Libya: News and Views      LibyaNet.Com      Libyan music      Libya: Our Home

send

الجمعة 25 ديسمبر 2009

previous letter                 next letter                 list of all letters

جاب الله.. جاب ماعنده

انا اول مرة نكتب فى هالموقع ، ان شاء الله اتكون مش الاخيرة .
خونا الدكتور جاب الله ، والله مانعرف دكتور فاش ، لاكن الراجل قال انى دكتور ، قلنا زى ماقال .
السى جاب الله، كل كلامه على حكم طرابلس ، وحكام طرابلس ، والله مافهمت شنوا يقول ، ياريت جاب الله ايقولنا شنوا قصده بطرابلس ، طرابلس طرابلس ولا حتى سرت من طرابلس زعمه. الى نعرفوه احنى الطرابلسية ان طرابلس لحد تاجوراء ، اما تقسيم الملك ادريس الله يرحمه يودى لاشاورنا ولا اخدى راينا .
اجماعة سرت ايقولوا اكراع... واحنى انقولولها رجل
اجماعة سرت ايقولوا عدى ...واحنى انقولوا برا
اجماعة سرت ايقولوا ....عماكم ..واحنى انقولوا امعاكم
بالله عليك ما اتخلطش الباهى مع الشين سلم خوى
وكان عالزيت الى بتتقاتلوا عليه احنى فى طرابلس والله مانبوا منّه ليترة ، خلونا فى حالنا بديروا مملكة فى بنغازى ديروا بتجيبوا ولد الملك الاول يحكمكم جيبوا خذوا الزيت لاكن بشرط خودوا امعاه اجماعتكم الى فسدونا بلادنا .
يارجل كنا لما يدن الادان وحنى فى سوق الدهب انحطوا طرف لوحة ونمشوا انصلوا ، امنين جيتونا حتى الرواشن درنالهم حديد،ياراجل شنوا الواحد بيقول ،حتى ايام الملك انتم الى جيتونا ،مش الملك كان شرقاوى ، اعلاش مابنالكمش مدينة اقنينة زى الى عندنا ، اسالت خالى هدا السؤال قالى ...ولا بلاش . اجمعتكم يعرفوا السبب . اهو انقولهالك توالله ماهى صاير منها حاجة بنغازى لا فى عهد معمر ولا فى عهد جاب الله ، ياراجل انى امشتلها بلاد اتقول طالعة من حرب , جزار بحدا سكليستى ،مطعم بحدا حداد ، ايه توا قولى امعمر السبب ، انتم السبب ، ناس متخلفة ، ياراجل حتى الى طلعوا برة وعايشين برة من الشراقة فوضاويين ، مافيهم غير الصياح .
املينا لا صفقوا لمعمر ولا قالوله اغناوى لعلم ، انتم الشعر منكم ، وخمسة كسر طاولة منكم والشيابين الى تلقاهم ايقولو (مرحبتين بقازى روما من غيره مافيش حكومة) ( ومرحبتين بقايدنا ) اسمع يادكتور مصمص فمك بالزهر قبل ماتتكلم على طرابلس ، كانك تبى تنزل فى امعمر قول حاكم سرت ، السرتاوى ، اى امصيبة ، لاكن طرابلس صقع عليك . وبارك الله فى الشباب الى اردوا عليك ، وعرفوك رجالة طرابلس ، احنى مانخشوش فى اللبز ، امعمر ياخد وقته ، زى غيره ، كانكم غيرتوا الوضع وتبونا امعاكم مرحبتين ، احكموا زى ما حكم الملك ادريس ، وخلونا فى حالنا ، تبوا اديروا دولة بروحكم ، والفزازنة بديروا دولة مربوحة ، وزى ماخشينا بالمعروف نخرجوا بالمعروف ، اولادنا مش امشوا دولة توالله امشوا قارة ، كانك ماتعرفش اسال امليك .
السى جاب الله جايب خريطة وقسمها على كيفه ، مقدمك من ايام الملك ، نص البلاد دارها برقة ،ياراجل قسمها على اربع مش خير وكان ماتبيش خدوا سرت امعاكم ومصراتة , تهيا نص بنغازى امصارتة ، وورفلة . مادامك دكتور شنوا رايك بدل ماتنزل فينا ، اتقولنا تاريخ بنغازى ، وامتا ابنت ،على خاطر اسمعت انها بليدة جديده مش من البلادات العريقة زى طرابلس ، ولا حتى انت زى معندكش فى التاريخ .
راهوا مش خوتنا يتعفلقوا ، لاكن مارينا حد منهم ايقوله عيب يادكتور ، لابد اتفرق بين طرابلس ومابين سرت ، طرابلس عمرهم مازعلونا ، لاكن كلهم صم بكم ،وكانا الدوه مش عليهم .

طرابلسى حر


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home