Libya: News and Views      LibyaNet.Com      Libyan music      Libya: Our Home

send

الأثنين 27 أبريل 2009

previous letter                 next letter                 list of all letters

رد على الطالب الذي كتب عن كندا

لقد كثر اللغط والجدل مؤخرا حول موضوع الطلبة في كندا وكان اخرهم هذا المقال يلي ما خلى حاجة الا وانتقدها ووجه اليها اصابع الاتهام, هو مش عارف ان هو اول الناس يلي بكتابته لمقال مثل هذا المقال قد وضع نفسه في قفص الاتهام , وانا اشك في ان الغرض من كتابة مقال مثل هذا في هذه الاثناء بان تكون له نوايا اخرى اكثر من مجرد النقد وعلى ما يبدوا ان الهدف من كتابة مقال مثل هدا هو تقليب الراي العام علينا كطلبة متواجدون في كنداوتشويه صورتنا والتشكيك في وطنيتنا ووضعنا في قفص الاتهام بعد ان كنا الضحية بسبب التقصير والاهمال والاخطاء المتراكمة على مر الزمن بسبب اطراف عديدة من السفارة الى الطلبة السابقون المتواجدون قبلنا في الساحة وهنا اريد ان ارد على صاحب المقال باقتضاب ودون تفصيل, لاني لو اريد التفصيل مش راح يسدني الوقت لاني ما عنديش وقت للكتيبة ولاهي في قرايتي ولولا فوران الدم والغضب يلي اصابني لقرائتي هذا المقال ورغبتي في نفي الصفات المزعومة التى يحاولوا ان الصاقها بنا كطلبة.
يا كاتب المقال( وان كنت اشك في انك طالب) بودي ان اذكرك بقول الشاعر ( بلدي وان جارت على عزيزة واهلي وان ضانوا على كرام ) يا رجل بلادك بلادك ولولا قائدنا وثورتنا لا انا ولا انت وصلنا كندا , يعني تحساب لولا الاموال يلي صرفتها علينا بلادنا كانت كندا بتفتحلك ذراعيها وتستقبلك ,ولولا الفلوس يلي انصرفت عليك واندفعت اقساط للجامعات الكندية كنت انت تقدر تقراي هني وتحصل شهادة باش توق بيها وتشوف روحك بيها على ولاد بلادك, ولولا بلادك كنت تحلم انك تشوف ثلج او ربيع كندا ,لولا ثورتنا وقائدنا يلي خلي التعليم مجاني كنت انت تقدر تكمل الابتدائية , الحمد لله قرينا وتخرجنا مهندسين ومحامين واطباء وفوق هكي اعطونا منحة وقرار ايفاد باش نمشواا الى كندا ونكملوا قرايتنا باش بعدين نروح ونخدموا اهلنا وناس ونبنوا بلادنا , انت ليش قاعد تلوم في ناسنا ونظامنا ماهو انت وانا جزء من هذا النظام ونجاحه او فشله هو نجاحنا او فشلنا نحن , نحن ولاد ليبيا اليوم وليبيا الغد وحني يلي بنكملوا مسيرة الاصلاح يلي بداتها ثورتنا في 69 ونحني يلي بنحسنوا بلادنا ونخلوها احسن من كندا , الحمد لله اهوا جينا هني وشفنا الدنيا كيف ماشية وتعلمنا وصار عندنا خبرة , باهي توة نولوا الى بلادنا ونطرحوا كل الافكار الجديدة يلي جبناها معانا , واهو دارولك مؤتمرات شعبية باش تناقش وتطرح افكارك واهو جي اليوم يلي بيكون فيه واحد متعلم مثلك حاضر في مؤتمراتنا , ويا صاحبي بدل ما تقعد تتمسخر على ناسنا انهم ما يعرفوش شنوا روسيا البيضاء اهو دولتك قراتك وتوة برة افتح دورة محي الامية, عيب تضحك علي ىشيابنا وناسنا , والله الله غالب الراجل ما يعرفش شنو العيب في هدا , على اياماته ماكنش في تلفزيون ودش باش يسمع بروسيا البيضاء , اصلا حني سبب تخلفنا ان لما الواحد منا يكبر ويتعلم بدل ما يولي ويصلح بلادة, يتبرا منها ويقعد يعاير في اهله , يا خوي لو كانوا اهلك جاهلين اهو هم صرفوا عليك باش يعلموك باش انت تنورهم.
انا اعترف ان عندنا في بلادنا الامور متلخبطة والفساد في كل مكان , بس العيب مش في قايدنا العيب فينا حنى , وقائدنا قد قال هذا الكلام في خطاباته الاخيرة وطلب منا كجيل جديد وابناء هذا البلد ان نستلم الرسالة ونبدا مسيرة الاصلاح , والاخ القائد وفرنا كل شيء باش نبنوا بلادنا , باهي حتى لو يلي قبلنا لم ينجحوا او استغلوا منصبهم لرغباتهم الشخصية , باهي اليوم وغدوة هو لينا خلينا حني نصلحوا بلادنا على خاطر اهلنا اليوم وعلى خاطر اولادنا غدوة, خلينا نروحوا الى بلادنا ونبنوا مدارس من غير اسوار , ونزرعوا كل حدايقنا بالعشب الاخضر , قصدي ليش الهروب من واقعنا , المدارس دارولها اسوار لان زمان يلي زيك كان يهرب من الحصة وينقز من السور ولي انت اصلا كندي من يوم يومك وماكنت تنقز من السور, والدنيا عجاجات وتراب لانك يلي زيك زمان كنتوا لاتخلوا لااخضر ولا يابس وتقلعوا كل وردة تشوفوها وتمشوا فوق العشب بدلا من ممرات المشاة, والكناسة