Libya: News and Views      LibyaNet.Com      Libyan music      Libya: Our Home

send

الجمعة 21 أغسطس 2009

previous letter                 next letter                 list of all letters

الحاج شعـيب فى جامع دزبرى

صلوا على النبى ياجماعة عمكم الحاج وعدكم يواصل التقصقيص على هلبة اشياء وعلى راسها نادى البارونى فى مانشستر. المهم عمكم الحاج قبل ما يبدى فى الحكاية وشنو حصل فى التقصقيصة الاخيرة يبى يعتذر منكم لأنى تبو الحق انا عندى بعض الأخبار ليكم من مدة لكن الى خلانى ما نقدرش نكتب ليكم المدة الفايته راهو حاجة خارجة عن ارادتى وتوا بنجيكم بالكلام.
المهم يا كبادى عمكم الحاج دار التقصقيص فى راسه ونهار الجمعة قلت للولد هيا اليوم نبو نمشوا للصلاة بكرى شويا بيش نحصلوا مكان داخل المسجد قالى الولد يا بوى احنا ديما نمشوا فى وقت معين ونحصلوا مكان طبعا يحسابنى بنصلى زى العادة فى الفرقان قتله يا مهبول اليوم نبوا نصلوا فى دزبرى على الأقل نسمعوا خطبة عربية وان شاء الله نلقوا شيخ مقنط نستفيدوا منه وبعدين قالولى جماعة نادى البارونى يصلوا غادى فى دزبرى المهم الولد هز راسه وقالى يا ودى انا ما نيش مغير يا بوى كان تعطينى الأذن انا بنصلى فى الفرقان وانت كان بتمشى لدزبرى الله معاك المهم ركبت الخرخاشة ومشيت قول ما حصلت مكان اندرس فيه السيارة الا بشق الأنفس ودخلت المسجد وبعد ما صليت السنة جاء وقت الجمعة وعمكم الحاج علق عيونه نبى نعرف الإمام الخطيب المهم تبوا الحق والله ما عرفته وحتى شكله يا ودى ما تقولش لينا الليبيين قلت هيا بالك الجماعة مرتبين مع شيخ أخر ولا بالك فيه واحد من الجماعة الدعاة ولا جاى من مدينة اخرى محتاجين مساعدة المسلمين فى دعم مسجد فى وحدة من المدن فى بريطانيا تبوا الحق عقلى ما رفعنيش بعيد لكن وين الخطيب بدى الراجل بدى يحطب بالانجليزى وعمكم الحاج لغته عربيه بس وناقصه يابال انجليزية. الحصيلوا قاعد عقلى قريب قلت بالك الراجل بيخطب فى الأول بالانجليزى وبعدين توى يخطب بالعربى ما صار شىء قلت فى بالى يا والله مخطر ياريت الولد جاء معاى على الأقل يترجملى بعدين الحصيلوا انراجى فى الصلاة تكمل وقلت توا نشوف واحد من الجماعة المسؤلين ونشوف شنى السبه ما فيش خطيب بالعربى المهم كملت الصلاة وقعدت نتلفت يمين ويسار بالك نشوف واحد من المسؤلين الى نعرفهم ولما ما قابلنى حّد طلعت وقلت بالك يا سيدى نلقى واحد من الى نعرفهم نسأله وين نلقى حد مسؤل؟ عمكم الحاج فى الزحمة ما شفت حد نعرفه جيت لشاب هكى نعرفه بالوجه سألته على الادارة والمسؤلين قالى ياحاج تعرف بعد الصلاة تلقاهم فى المكاتب قلت باهى هيا نراجوا تخف الزحمة ونشوفوا.
الحاج شعيب تعرفوا ليش جاى اصلا قلت خلى نستغل الفرصة ونقصقص على البارونى المهم قلت بالك نلقى واحد من جماعة النادى يا ودى زحمة الحق وانا طالع للسور بره جت عينى فى عين الحاج ابشير ولي مدة طويلة ما ريتاش الحق سلم عليا بحرارة وعّرفنى بولده الزروق وكرنى من ايدى على ركن وقعدنا ننشدوا على الأحوال المهم الحاج ابشير قالى انت شنوا رماك علينا اليوم فى مسجد دزبرى قلت له والله تبى الحق انا جاى قلت نصلى اليوم هنا بالك نحصلوا خطبه باهيه بالعربى وانت تعرف احنا الليبيين هذا المسجد الى نرجعوله فى كل حاجة وحتى الفتوه ما ناخدوا فيها الا من شيوخه. والحاجة لخرى الى جاى عليها تبى الحق بنقصقص على نادى البارونى وعارفك انت ما عندكش على الرياضه ولا النوادى الحاج ابشير رد عليا قالى وانت شن تبى منه نادى البارونى انت راجل شايب وهذا متاع شباب قلت له عندك حق انا