Libya: News and Views      LibyaNet.Com      Libyan music      Libya: Our Home

send

السبت 19 سبتمبر 2009

previous letter                 next letter                 list of all letters

الحاج شعيب هدرزه مع الحاجة

فى البداية سامحونى يا كبادى طولت عليكم الغيبه وطبعًا زى ما انتم عارفين الواحد فى رمضان وخاصة فى العشرة الأواخر يكثّر فى العبادة وتقل السهرية العادية وفيه الى يصلى فى التراويح والتهجد وبدى الوقت ضيق شويه.
لكن عمكم الحاج تو يبارك ليكم بالعيد ويدعيلكم جميعا بان يجعله عيد بركه وخير وغفران ونسال الله العلى القدير ان يقبل توبتكم وصيامكم وكل خير درتوه فى ها الشهر المبارك.
زى ما تعرفوا كل ما يقرب العيد كل واحد يبدى يفكر فى شنو يبى يدير فى العيد وين بيمشى والمشكلة ما هيش فى الكبار الى زى عمكم الحاج لكن المشكلة فى العيال وعمكم الحاج لابد من يجامل شويه.
المهم امبارح درنا تقمعيزه مع الحاجه والأولاد وهدرزنا فى برنامج العيد، وانا من قبل قلت للحاجه تلم عجائز المنطقة الى تعرفهم وجيرانها وتعمل حفلة فى الحوش وقلت لها مستعد نجيب لها الى تبغيه والى يخص لوازم الحفلة وفتحنا المويضيع وعمكم الحاج عاد بديت الدوة قلت للحاجه اه ان شاء الله غير عزمتى صحابك وعزايزك الى تعرفيهن ويا حاجه يا ريت تقولى لى شنو لى تحتاجيه بيش الواحد يجيبه ليك من بدرى قبل الزحمة وعاد عمكم الحاج داير فى حسابه ميزانية رمضان والعيد ومصروف الأولاد فى العيد وعارفهم كل عام يبوا يشروا كل شىء جديد. الحاجه قالت لالالا ما نبو شىء ولانى مدايره حفلة فى حوشى قلت لها ليش شنوالى صار مش فرحتى زمان وين ما قتلك ديرى حفلة فى حوشك قالت ايه صح فرحت لكن توا الحال تغير والله يا حاج انا الى نكلمها على الحفلة تقولى يا حاجة مشكورة لكن انا ماشيه للحفلة الا دايرها نادى البارونى انا وصغارى قلت لها باهى وانتى توا شنو الى تبيه شنو نادى البارونى وراى وراى حتى فى حوشى وانا مش قلت لكم فكونى منه وما حد نبيه يجبد سريبه فى حوشى وحتى ولدك منعته من المشى للنادى وانا على ما قصقصت وجريت من قبل رمضان والله ما حصلت عليه نبا ولا خبر صحيح وشنو تحسابونى نسيت ولا تغيرت.
الحاجة اتنفضت من مقعدها تقول ضربها الآتريك ولا خشها جن قلت لها خيرك سبحان الله انتفضتى وكشرتى اتى نحسابك بتفرحى قالت فرقت والله فرحتى وقلت سعدى من دون النساوين حارمنى انا وصغارى وقاطعنا من الناس.
قلت لها باهى توا بتقولى لى ان كل صحابك ومعارفك ماشين للحفلة وما فيه حد قاعد والله هذا ما نصدقه قالت مش كلهم لكن والله يا حاج الا اكثرهم وشنو تبينى نقعد فى هالعيد انا وصغارى و4 ولا 5 نساويين هذا كان لقيتهم والله مرات ما نقعد الا بروحى حتى بنيتى عطيتها بعيده عليا وما تقدرش تجى تعيد معاى وبعدين انت خيرك ما تلينش وتخلينى نمشى وانت كان بتمشى باهى وكان بتقعد تعيد بروحك انت وصحابك انت حر قلت لها كلا انا على اليمين مانى عافسه لو تبدى الحفلة قدام حوشى وانا حاجه ما نعرفهاش ما نمشيلهاش تبوا الحق الحاجه ولعت منى وطلعت الى فى صدرها ولأول مرة تحمق هالحمقه قالت لى وهذا كله كله الى ادير فيه العفوعلى خاطر ما تعرفش النادى لمن تابع خيرك ماكش زى العرب ومخالف ولا تطبق فى المثل (( اخلف تعرف)) وبعدين انت بروحك كل ليله تقول نادى البارونى خاشها زعزاعى وما عرفتش شن قصدك يا حاج خيره قلبك معبىء ولا انت تبى تمنعنا على خاطر ما تبيش اطلع النحايسيات الى تصر فيهن تحتك لو كان الحفلة بالبلاش راك وافقت على خاطر نعرفك ادور غير فى سبله. الحق عمكم الحاج حمرت عيونى وقلت لها اسمعى انا الى محيرنى غير هالجماعة