Libya: News and Views      LibyaNet.Com      Libyan music      Libya: Our Home

send

الثلاثاء 16 نوفمبر 2010

previous letter                 next letter                 list of all letters

كبش العـيد


كبش العيد امصوقر يومه ......... تمـــــــــــــــت وقفتنا امعلومه
كبش العيد اكثر تخميمه............خايف من القصة القديمه
كبش العيد امشيط سومه ........... فرحان ايراجى فى يومه
الكبش ايكشك للنعجات ............ العيد تحدد يا حنات
كبش العيد اكثر بعباعه ............... يرجى فى الذبحه بالساعه
كبش العيد الفين وعشره.................متشخشب يرجى فالنشره
شريت البارح كبش العيد......بكا قال اتمرطيز جديد
كبش العيد افلوسى اتريده ............ خلى حالى ع الحديده
كبش العيد نظيف البشره ................موديلا الفين وعشره
كبش العيد ودار وصيه ............ وقفتنـــــــــــــــــــا مع السعوديه
جاك العيد ولم اطرافك ياكبشي وتيت اكفافك.
يا كبشـــــــــــــــــــــــى فى العيد انريد .................... اشوايا و الباقى قديد
الكبش ده بذاته يصيح.....لين يوم الوقفة يستريح
كبشي قال عليك كساد ...السنه ما فيهاش اعناد
امشو قولو لي كبش العيد *** عربنا متفقين اكيد
تهنى ياكبش العيد.....اتفقوا عالوقفة والعيد
كبش العيد كتر تخميمه.....ايفكر في سريبة الاول
الوقفة تمت باص عيون **الكبش امدوخته بلهون
كبش العيد فرح باللمه**وصى عالنعجات ابفمة
كبش العيد شكا ما يشكى ... لكن ولما يرايف يبكى
متفقين عليه القادة عيد سعيد ومن عواده
نحلفلك ياكبش العيد *** يوم الثنين الوقفه ان شاء الله اكيد
كبش العيد قال غربية ....... عرب يتفقو فى عيده
كبش العيد ظروفه شينة ... ينظر في الأمواس بعينه
كبش العيد سمر من توا خايف من هاذيك الدوه
هك وهك معدي فيها .... بالوقفة ولا خاطيها
كبش العيد جاته لَيّة ... ايراجي في النشرة الليبية
اليوم تهنى كبش العيد نهار سعيد اتفقوا عالوقفة والعيد
كبش العيد رقاله السكر تما في الكانون يفكر
كبش العيد أمهني فصله...هو إيغني ونعجه ترقصله
كبش العيد شكا للقاضى ..........خايف من تكرار الماضى
كبش العيد راقد متهني هو ايدربك والنعجه اتغني
كبش العيد امطول صوفه**والوقفة تمت معروفة
كبش العيد فرحان وزاهي ... قال العيد اداله باهي
امشوا قولوله كبش العيد ****** عربنا متفقين أكيد
كبش العيد قفل نقاله قال الشعب الليبي حاله
ايمته صارت واي سنين...العيد بلا وقفه ياعين
الكبش الليبي فى إبتهاج .. قال العيد مع الحجاج
بعد مكه دارت إعلان .. يجرى ويشلش فرحان
كبش العيد طلق زغروته .. فرحان عيدا مع خوته
كبش العيد ضحك قايلي**حقي صقع عليك اجهلني
كبش العيد اموسع باله يحكى فى قصة لعياله
نعجه دمعها بداد... علي كبش في قلع هالبه
كبش العيد وحقه غالي**شكوانا لله العالي
كبش العيد امنتش صوفه...قال الوقفه تمت معروفه
كبش العيد مسح دمعاته *** يوم العيد الذبحه جاته
كبش العيد اوخر في الجية**يرجا في الازمة المالية
كبش العيد خلاص تريح ....من الفرحة يجري وايصيح
كبش العيد اليوم تهنه **** اتفقوا بوعقال وبوشنه
كبشي قايل يوم علي **** نحضر يوم الوقفه حي
الكبش قال ..... أزعمه ياعزيزالعيد في ميعاده وألا عليه اعناد كيف العادة
كبش العيد قال خطوني **** بعد ترسو على العيد اتجوني
كبش العيد تباعد شكه جاته برقيه من مكه
كبش العيد اليوم امهيب يرجا فى الوقفة وامريب
اليوم تهنى كبش العيد نهار سعيد اتفقوا عالوقفة والعيد
كبشي قال عليك سعاده ذاعوا عيدي في ميعاده
كبش العيد تباعد شكه جاته تصريحه من مكة
كبش العيد نشد عالوقفة خايف مالذبحة بالصدفة
كبش العيد امريح روحه *** فارح مش مذبوح ابروحه
كبش العيد كرس في الحقفة *** خايف من موضوع الوقفة
كبش العيد سرق لمواس * * * الماضي داير له وسواس
كبش العيد افطن للجو ... ينشد عالوقفة من تو
كبش العيد ايراجي فيكم .. ميت موت ارياف عليكم
كبش العيد بكى بالعبرة ... شايف بين عيونه قبره
كبش العيد تمنّى موتة *** ولا وقفة عرفات اتفوته .
كبش العيد شكا مستغرب *** قال اتفقوا وإلا نهرب .
كبش العيد سقيطة تمه شوايا تبرم وسط اللمة
الكبش اللي ينزل في دموع اليوم مقطع في المشروع
كبش العيد انسدت نيته ...قال علل عمري ماريته
كبش العيد بكا قدامي .. قال نريد عقاب ايامي
كبش العيد وجاته جلطة**مايبيش ايعيد الغلطة
كبش العيد ايهني ديما**ابنائك يا ليبيا العظيمة
كبش العيد طلق زغروتة .. قال الوقفة جت مزبوطة
كبش العيد بصوفه حايس **** مستغرب ما فيش عفايس
كبش العيد قهر اليهودي **** أتفقوا ليبي وسعودي
كبش العيد تلخبط جوه.........قال اذبحني حتي توا
كبش العيد ضحك بالقوه.........قال اذبحني حتي توا
يا كبش العيد انطحنى ........ فى دار الغالى لوحنى
وينك وينك يا نموسة ... جاك العيد وأحلى حوسه
عصبان وكبدة وشوايا .. ونص قلايا .. أبصحة تاكلهن يا منايا
العيــد الجاي بجاه هالليله.... طويل أزويلــه... هو يسلــخ وأنتـــي تشــويلــه