ولدى مكسرلى الرأس يبى يمشيله ويشارك فيه وانا مشوب منه لأنى والله ما عرفته ولا حصلت عليه الضي قالى منوا من ولادك ولدك الكبير مش داير دكان ويخدم على حاله قلت له الكبير متهنى عليه والحمد لله خطبت له والعرس قريب ان شاء الله لكن انا حاصل فى الولد الصغير الى قاعد يقراء المهم قالى الحاج ابشير تعرف ترى انشد ولدى الزروق بالك عنده معلومات لأنه يمشى غادى مره مره وعنده صاحبه واجدين يمشوا للبارونى وديمه يهدرز عليه هو واياهم عمكم الحاج كيف ما يقول المثل (( عميه وشدت خانب)) تلبطت الزروق وقتله يا وليدى دلنى تعمل معروف الوليد قالى يا عمى الحاج شعيب النادى هذا راهو غامض والله ما يقدر واحد يجيبلك نباه بالزبط وياعمى انت شنى تبى تعرف قلت له انا المهم نبى نعرف النادى تابع لمن قالى الوليد انا الى نعرفه وحسب عرفى النادى فيه جماعة راهم مش تابعين لحد. تابعين ارواحهم بس قلت له يا وليدى انت صغير النادى يعمل فى نشاطات هلبه ومنين يجيب فى الفلوس زعم من الحلكومة قالى الوليد يا عمى الحاج يا ودى الجماعة اغلبهم مش تابعين للحكومة ومقيمين ومنهم حتى الى ما يروحش للبلاد بكل لكن صغارهم راهم روحوا فى هالصيف ويا عمى الحاج فيه حتى بعض الأشخاص لى يقروا على حساب الحكومة قلت له يعنى يا وليدى النادى زعم فيه جماعة الحكومة قالى ما نقدرش نقولك شىء يا عمى الحاج احنا ناس نروحوا للبلاد كل صيف وسامحنى فكنى من حفرك ما تجيبش لينا الشبهة. الوليد كر ايده منى وخلانى ومشى ولما شافه بوه الحاج ابشير طالع يجرى قالى خيرك مع الزروق شكلك زعلته قلت له والله الا ولدك شوره خواف لما قتله النادى تابع للحكومه هرب منى ضحك الحاج ابشير وقالى انت مش عارف صغارى ما يحبوش الدوه هذه. عمكم الحاج شعيب ما حصلش معلومة واضحة على النادى وما لقيتش حد من جماعة النادى وبالك حتى هم لحقوا على صغارهم وروحوا ولا زعم وين غاطسين ولا خايفين منى وما يبوش يورونى الضى ولكن والله مانى طالق التقصقيص لين نجيب الخبر الصح على النادى والجمعة الجاية نصلى فى جامع اخر بالك نحصل شىء وكان ما لقيتش معلومة قالولى فيه مسجد فى شمال مانشستر قالوا مسجد ليبيين والطلبه يصلوا فيه توا نمشيله ونقصقص غادى حتى كان ما نعرف حد لكن النشده ادل الذاهب. المهم انشدت الحاج ابشير على مكتب المسؤلين متاع الجامع قالى خيرك شنو فيه ادور فى المسؤولين شنوا داير طامزه مع الحاجه ولا تبى تولى لعوايدك الأولى من اربع سنين مش تزوجت عليها بولندية من هالبنات السماح. قلت له لالالا انا المرة الأولى ما طلعت منها الا بالكديكدى العالم الله انا الا زعلتنى الخطبه بالانجليزى قولى يا حاج ابشير على كثر ما عندنا من متعلمين واصحاب لحى منهم الى قارى فى السعوديه والى قارى فى ليبيا ولاى قارى فى افغانستان والى قارى هنا فى بريطانيا وطلبه يقروا فى الشهادات الكبيرة وعرب آخرين من كل الدول العربية معاددش فيه واحد منهم يقدر يوقف على المنبر ويخطب بينا ولا فالحين غير فى الفتوة فى اى حاجه وفى كل مكان خاطى الجامع والكلام فى الدين وقال البخارى وقال مسلم وابن تيمية وغيره والله ما فالحين خاطى فى الفتوه ببلاش. وبعدين الجامع مش فيه اكثر من شيخ؟ الحاج ابشير قالى اسمع انا والله زيك حاير وبقولى حتى صلاتى الجمعة مشكوك فيها لأنى اضطريت للكلام اثناء الخطبة ننشد فى ولدى بيش يترجملى لأنى ما فهت شىء. المهم قلت للحاج انا خاش للمسؤلين تعال معاى قالى لالالا انا والله زى ما تعرف عندى السكر والضغط وخايف ينزاد عليا الحال لكن انا رانى بنراجيك ونروحوا مع بعض لحوشى نتغدوا جميع الحاجة اليوم طابخه فتات وبعد ما تلا قيت معاك حلفت ما ناكل الا وانت معاى . عمكم الحاج دخلت للمكاتب ندور وين المسؤلين لين قطعت النفس من البحث والله ما لقيت واحد رجعت للحاج ابشير قالى شنوا لقيتهم؟ قلت له لالالا قالى بالك الجماعة فى العمارة الى مقابله الجامع قلت له شنوا عندهم مكاتب اخرى قالى خرف مأجرين فى عمارة الوقف استغربت الحق وقلت هذه قصة اخرى. الحق ما طاقنيش الصبر طلعت قصيت الطريق ومشيت للعمارة دورت لين تعبت ما لقيت حد فى المكاتب. المهم تبوا الحق تعبت وعرقت ودرجة حرارتى ارتفعت وصباطى اتقطع من المشى والجى والدواره رجعت للحاج حامق واعصابى والعة وقلت له كيف السبه يا حاج الجماعة اختفوا كلهم وما باين منهم ولا بصاره الحاج ابشير قالى هيا توا نمشوا للحوش وبعدين ساهل بالك نلقوهم فى صلاة العصر تبوا الحق والله الا راقيتلى قلت اللحاج باهى هيا نمشوا قالى تعال نمشوا مع الزروق فى سيارته خليها كرهبتك توا انت سواقتك بالهون وزيدها يا زايد والع توا تخبط حد. توا وين تهدأ نجوا لصلاة العصر وروح بخرخاشتك المهم ركبنا مع الزروق وشورنى شعرت بالحرارة فتحت الروشن ضربنى البرد. بعد ما روحنا تاريته الحاج ابشير عازم الحاج الناجى بعد الغداء جبدنا قصة الخطيب قال الحاج الناجى انت خيرك تجرى وادور فى المسؤلين راهم كلهم مش موجودين الجماعة كلها الي لاحق العويله والواشون فى البلاد ومصيف معاهم والي طالع فى تصييفه ابصر وين كلهم واخدين اجازات وفى نفس الوقت ومخليين المسجد فاضى قلت له مش الجماعه تاخد فى راتب من الجامع كيف يخلوا الجامع كلهم فى وقت واحد ولا مش معبرين العباد. قالى خرف يا شعيب تو هو غير هذا اتى والله لين نفرغ ليك الشوال كله. يا سيدى الجماعة مأجرين فى عمارة الوقف شقق قالوا دايرينهن مكاتب والايجار برخص تراب الارض يعنى ارخص من السوق وعندهم مكاتب فى الجامع ويلموا فى كل جمعة تبرعات وصدقات وغيرها ومش عارفين الفلوس وين رايحه ولا وين يصرفوا فيهن. ونزيدك كل وليه سمحة من هالاجانب تخش الاسلام يزوزوها وكانهى مش سمحة يهلبوها وخليها فى سرك يا حاج شعيب. شنوا رايك نفتحوا حتى احنا مكتب فى هالعمارة ونديرو مكتب مفتوح لحل المشاكل خاصة فى التيكويات والشركه ومشاكل الصبايا مع رجالتهم والفلوس والسلف وغيره؟ وانت يا حاج شعيب فالح وتقصقص هلبه ولسانك حلوا فى الدوة ومعارفك هلبه. قلت انا موافق المهم نشرط عليك حاجه وحده قالى شنو ؟ قلت له مش حتى انت ادير كيف الجماعة الوليه السمحة الى تجى تشكى من راجلها اطلقاه وتتزوجها رد بالك راهو هكى ما نتفاهموش. ضحك وقالى لالالا انا الحاجه بعدين تشكى فيا للبوليص وعقاب عمرى عاد نوقف بشنتى معاها فى مركز البوليص.
المهم قلت عاد ما فيا ما تعب فى دوارت المسؤلين ما دامهم كلهم مسافرين توا لما يرجعوا يدبرها مدبر حكيم قبل صلاة العصر رفعنى الزروق خديت خرخاشتى وروحت صليت فى الفرقان جنب حبيبى الشيخ عبدالله.
كان حيانا الله السبوع الجاى نقول ليكم التقصقيص الجديد على نادى البارونى وعاد كان صادفن حويجات اخرات تعرفوا عمكم الحاج ما يخلى شىء يفوته وربى يستر.
ايه انا ما قلتش ليكم ليش انا ما كتبتش فى المدة الفايته يا سيدى عمكم الحاج لما ضربنى البرد فى كرهبت الزروق بعد هاديك الحمقه والعرقه لما روحت للحوش شورنى حصلت سخنه وبرده الحصيلوا مرضت والحاجه قعدت تعانى فيا ايجى اربع ولا خمسة ايام والحمد لله تعافيت وحكيتلكم على الى صار.
وهيا تبقوا على خير وسامحونى الله غالب والله ما نقدر نصبر على الى صاير.

الحاج شعـيب
مانشستر / بريطانيا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home