منين يجيبوا فى الفلوس والحق الى مخوفنى اكثر هما مخلطين لا تعرف منهم الحكومة ولا الى معارضين ولا الى بين بين ولا الى يروح لا الى ما يروحش لا الباهى فيهم لا الشين اسمعى قمعزى فى حوشك وريحى روحك ولى يبيك يجيك وسكرى هالموضوع. الحق الحاجة زعلت وبدت تبكى وتسبح فى دموعها وقاتلى خيرك انت مشيت للآفطار الى داروه فى دزبرى ولا عليهم مش علينا قلت لها هداك افطار وصدقه وحاجه فى الجامع كل الناس الى تصلى فى الجامع تحضر وانا تعرفى انا الأوقات نصلى فيهن فى الفرقان لكن صدفه اليوم هداك انا حصلت فى زحمة لعند قريب المغرب فى جهة دزبرى قلت خلى نصلى ونفطر وبعدين نروح للحوش وبعدين فكينى انا قلت ما ما فيش مشى . انتهى الموضوع الصغار ناضوا من حداى وتعكر الجو وعمكم الحاج لقيت روحى فى الميدان بروحى.
المهم قلت ترى خلى نفرض شنابى على عائلتى قلت للحاجه برى ديرى براد شاهى وكلمى الصغار يجوا يلاى تبو الحق الحاجه مشت توتى فى الشاهى فوق من نفسها والأولاد كل واحد دخل لداره وسكرها وانا قعدت بروحى جت الحاجه جايبه طاسة الشاهى تقول غير غسالة عاله ومره بدون سكر امر من عيشتى والصغار قالو لمهم ما نبوش نطلعوا والحوش هيم عليا وقعد (( حديدان فى الميدان)) قلت الله يبعد لشيطان ويخزيه والواحد خلى يفرح الصغار فى هالعيد والحاجه اليوم صابره معاى كل هالسنين فى الغربه الله غالب خلى نوافق يمشوا وخلاص قلت للحاجه اسمعى انا ما عنديش مانع تمشى لكن ردى بالك تفتحى فمك غادى ولا تقولى حاجه دورى صاحباتك والى طورك وقمعزى حداهم وديرى ودن طرشه وفم بكوش لا تقولى شرقه لا غربه والعاقل يفهم قالت لى خرف يا حاج توا بتوصينى بعد هالعمر.
قول عطيتهم الفليسات بيش يمشى الولد ياخد تداكر متاعات الحفلة لأمه وخوته. وقلت خلى توا نتصل بصحابى ونديروا ترتيب فى هالعيد اول واحد زى ما تعرفوا صاحبى وحبيبى الحاج امراجع قلتله شنو برنامجك فى هالعيد قالى زى العادة نجيك ولا تجينى لكن راهو الحاجه والبنات ماشيين للحفلة لكن انا والله مانى ماشى قلت له حتى انا الحويجه ماشيه قالى غلبوك يا حاج. قلت له ((الى يكبروا صغاره يكل مقداره)) وبعدين انت مش قلت (( الليبيين حزمة كرناف!!!! )) وينها حزمة الكرناف توا ؟؟؟ قالى انا توا نتصل بالحاج امجاهد نشوفه شنو برنامجه لأنه صغاره على ما سمعت ما حصلوش تداكر لابد قاعد فى حوشه فى العيد. قول اتصلت بالحاج امعيتيق قالى اسمع يا حاج انا والحاجه قاعدين فى الحوش ونادى البارونى انا زيك ما نعرفاش كان انت بتمشى انا زيك قلت له انا حلفت باليمن على المشى قالى خلاص ايمينى على ايمينك ريحنا. فرحت حصلت واحد زيى اتصلت بالحاج ابشير قالى خرف انا والله مانى قاعد بنمشى انا وصغارى الى يصير يصير انت تعرفنى والله ما عندى روح مع الحاجه هيا الى رتبت مع صحابها وانا ماشى للحفلة ما ادورنيش بكل.
قعدت نفكر منو مزال جاء فى عقلى الحاج الناجى قلت يا بن والدى زعم يمشى ولا لالالا انا نعرف الحاج الناجى صغاره متاعين كورة لابد يغلبوه ويمشوا هيا فكنى منه غير بنرعش اعظامى.
اتصلت بالحاج خيرالله قالى انا حفلة البارونى ما نيش ماشى لها لكن كان فيه حفلة اخرى والله الا بنمشى قلت له احسبنى معاك. المهم عمكم الحاج توا عاد جانا الفطر كان ربى عطانا عمر نقصقصوا على الجديد ونبربشوا على القديم.
وهيا تو كل عام وانتم بخير وبالصحة والعافيه عليكم وعلى عويلتكم جميعا وسامحونى طولت عليكم شويه فى الكلام لكن عاد هذا الى صار مانى داس عليكم شىء زى ما يقولوا (( شفافيه على قول خوتنا متاعين السياسه)).

الحاج شعيب
مانشستر / بريطانيا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home