Libya: News and Views      LibyaNet.Com      Libyan music      Libya: Our Home

send

السبت 17 ابريل 2010

previous letter                 next letter                 list of all letters

مع المرتاح والحيران.. حلقة الحج

الحيران: شنو؟ سمعت قالوا ماشي للحج حتى السنة؟

المرتاح: إنعم ياسيدي عندك مانع شورك حاسدني؟

الحيران: أعوذ بالله , حاسدك عمى يابوجار ,بس قلت مش بالك تصدق بها الفلوس على شي راقد ريح خيرلك؟ خصوصا هاذياهي تقريبا المرة العاشرة اللي تحج فيها.

المرتاح: والله ما ليّا فيهن الا مشية وحدة بس ,المرة اللي فاتت حجيت على خالتي واللي قبلها على نسيبتي واللي قبلها على راجل عمتي.

الحيران: وكيف تقدر تبد على هالناس كلهم, ياراجل خلي حاجة الروحك.

المرتاح: صدقت لكن ياخوي ياحريوة ماعليك مجاحدة,بس خللي الكلام بينا,هذه المنجوها جارتنا اللي ينقاللها مرعية..ماراك الا عارفها؟

الحيران: آه, مرعية الحولة كنها ؟

المرتاح :والله ماعقبت علي قرش واحد ,ياسيدي هاذي كل ما نروح مالحج نظيف مالذنوب كيوم ولدتني أمي وناوي خلاص عالتوبة, ماتخللي شعر راسي ينبت من جديد نين تبدا ترقصلي و اتديرلي في حركات إغراء,ما يكمل شهر الا وانا زاقب علي سطاحهم ,انت عارف حوشنا وحوشهم الساس ع الساس ,وانت عارف ماإجتمع راجل ومرا إلا وكان الشيطان ثالثهما.بعدها نندم و نبقى ياخوي نرجى في موسم الحج بالساعة والدقيقة , وبعد الحج تعود مرعية لعادتها القديمة,والله حرت مع هالدعية الفاجرة .

الحيران: شكلك ياصاحبي ما عندك ما تدير في هالدنيا إلا الحج وترشة مرعية؟وليش ماتزوزها وخلاص ويبدى الموضوع بالحلال؟

المرتاح : أنا نزوز وحدة مش محصنة ؟هذي منهي عنها ياصاحبي.أنت بس ادعيلي أنحصل في العمرات اللي في القوارشة الجدد أنتاع الصينيين وبعدين نطلعوا من هالمنطقة الساقطة ونحج الحجة الاخيرة انشالله... خطرها , ماتقوللي ليش ماتحج وتوب حتى أنت وتفكك من الدكتور أغنيوة, راهو يهبع فيكم ويدفلكم ف الطواجين, مرة باحث ليبي ومرة كاتب ليبي , وانتوا تصدقوا فيه.

الحيران: آيواااا ,إلا الدكتور إبراهيم ,قبل ما تحكي عليه مصمص فمك بالزهر,هضه لما كان يعارض في النظام ,وقت اللي كان فيه معارضة بالصح , كنت انت مازلت تلحس في خنانتك ,وحتى قرايته ماخلوه إيتمها. ثانيا أنا مانيش زيك, حوشنا آخر حوش في الزنقة وجيراننا ناس من مصراته لاحس ولا مس ,الله يسمحلهم بس كان سي إمحمد يفكنا من صوت الداف ع الصبح.

ثالثا وهوا الاهم قصة الحج من أولها الى آخرها ماقدرتش نهظمها بصراحة ,كلها طقوس وثنية من الطواف سبع مرات , وذبح القرابين وحلق شعر الرأس والسعي بين الصفا والمروة اللي كانن جبلين على كل جبل كان في صنم, واحد اسمه آساف والاخر نائلة, وحتى لبيك اللهم لبيك كانوا يلبوا بيه كفار قريش .تعرف أنت عليش مسميين الكعبة بيت الله؟ لان هذه الدار كان فيها فعلا آلهة قريش من الاصنام على عدد أيام السنة؟ أنا مش مستعد نمشي نبرم كيف المدوشن على حجر لاينفع ولايضر.