ياكبش حال الغايـــــــــــــا .......... تبقا أبمية ماللبلاد هدايــــــــــــا
بيش نقدروا نشروك
زدت أهمومـــــــــي ......... نسائل علي حقك أتضيق أعلومــــــــــي
نبرم علي سوقك أترق اعزومـــــــــي ......... غالي أونا غالب أفحق غدايــــــــــــــا
يالعين في أدموعك الليلة عومــــــــــي ......... هالعام أنسي ننصبوا شوايــــــــــــــــــا
ذكرتني بالديــــــــــــن ......... وأبوضع عايش فيه كله شيـــــــــــن
ياكبش راني من فقر مسكيــــــــــــن .......... أمفلس أومش محسوب مالشرايـــــــــــــــا
يا كبش نخلقلك أفلوس أمنيــــــــــن .......... أونا الدين قلل راحتي أوهنايـــــــــــــا
سعرك غالــــــــــــي .......... أومانيش عارف كيف نرضي أعيالــــــــــــي
أمفلس أوعندي دين رهدن حالـــــــــــي .......... مجبور ننسا بنتك يا أشوايـــــــــــــــــا
ممكن أتجي أبزكاة مو من مالــي .......... أوما أيضر كن عيدت عيد بلايــــــــــــا
ياكبش خف عليــــــــــــا .......... غالي أونا لفلوس عندي أشويـــــــــــــا
راحت علينا كبدتك مشويـــــــــــــا .......... واللحيمات مالموخر علي تعشايــــــــــــــــا
ياكبش نا نبيك موبيديـــــــــــا .......... وأبشروتك خايف أتزيد شقايــــــــــــــــــــا
أنت أضحية أونا بقيت ضحيـــــــــــا ......... أوهالعيد لانقني رفعت الرايـــــــــــا

وصلتني من ليبيا
جمال


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home