Libya: News and Views      LibyaNet.Com      Libyan music      Libya: Our Home

send

الأحد 15 نوفمبر 2009

previous letter                 next letter                 list of all letters

مصطفى الزايدى و مراتى والمبكبكة

بعد ما عزيت صديق العمر (م) فى وفاة والده المغفور له بأذن الله الراجل الطيب و اللى كان من الجنود المتحركين (المخدوعين) ليلة الفاتح الاسود ( الله غالب قالى المرحوم مرة لو يدري شنو كان بيصير لليبيا بعد هذيك الليلة الغبرة راهو ربط روحه بشجرة فى معسكر قاريونس ومتحركش ) على العموم بعد ها روحت للحوش وانا جعان قريب انموت من الجوع طقطقت على الحوش على خاطر المفتاح رايح منى (بعدين المرأة لما تكنس فوق الحوش لقاته طايح تحت دولاب الخزين) فتحتلى بنيتى الصغيرونة ياسمين الباب و قالت بالقوة بوي جي .لقيت المراة مادة زومتها قدام التلفزيون تتفرج على مسلسل متاع زلمات لاسلام ولا كلام هاتيلنا ما نتسمسمو يا مراة. خشت للكوجينة وجابتلى صونية فيها مكرونة امبكبكة حتى حمص ما فيهاش (مكرونة امنفضة لا بطاطا ولا فول وفوق من هذا لونها بيضاء وخرز حتى لو كانت اسبيقيتى ممكن طبعا اللحم غير وارد حتى لوكان لحم قطاطيس ) قلتلها هذا شنو ؟ هذا عشى يتعشي بيه بنى ادم ؟ شنو قصتك يا بنت الناس ؟ خير دعوتك وانتى شادتيهيلى على المبكبكة ؟ شنو تبينى انموت من الجوع ؟ربع ساعة تقريبا و انا انحط فى كلام من ها النوع وهى مسكينة ساكتة و تشبح لوطى اخر كلمة قلتهالها ياريتنى سمعت كلام خالتى (ف)وخديت قريبتى(م) وافتكيت من جو الحب و الكلام الفارغ , رفعت راسها واتفنص فيا تفنيصة و ينشرك فمها : شنو تبينى اندير ؟ وين الحمص ؟ وين البطاطا ؟ حتى الطماطم الحكة فاضل كشيك بس ؟ ما انبيش انكلمك على اللحم اللى انشوفو فيه من الحفظة للحفظة ؟ شنو تبينى ناخد فراشية وانحط ياسمين بحنبي وانوهب ونطلب قدام الجوامع ؟؟؟ غير قولى يا راجل انت شنو قصتك ؟ بره شوف الثلاجة ؟ يا راجل حرام عليك انا شنو ذنبي ؟ يا ريتني قعدت فى حوش بوي و ما درت ها الصغار ...... وياريتنى خديت روحى وامشيت للمربوعة عنده الحق المعاش تم وما تحتى الا عشرين دينار بنعطيهم لجاري اللى متسلف منه حمسطاش جنيه .
( عندي عقاب كمبيوتر من عام الف وتسعمية وزيرو فى المربوعة اعطوهولى جائزة على خاطر كنت انجيب فيها الاول ايامات كلية الهندسة ياحسرة عليها ايامات كانت كنت انجيب فيها الاول على خاطر نبي نلفت انتباه ( س) اللي هيا زوجتى توا !!!!؟) على العموم فتحت الكمبيوتر ( بارك الله فيه جارى امحمد فاتحلنا الوايرلس بالبلاش لجماعة الشارع غير بس مافيش داون لووود يا اولاد ) على العموم كالعادة اول موقع انخشله هو موقع الاستاذ الفاضل حسن الامين اللى نبي انقوله راهو انت كبير و كبير هلبة وانحبوك واستمر استمر انت الصدي لينا ربي ايخليك يا رب . ثانى موقع خشيتله موقع ليبيا وطننا كالعادة لقيت مجموعة متكررة من الكتاب ( وامارير وحكيم و السلاطة الثانية والخراوات الثانيين اللى عاملين فيها شيوخ وفقهاء هذاكا الكلام الفارغ اللي ديما انشوفو فيه) على العموم من كل ها الاسامى فيه اسم يعرفوه الليبيين مزبوط مزبوط ومعروف تاريخه وما ينغسل تاريخه بمياه الارض جميعا ( فطبع على قلوبهم فهم لايفقهون ) قلت خلى انخش و نقرا شنو يكتب ( والله العظيم ماعمرت قريت مقال ليه واعتقد انكم مثلى ) لقيته مداير مقال عن الجوع و ما ادراك ما الجوع ( طبعا انا جعان الوقت هذاك)
http://www.libya-watanona.com/adab/mzaidi/mz17109a.htm

قعدت نقرا فى المقال و قعد العرق ايصب منى وبصراحة خفت يا جماعة الخير حسب كلام التكتور الزايدي ( من كل اثنين فى العالم واحد منهم جعان !!! وواحد شبعان ؟!!! اشارة استفهام من هنا الى تكساس ؟؟؟؟؟؟؟؟ وبعدها علامة تعجب كبيرة ! على العموم راجعو المقال يا اوخييني اهو الرابط هلى يبي يستفيد من تكتورنا الزايدي زعمه التكتور جعان زيي؟ زعمه حتى هو روح للحوش و لقيها مبكبكة حفيانة ؟زعمة احنا الزوز من الجماعة الجعانين اللى ذكرهم التركتور ....عفوا قصدى الدكتو ر؟ فالطة كبيرة كنهذا ؟ لوحت هذاك الكمبيوتر ومشيت نجرى جرى خديت الصونية متاع المبكبكة وخشيت لدار النوم لقيت المراة اتخيط فى سورية الولد( متعارك مع هشام وخوته ولد جارنا حمد و مشركله بطم السورية لكن ولدي حصل فيه تيستة على الدماغ باهية ) جيتها وطول بوسة على الراس وكلمة سامحينى يا ام صغارى سامحينى معرفتش قيمتك الا بعد ما قريت مقال الهايك عن الجوع ( جوعنى الكل... التكملة ثانى حرف فى الابجدية العربية) والمراة تشبحلى و مستغربة ؟ واتقول فى خاطرها خير دعوته ؟ لكن تعرفو يا جماعة الخير اسهل حاجة لما اترضي بنات حواء حنينات هلبة ....قلبهن ارهيف وحتى انا بصراحة فالح . لكن ياجماعة الخير زعمه الدكتور ما اتعشاش ؟ زعم التكتور جعان ؟ يا دكتور اللقمة الحلال اتشبع و اللقمة الحرام تقعد غصة فى رقبة صاحبها طول عمره ( اولئك الذين استحبو الضلالة عن الهدي) يا دكتور انت انسان غير مرغوب فيك ..... اسف على الكلام هذا لكن هذى الحقيقة ...
بنتى ياسمين قالتلى تبي اخت اسمها ......... امل
تصبحو على خير
يتبع ...... الحلقة القادمة
الخوجة وخنافيس البيتلز

بحر الدموع
طرابلس ـ الهضبة الشرقية


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home