Libya: News and Views      LibyaNet.Com      Libyan music      Libya: Our Home

send

الخميس 19 نوفمبر 2009

previous letter                 next letter                 list of all letters

الحاج شعيب والعيد الكبير

السلام عليكم ورحمة الله كيف حالكم ياجماعة الخير وسامحونى راهو عمكم الحاج مازال زعلان شويه على خاطر ما صارلاش من الحج وكلى فلق السنة هذه ومتعارك هو واغلب صحابه الى ما خبروشى على الوكالات الى تعطى فى حجه على حسابها كان تجيبلهم 10 انفار والحاصيلوا الحاج واخد على خاطره وما زال واجعاته القصة لكن تبوا الحق ما نقدرش نسيب صحابى وننساهم بعد هالعشرة الطويلة. المهم اليوم الحاجة على الصبح دارتلى المشاكل والتنقنيق على خاطر تبى الأولاد ينظفوا القاراج ويرتبوه بيش عاد تفرشيكة العيد الشوا والطبيخه السمحة والعصبان والحاجة ناويه تبى ادير حتى قديد كان واتاها الجو المهم قلت لها انا والله ما عندى جهد على الضم والتكركير امشى كلمى اصغارك خليهم يجو يوم يعاونوك فالحين غير نهار الوقفه يجوا بصغارهم يلقوا كل شىء واتى وبعدين فى العيد كل واحد منهم يجيب ضحيته ويجى متعودين كل عام يلقو فى كل شىء حتى الشوايات والفحم والخضرة واتيه ناقص غير اتبلى ليهم اللحم وتشويه وتعطيهم ياكلوا الحاجة ناضت فيا بالكلام قالت توا مش انت الى معودهم هكى شنو خطرلك السنه هذه قلت لها اسمعى صحيح انا معودهم لكن الى كان معادش يكون شنو انسيتى وقت انا نبى انحج انا وانتى ومحتاجين شوى فلوس كل واحد دار سبله وما صارش من الحج قالتلى مش مناديه السنة هذه انت شنو كل سنه تبى تحج غيرك ما لحقش حتى حجه وحده وانت ماشى قبل اكثر من 8 مرات ريح روحك هالسنة وريح صغارك وما اديرلهمش بغه وعراك فى هالعيد ولا تبى اطيرهم وتعيد بروحك زى العيد الصغير الى فات قعدت فى الحوش انت وصاحبك زى البوم خيرك العفو ما طايق شىء بالله عليك ريحنا فى العيد وانا منو بيا حتى بنتى الى كانت تعاون فيا عطيتها لولد عمك فى ليبيا ومعيده بعيده عليا قول يا سيدى الحاجه انهمرت بالبكاء لما تفكرت بنتها قلنا الله يبعد الشيطان ورضيناها بكلمتين يا جماعه عجوزتى وعشرة عمرى وقلت لها باهى حاضر توا الظهر قرب خلينى نمشى نصلى فى الجامع وبعدين نجى نضملك الجنان والقاراج وما تكونى الا راضيه يا حاجه قالت بالله عليك انا منو بيا الا انت وصغارى قول بعد الصلاة تلاقيت انا وبعض الجماعة اصحابى المهم عمكم الحاج زى العادة لابد من التنسيق ورد الشيره والدباره مع جماعتى على خاطر عيد الأضحى كيف الواحد ما سد غربه وقلت عيد هلبه علينا قلنا خلوا نشوف الجماعة الى يتولوا فى عملية الضحايا من قبل ويمشوا يدبحولنا ولكن على ما قصقصت الى الآن ما باين حد وان شاء الله يرزقنا بولد حلال يتولى موضوع الضحايا وبالنسبة لعمكم الحاج كان ما لقيناش واحد والواحد الله بعدين نمشى مضطر الى خوتى فى الاسلام الباكستانيين وحتى هما تبو الحق مختلفين فى اسعار الضحايا ( قربانى ) بعضهم كاتب قربانى فقط 79₤ والبعض اقل والبعض أكثر الحصيلوا قاعده حايسه عندى ومعرفتش شنو اندير.