في كل مكان لانا انت واني مين لوح هذه الكناسة , بس ورغم كل هذه الظروف اهو تربينا وكبرنا وتعلمنا وتخرجنا وسافرنا الى كندا باش نقروا, وتوة نقعدوا نعزروا في بلادنا بدل من انا نشكرها انها ربتنا وتوة نحاولوا ان نبنيها ونحسنها كرد من جميلها علينا, يا ابني بلادك بلادك ومين خرج من داره قل مقداره وانت مهما اعطتك كندا من فلوس او مناصب ديمة حتقعد هني غريب مقطوع من شجرة , لانك لا ليك لا جذور ولا فروع , لان يلي ما عنداش جذور مش راح يديرفروع, وغدوة ولادك بيطلعوا كندين ومش حاينقزوا من اسوار المدارس بس بنفس الوقت راح يكونوا فاقدين لهويتهم وزي ما قلت حيكونوا كنديين بس مين جدودهم ؟ الهنود الحمر ؟ ونشكر ربي ميت مرة لو طلعوا مسلمين وحفظوا سورتين من القران الكريم.
يا خوي اني مش نلوق بس اني نذكرك فان الذكرى تنفع المؤمنين , ومن الاخير بلاش تكبير الدوة وفتح مواضيع ما ليناش علاقة بيها ,. حنى طلبة جينا باش نقروا والفضل يعود الى قايدنا وثورتنا, وان شاء الله ربي يوفقنا, مع ان كما يعلم الجميع تعرضنا الى بعض المشاكل في القبول بسبب مشاكل معلقة بين سفارتنا في كندا والجامعات الكندية بشان المنحة وزيادة الرسوم الدراسية مما ادي ان معظم الجامعات لم تنظر في ملفاتنا من الاساس لعدم موافقة سفارتنا على شروطهم , وبعد هكي اهو قاعدين نستوا شن بيصير, اني ما نبيش نلوم حد على الاهمال والتقصير المشكلة ملخبطة وربك يستر , ونرجوا من المسؤولين في السفارة معالجة الموضوع بعقلانية بعيدا عن الانتقام وتسكير الراس , حنى بنسامحوهم لو اعترفوا بغلطتهم وصلحوا الموضوع وبنفس الوقت هو ما ياخذونا بوزر غيرنا من الناس يلي خرجوا عن قواعد الادب والاخلاق وقالو كلام غير اخلاقي في شخصهم , وانا اشك في ان من كتب هذه الشتائم طلبة لاننا ناس متعلمين ولا ننزل بمستوانا الى هذا النوع من التحاور والتصرف الغير اخلاقي, وانا اكيد ان من كتب وشتم باسمنا على صفحات هذه الجريدة هم ناس منهم وفيهم في بينهم حسابات شخصية وحاولوالنيل منهم عن طريقنا, حني ما نبوا منهم شيء الا العدل والرحمة, ونحن لايوجد أي شيء شخصي بيننا, نحن نرد العدل والانصاف منكم فقط ,يلي ونبي ناكد للكل انا حنى ما حصلناش قبول مش لانا طلبة فاشلين او دون المستوى كما يدعي البعض, ويلي يبي يطعن فينا ويقوا حني فاشلين هو يطعن في ابناء ثورة الفاتح لان هي مين ربتنا وصرفت علينا باش نكملوا المسيرة ونبنوا ليبيا الغد, فبالله عليكم ما حدش يزايد علينا , ومش لازم تقعدوا تزيدوا في الدوة وتكبروا في المواضيع وديرولها ابعاد سياسية, اني قريب نصدق اني في مؤامرة علينا باش يطفشونا من كندا, باش يغطوا على اهمالهم , وذلك بان يشوهولنا صورتنا و يضعونا في موضوع الاتهام, بانا حني ناكرين الجميل ونبوا نهربوا من بلادنا , يعني باش هم ما يتحاسبوش على اهمالهم وتقصيرهم , قعدوا كل مرة يتهمونا بحاجة مرة انا حني فاشلين وتوة بكتابة مقال مثل هذا يبوا يقلبوا الراي العام علينا ويطلعو العيب فينا اني حني نبوا كندا مش رغبة في التعليم ولكن لرغبة في انفسنا ان نهجر بلدنا ونبقي هنا , ايوة انا نبي نقرا في كندا بس مش لانها عاجبتي باش نعيش فيها بعدين , ذرة تراب من بلادي تساوي امريكا الشمالية كلها , بس انا نبي نقراء هني لان الجامعات الكندية مشهود ليها بمستواها العلمي الرفيع وما تقوليليش انت مش راح تروح زي يلي قبلك, اني بنقولكم انا مش زي يلي قبلي وماتحاسبونيش على اخطاء الغير ولا تزروا وازرة وزر اخرى وكل يد تمسح على وجه مولاها , ولو الطلبة يلي قبلي ما روحوش هذا مش ذنبي بل ذنبكم , لذلك انا اطلب بلجنة تحقيق من التعليم العالي لكي تاتي وتنظر في امورنا وان يكون موقفهم منصف لينا وبحاسبوا المقصر , ونحب نقول للي قاعدين يشوهوا في صورتا ويطعنوا في مستوياتنا العلمية ويشككوا في وطنيتنا وانتمائنا , لا والف لالالالالالالالالالالا هدا صعب عليكم نحن جيل الفاتح وابناء ليبيا, وليبيا في قلوبنا ان ذهبنا شرقا الى الصين او حط بينا الرحال غربا في كندا وبعد ان نكمل دراستنا سنعود لك يا ارضنا الحبيبة لكي نكمل مسيرة اباءنا ونربي ابناءنا في ربوعك الحبيبة وساقول باعلي صوتي انا مسلم و ليبي وبس , مش كندي زي ما قال صاحب المقال .

ليبي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home