Libya: News and Views      LibyaNet.Com      Libyan music      Libya: Our Home

send

الإربعاء 24 نوفمبر 2010

previous letter                 next letter                 list of all letters

شرتع!.. هنا الجماهيرية

يا ليبي! هوووه يا ليبي.. تكيف حالك اليوم؟
- حالي؟ افتح عيونك وخشومك وبعدين اسأل عن حالي. وبعدين ماهو حتى انت ليبي!
- لا..غير قلت نسمع منك احسن
- انت وين عايش؟ شني ماتشوفش في هالجنة الخضرا اللي عايشين فيها؟ خيرات ما شاء الله.. لا عندنا سقف يقطر ولاكناسة في الشوارع ولا مريض يشكي ولا طريق مكسره ولا مجاري داير فيها الزقريللو مسيرة ولا اعلام بالهون ولا فلوس طايره لبلاد بره ولا مظلوم في الحبس ولا عزوز جعانه ولا شيباني يبكي ولا ليبيين يعالجو في تونس الخضرا ولاشباب ايخيط في الشوارع ويفصل في الزنق ولا نساوين يوهبن ولا عمك يحزنون..حتى بترولنا.. قصدي بترولهم، ورّيه ودسّه واتخاف عليه من العين.. الطلب أكثر من العرض والملهوف أكثر من المصروف وحتى بنديروله طوبوات من ليبيا للسودان وحتى لجيبوتي وللهند.. الخيرات قدامك اشكال والوان وحتى الوفود الافريقية وغيرهم قاعدين خرّيط مرّيط علينا ولاصقين فينا..
- ايركرك!
- انت الباين عليك عندك الشبح بالهون او عمي الوان والا ابصر شنو.. ما تتحشمش بالله عليك قاعد تنشد فيا عن حالي..
- ارزم!
- تعالى شوف دار الخزين وتفرّج على الخيرات تبارك الله.. آهي المكرونه امتاعة العام اللى فات.. آهو الطماطم امجنّب من قبل عام سي شكري.. وآهو الحشيش اللى قريب يوللي ماريجوانا.. والرز المكسر حتى الفيران انبشمو منه.. - بزّع!
- انت الباين عليك رجعي والا كيف؟
- لا والله.. لكن راهو انتم غلطانيين هكّي.. ماعندكمش حق..
- تكيف ماعندناش حق الشفاعة يارسول الله! بلادنا وخيراتنا واحنا احرار فيها.. ترانا راهو في خيار خيرنا
- ماهو العالم يحسدكم هكّي يا بن عمي.. الناس هكّي تحسدكم على هالنعمة اللى انتم عايشين فيها.
- طز فيهم خلليهم يحسدو كيف ما يبو.. احنا مش معدلين عليهم.
- شرتع! وهالشكاره هادي اللى امعلقها فوق؟ هادي هادي.. الشكاره هادي شنو فيها؟ بصل والا خروع؟
- لا لا لا! هالشكاره هادي رد بالك تقربها! انساها بكل! نهارك اسود من شفاشيف راسك كان تقربها.. وسّع وسّع يرحم ولديك.
- تخيرها الشكاره؟ شني قضيتها هالشكاره هادي؟ زعما فيها جاوي والا فيسوخ.. ذهب والا فضة؟
- قبل ما نحكيلك قصة الشكاره هادي..اوعدني انك تحفظ السر.
- سرك وسرها في بير وهذا وعد.
- هالشكاره هادي.. شكارة الوعود.. مجنبينها وداسينها لسنة ‏2011.‏
- شرتع!

ويا مشبّع كلاب الغير.. ومجوّع يتامي بلادك
لا ليبيا عايشه في خير.. ولا ناسها فادها كتابك
توب لله القدير.. يغفرلك ويحمي ولادك

مدريد 85
badr5@hotmail.de



previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home