المرتاح: يا غشيم نحنا ما نمشوش نعبدوا في الدار نفسها نحن نعبدوا في رب هذه الدار, باهي ايش رايك ان عرش الرحمن قاعد في سابع سما وعلى ارتفاع عمودي بالزبط فوق الكعبة يعني كان طاح الكرسي ما يطب الا في وسط الكعبة ؟وفي كل سما من سموات الدنيا السبع يوجد مبنى زي هظه وعلى نفس الارتفاع وتلف عليه الملائكة اربع وعشرين ساعة عكس عقارب الساعة مثلنا تماما؟

الحيران: شوف ياحاج ..

المرتاح : انشالله نحجوا..

الحيران: باهي شوف يابلعوط يامتاع مرعية ,قيسك مش عارف حجم الارض بالنسبة للكون,حجمها ضئيل جدا لايكاد يذكر, يقولك تصور أنك خذيت الارض وهشمتها وسحنتها وخليتها عرم رملة كبير وبعدين خذيت حبة رملة وحدة ,هالحبة هاذي تمثل كوكب الارض وباقي الرملة هيا الكواكب الاخرى, يعني شن اللي يخللي ربي يختار هالكوكب النكرة من دون الكواكب لخره ويحط عرشه فوق منه؟

المرتاح: والله هاذي حكمة ربي ,ملكه وهو حر فيه ,انت منو بيش تحاسبه؟

الحيران: المشكلة مش هنا , المشكلة ان كوكب الارض دائم الدوران وطبقا لكلامك بيش يبدى كرسي العرش محافظ على مكانه فوق الكعبة لازم يبدى يدور مع الارض بنفس السرعة.المشكلة مش هنا أيضا المشكلة ان المسافة بين السماء السابعة والارض خيالية جدا جدا جدا تقاس بمليارات السنوات الضوئية,وحسب ماخذينا في الحساب والهندسة أن السرعة المحيطية للعرش تساوي السرعة الدائرية للإرض واللي تساوي تقريبا 30 كم/ساعة ضرب مربع نصف قطر الكون ,يعني مستحيل ان تتخيل السرعة التي يلف بها العرش حتى يحافظ على مستواه العمودي فوق الكعبة. أضعاف أضعاف سرعة الضوء.

المرتاح: انا نقول عليش ربي دايخ, استغفر الله, قصدي يعني مرة مرة نشوفوا في كوارث طبيعية ومصائب تقع على ناس أبرياء. وبالنسبة لموضوع الطقوس ,مش بالك كان هناك أنبياء آخرين بعثوا في هذه المنطقة وجاءوا بتلك التعاليم ثم حرفت مع الزمن يقولوا ان اساف ونائلة مارسوا الزنا في داخل الكعبة فمسخهم الله بعدين دارولهم تمثالين لكي يبقوا عبرة للناس وكانوا تدفلوا عليهم في البداية ومع مرور الزمن تحولوا من الدفالة الي العبادة.ومن المعروف ان الانبياء يكمل بعضهم بعضا.

الحيران: يعني قصدك تقول ان النبي جا بس بيش ينقي الدين مما لصق به من شوائب ,باهي عليش معتبرين محمد خيرة الانيباء وسيدهم وما خلقت الدنيا الا من اجله,طلما انه لم يأتي بجديد.

المرتاح: حسينك دوختلي راسي ,الله يهديك ويصلح حالك, رد بالك والله كان متت على هالحالة ما ينفعك لااغنيوة لا ظم القشة ,خليني توا نزرق على بنت جيرانا ما راهي الا تراجى فيا م الصبح, الحج قرّب وما فيش وقت انظيعه معاك, باهي نشوفوك يابوجار.

الحيران: ماشي ياحاج بس رد بالك م الايدز ,والله نقولك خللي الايدز يركبك بالك تموت في الحج وتخش الجنة.

الحيران
al_hayran2005@yahoo.de


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home