الحاج امعيتيق قالى يا حاج شعيب خيرك مشقى روحك اعطى ثمن الضحية لوحدة من الجهات لمساعدة الفقراء وانويها صدقة كلها وريح روحك والفقراء هلبه حتى فى ليبيا والله فيه الى ما عنده بيش يضحى ولا امشى لجماعة ( القربانى ) ولا انت شاك فيهم قلت له مش مشكلة الشك لان الضحية فى رقبتهم وزى ما قال المثل ( فى رقبة عالم ولا ظالم ) لكن انا لو بالود والشهوة نبى نذبح بيدى زى ما قالت السنة. رد عليا الحاج امعيتيق وقالى فكنا من هالموضوع عندى ليك خبر مش باهى قلت له يا ستير شنو فيه يا حاج قالى جماعة البارونى حتى العيد هذا دايرين حفلة فى نفس المكان امتاع المرة لولاه وانا صغارى قالولى راهو بنمشو للحفلة وما تحرمناش فى هالعيد والله الحال من بعضه مضعضعه من ناحية الفلوس لكن شنو الواحد بيدير وافقت وامرى لله خير من المشاكل ويمشى العيد نكد قلت له وانت شنو قصدك توا من هالكلام انت شكلك تبى تعكرلى دمى وما لقيتش الى هالوقت وتجبدلى على البارونى شنو هما موصينك عليا ولا كيف وانت ما دام وافقت لصغارك وامهم انت شنو تراجى امشى حتى انت وخلينى بروحى فى هالعيد قالى تبى الحق انا رانى انفكر بجد بنمشى وانا جماعة البارونى ما ريت منهم شىء وما نيش حارم روحى قلت له اسمع انا على المبدأ والله الحفلة امتاعهم لو يدورها فى قارجى انا نجلى ونخليلهم البلاد هادوم ناس ما تعرفش من هم ولا وين يلعبوا وقصتهم غامضه جونى ناس قالولى معارضه وناس اخرى قالت اخوان مسلمين وناس قالت مخابرات وناس قالت مخلطين وناس قالت على ارواحهم يمشوا الحيط الحيط ولا الظل الظل وما خلو شىء الى ما خشو فيه ناقص يخشولنا فى الصبايا والعجايز وبعدها تكمل علينا. الحاج امعيتيق قالى تو كان خشوا فى سريب برامج النساوين انت شنو رايك قلت له والله الحاجه كان تشارك وتمشى ماعاد قاعده معاى يوم تمشى على حالها ما زال غير يدخلو بينى وبين عجوزتى. الحاج معيتيق قالى وانت خيرك عيونك وصلعتك ولت حمرا واشدوقك انتفخن تقول غير ضاربك الكرينتى يا راجل خيرك وين ما يجى طارى البارونى يصيرلك هكى قلت له ما نحبهمش ما عنديش ليهم خلوق ترى فكنا من هالنادى الأغبر ولا رهو حتى انت نتكها معاك عركه وتعرف راهو قريب تفرق الطريق بينا.
قالى الحاج امعيتيق اسمع غير هدى اعصابك وخود طويسة ماء وابعد الشيطان وبدل هالساعة بساعة اخرى وفكنا من البارونى وخلينا نمشوا ندورا على ضحية قلت له انا البارونى قريب يخلونى حتى الضحية ما نى امضحى شنو هالحال الأحرف قبل ما نكملوا الكلام ضرب النقال امتاعى وشفت الاسم قبل ما انرد قلت فى خاطرى جماعة البارونى قريب يطلعوا ليا فى النقال المهم لقيته الحاج امراجع بعد ما سلم قالى ياحاج جماعتك الى ما تحبهمش دايرين حفلة قلت له بالله عليك ما تنطق اسمهم قالى خيرك ياحاج مع البارونى تعرفو شن صار هو قال البارونى وانا ناخد النقال ونضربه على الحيط مشى طراطيش قالى الحاج امعيتيق حاج شعيب اتقى ربك فى روحك ورزقك قلت له بالله عليك ريحنى من كلامك والله كان دام هالحال مع هالنادى الأغبر الأحرف على راسى مش نفقد غير رزقى ممكن نفقد عجوزتى وصغارى وتعرف انا انفكر نبى نرحل لمدينة اخرى بيش نفتك منهم ولا حتى انروح للبلاد انظنى احسن منهم قالى بالك يلحقوا بيك غادى وضحك وضحكنى معاه وقلت له هيا نوض نمشوا ندورا ضحية خير لينا من القطاف الزايد.

الحاج شعيب
مانشستر \ بريطانيا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home