet.Com      Libyan music      Libya: Our Home

send

الخميس 27 أغسطس 2009

previous letter                 next letter                 list of all letters

الحاج شعيب فى زيارة لشمال مانشستر

السلام عليكم ورحمة الله وبركاته عمكم الحاج شعيب زى ما قلتلكم فى المرة الأخيرة رانى بنصلى فى شمال مانشستر والحق انا ما نعرفش المساجد فى الجهة هاديك لكن زى ما يقول المثل (( النشدة اذل الذاهب )) عمكم الحاج قعدت انفكر منوا عندى من اصحابى ساكن فى الشمال وخممت واجد ولكن الحاجة عن طريق الصدفة فكرتنى بواحد من اصحا بى القدم لما قلتلها على غدائى مع الحاج ابشير الجمعة الى الفايته قاتلى انت شورك نسيت صاحبك الى زمان كنا نزورو فيه قلتلها شنو اسماه قالت انا نسيت اسمه لكن نعرف وليته الحاجة سليمة واولاده صالح وخليفه والوليد الصغير الى حتى اسمه واعر ما نقدر نقوله اسمه مخالف ضحكت وقلت ليها تعرفى يا حاجة والله العظيم تستاهلى مشية للعمرة مرة ثانية على ها الخبر اشهد بالله انك حاجه مقنطه تى انا لى يومين نفكر فى صاحب فى هاديك الجهة وانت فكرتنى . صاحبنا يا حويجه سماه خالى سعيد لكن ان شاء الله غير قاعد ساكن غادى وما حولش لمكان اخر. المهم عمكم الحاج ضرب تلفون لصاحبه خالى سعيد وهدرز عليه نصيب والحق عزمنى على زيارة قلت ليه انا جاى نتغذى عندك انا والحاجة نهار الجمعة الجاية وعنوانك الأول نعرفه قالى اسمع انا راهو غيرت الحوش فى شارع اخر فى نفس الجهة قلت وباهى اعطينى العنوان والولد عنده الجهاز الى يوصل لآى مكان تى هذا الصنيديق الى يقولوله ( النوفي قويدر ولا النوفى كيتر ولا مش عارف البصيره شنو سماه ) المهم تفاهمنا وسلمت عليه وسكرت التلفون. نهار الجمعة بعد ما فطرنا مشيت خديت صقيطة خولى وشوى قضيه للحاجة عاد ما نقدروش ندخلوا على حوش خالى سعيد وايدينا فاضيه ومع الساعة 11.30 ركبنا الولد ووصلنا لحوش صاحبى الحق تلقانا بحرارة وفرحة ولقينا عاد طاسة الشاهى الحمر واتية بالرغوة وخدتنا الهدرزة لين قرب وقت الجمعة قلت له هيا ياخالى عاد نمشوا نصلوا مش عندكم جامع ليبيين هنا قالى اى جامع لييبيين عندنا جوامع فيه جامع السنه وجامع السلفيه لكن ياحاج شعيب انا رانى منصليش فيهن من زمان رانى نصلى فى جامع البكستان يقولوه جامع الخضرى وهيا بره صلى معاى قلت له وانت ليش ما تصليش فى جوامع الليبيين قالى توا مش وقت دوه الجمعة قربت بعدين نحكيلك قلت له كلا انا بصراحة بنصلى فى واحد من جوامع الليبيين قالى براحتك المهم الجامعين مش بعاد على حوشى تقدر تمشى حتى على رجليك تو ننعتك وبره وبيش ما توهش راهن الآثنيين فى جنب بعضهم ما بينهنش ميتروات قلت له باهى انعتنى ومش دخلك بعد الصلاة تو انجى بروحى وحتى كان توخرت ما تنشغلوش عليا قالى خالى سعيد عاد ما تتوخرش واجد راهى وخيتك الحاج سليمة دايرا الغداء بازين وتعرف البازين خيار ايكاله ساخن قلت فى خاطرى (( ياوالله خصلة توا مش لو دارولنا رز ولحم على مفاصله مش خير)) وقلت لخالى سعيد انا راهو عندى ميضوع فى راسى اول ما نحصل عليه خبر نرد لحوشك طول. خالى سعيد قالى شنو الموضوع قلت له بعدين نقولك هيا مع السلامه توا نتلاقوا بعد الجمعة. الحق وين ما قربت لجهة الجامع لقيت عرب مسلمة قاصة مع الطريق البعض منهم يمشى يسار والبعض يكمل لقدام الحق قعدت تايه ونفكر وين نمشى قلت ما خيرش من النشده وانا واقف فى الطريق تلامحت راجل لابس لبسنا الليبيين قلت هذا لينا خلى ننشده. شديت الراجل وسلمت عليه وقلت له يابن خييى قولى انا جاى بنصلى الجمعة ومعرفتش الجامع قالولى فيه جامعين هنا الراجل قالى يا حاج هذا الى قدامك جامع السلفيه والى وراه فى الشارع هذاك جامع السنة قلت له بارك الله فيك والله يكثر المساجد فى هالوطن قلت له باهى وانت يا ولدى شنو تقرأ هنا ولا مقيم قالى انا ياعمى الحاج نقرأ قلت له باهى وين تصلى قالى والله انا ماشى لجامع السنة اغلب صاحبى يصلوا غادى وتعرف نتلاقوا عقب الصلاة . تعرفوا عاد عمكم الحاج من التقصقيصة عرفت وين نمشى قلت له باهى خلى نمشى معاك قول يا سيدى صلينا وقعدت نشبح بالك نلقى حد نعرفه تعرفوا عاد جاى بنقصقص على البارونى المهم ما لقيت حد روحت فيسع لحوش خالى سعيد. لما وصلت قالى خالى سعيد مش قلت ممكن نتوخر ولا كملت موضوعك يا حاج قلت له لالالا والله ما لقيت ولا بصيره المهم خالى سعيد لقيته عازم جاره امحمد وولاده وبعد ما تغدينا جابنا الخبر لموضوعى قلتلهم والله تبوا الحق انا جاى بننشد على نادى البارونى قلوا فيه جماعة من الطلبة مشاركين فيه وانا ولدى يبى يمشيله لكن انا ما زال معارض لين نعرف شنوا هالنادى لمن تابع ومنوا وراه الحق واحد من عيال خلى سعيد قالى ياعمى الحاج انا نمشى غادى والنادى راهو مخلط رد عليا الحاج امحمد قالى اسمع نا بيدى زيك راهوا ولدى يجرى فى جرتى من مدة يبى يمشيله لكن نا رافض لأن الخبر الى جانى النادى قالو تابع للمعارضه قلت له شنوا هالخبر انا قالولى فى جامع دزبرى تابع للحكومة وانت اليوم تقولى تابع للمعارضه. اتى كيف هالبصيرة الى ما ليهاش حل؟

