Libya: News and Views      LibyaNet.Com      Libyan music      Libya: Our Home

send

الأحد 25 اكتوبر 2009

previous letter                 next letter                 list of all letters

عـندك حق يا حسين

فى مربوعة أحد المنازل ببلدة مزدة (80 كيلومتر جنوب غريان)، كان أثنان من المتقاعدين يشاهدان أحد البرامج المرئية فى انتظار الشاهى، وقد دار بينهما الحوار التالى :

- فاش تخمم يا حسين ؟
- هالدين العظيم اللي انتشر فى كل الأرض. شوف هالمسلمين الصينيين ، شى يفرح.

- والله عندك حق ياحسين.
- لكن هذولا ما يعرفو من الدين إلا القشور. طبايعهم زي لاجانب، غير يصلو... المسلمين حق هم العرب اللي يفهموالقرآن و الأحاديث.

- والله عندك حق ياحسين.
- و مازال راهو مش كل العرب مسلمين صحيح. عندك جماعةالشام والمغاربه والخليج ، حتى ما يصلوش كويس وتخلطو مع الأوربيين والهندوس . كان تبي المسلمين مزبوط راهم حنا واللى جنبنا.

- والله عندك حق ياحسين.
- و مش كل اللى جنبنا... كل هالدول تسمح بالخمر و بالكنايس، الدين الصحيح هو ديننا حنا فى دولتنا هاذى.

- والله عندك حق ياحسين.
- لكن مازال أهل الجيهه الشرقية يقلدو فى المصريين وناقصين في امور الدين ، و جماعة الشط واخذين عادات الطليان وبعض نساوينهم يلبسو فرنجي ، و أهل الجنوب تأثرو بالأفارقة. الدين الحقانى موجود هنا عندنا في الجبل الغربي والحمادا .

- والله عندك حق ياحسين.
- بس عندك حتى فى المنطقه هاذى الناس يسبسو فى الدخان ويسمعو في الموزيقا ويضربو فى الزكرا ، المتدينين فعلا هنا في مزدا.

- والله عندك حق ياحسين.
- والله حتى فى مزدا مش المناطق كلها ، راهو أكثر السكان مركبين دش ويشوفو فى القنوات المايعه ، ما فيش زي جيهتنا : العرقوب الشرقى ، مافيه حتى دش واحد.

- والله عندك حق ياحسين.
- الله يهديهم جيراننا ما نشوفش فى اولادهم ديما فى الجامع ، و مايداوموش على صلاة الفجر. الصراحة يا عبدالله ما فيه في العرقوب الشرقى يصلو فى الفجر ديما في الجامع الا أنا و انت.

- والله عندك حق ياحسين.
- لكن انا نشبح فى خشوعك فى صلاة الفجر موللى بلهون هاليومين.

راجل باهي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home