خالى سعيد قالى والله ياحاج الا عندك حق الى نشوفوا فيهم فى الصور عند اغنيوة ناس مخلطه ناس بلحيها وناس بلا لحي وطلبه وحكومة ومنهم جيرانى فى الشارع ومنهم من جماعتكم فى الجهة الجنوبيه وناس تروح وناس ما تروحش وناس قالو حكومة وناس فى المعارضه ومخلطها شباب على شياب على غيره وهالنادى ماهو طالق حد ولا مريح لا الصغار ولا الكبار ولا الشياب زعم ما فيش من يقدر يجيبلنا نباه بالزبط قلت لخالى سعيد انا ليا توا 3 اجمع ونا نجرى من جامع لجامع ومن مكان لغيره وما حصلتش خبر اكيد.

بعد طاسة الشاهى قلت لخالى سعيد انا رانى ما نسيتش مش قتلى توا نقولك على خبر قلت صلاتك فى جوامع الليبيين وتصلى مع الباكستان قالى يا سيدى القصة وما فيها من زمان كان عندنا جامع واحد لين صار خلاف كبير بين الجماعة وصل لحد الضرب ووجاء البوليص البريطانى يحز فى العركة بين المسلمين. قلت له معقوله هالكلام الى تقول فيه والخلاف على ايش زعم؟ قالى والله احنا الناس العاديين ما نعرف ليش لكن قالو خلاف بين الشيوخ والروس متاع السلفيه كل واحد عنده اعتقادات وافكار يبى الأخرين يمشوا عليها قلت لخالى سعيد بالك الخلاف على حاجة اخرى شخصيه قالى والله ما واحد يعرف المهم بعد ما حزت العركة انشقت مجموعة ودارو جامع اخر وطلعوا من جامع السنة وبعد مدة احرق الدكان الى كان تحث الجامع وانحرق الجامع معاه وبعدين حصلوا مكان اخر داروه مركز السلفيه وانا من هذاك اليوم قلت فى حالى نمشى نصلى مع الباكستان احسن لى من المشاكل قلت له يا خالى سعيد قلنا الليبيين (( حزمة كرناف )) لكن ما توصلش للدين والمساجد والعراك والشرطة. دخل علينا سى امحمد فى الحديت وقالى يا عمى الحاج شعيب حتى انتم فى جامع دزبرى متخلطه عندكم قلت له والله عمك الحاج يصلى فى الفرقان وهذا اكثره صوماليين واحنا معندناش ها لخبر عايشين وخيين كلنا.

عمكم الحاج بعد رجعتنا لحوشنا قمعزت نا والعويله وقلت للولد ترا فكنى من نادى البارونى لى شقانى وما عرفت عليه شىء وحلفت للولد مانك هابطه الحاجة قلت يا حاج خلى الولد يمشى وما ادير فى عقلك شىء خيرله من الدوران وبالك يخلطلنا على شى عرب زاطله ونوحلو فيه. قلت لها اسمعى ريحى روحك وريحى ولدك وريحينى كان النادى تابع للحكومة فكينى منه وانت تعرفى ان جماعة الحكومة ما عنديش ليهم خلوق وكانهو تابع للمعارضه راهو بالك تجينا من وراه شى خارقه كبيره انتى تروحى للبلاد انت واولادك وبنتك زوجتيها فى البلاد وبالك شى دخله من الدخلات تجيكم مشاكل (( وقلت فى خاطرى لو كان تروح ويمسكوها غادى اريح لى بالك نعاود نزوج بولنديه ولا شى وليه سمحة اخرى ههههههه)).

وهيا كل عام وانتم بخير بمناسبة شهر رمضان المبارك وتو سهرية رمضان بعد التراويح ممكن تجيب لنا شوى اخبار والتقصقيص يمكن يصبح ببلاش ومن غير تعب. خاصة وانا التراويح فى جامع دزبرى سقادى وما يعطلوش على السهرية.

الحاج شعـيب
مانشستر / بريطانيا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home