Libya: News and Views      LibyaNet.Com      Libyan music      Libya: Our Home

send

الأثنين 13 يوليو 2009

previous letter                 next letter                 list of all letters

3 مليون وتراب و 7000 عائلة متسولة.. قبل العيد الصغيرة

اولا حني ديمة نفترضوا حسن النوايا .... لكن لو كان موجود في ناس ... فانه معكوس عند هلبة ناس حني نعرفوهم كويس ... طبعا شي ايجابي و كويس انه يكون فيه هكي مواضيع للشباب.... اصلا الشاب عندنا في شنو يفكر ... لكن فيه كلام لازم ينقال ... خاصة بعد ما شفنا من تجارب فاشلة ... و السبب فيها يرجعه للاشخاص نفسهم ... يعني ذات البطانة اصلحها الله ... المهم .... فيه ملاحظة غريبة شوية في الخبر المذكور ... اني ماش عارف كيف خطمت هكي من غير احم ولا تستور ... و كاننا لم نعد نصدق شنو يكتب ... والا عندنا حكم مسبق انه كلام فارغ ... القصة وما فيها .... اني قريت خبر عنوانه مية وخمسين الف حاسوب .... وفي مضمونه.
مية الف حاسوب ... كيف جت هادي ... الاجهزة نقصت من العنوان لنص الخبر ... هادي بدياتها هكي ... مزال ما جوش و خدوا الحبايب و الاصحاب و البزناسة حصتهم ... لكن عادي خلينا متفائلين و مؤدبين على قولة صاحبنا هذاك ... على خاطر الموضوع مش حاجة كبيرة ... حق الكلبيوتر اليوم في حدود 400 دينار .... لو قلنا جملة و حاجة باهية مع بايات الجماعة ... يعني الجعجعة كلها على بعضها في حدود تلاتة مليون .... لا شي ... ما تجيش حتى راس مال للمشاريع الصغرى متع اولاد القطاطيس ( مع احترامي للقطاطيس) ... المهم حني بتوزيع الاجهزة بالطريقة الفوضوية نفسها ... طريقة الجمعية ... جيب كتيب ويختمولك ... وبعدين بيعه برا ... كلام فارغ تعبنا منه ... لا يغرس في الشاب الا الاتكالية ... و الفالحين و الروبنجية واتين بالمرصاد للمواضيع هادي ... حني نبوا نمسحوا الامية حسب ما ورد ... فيه طرق اخرى ... اعطيه كلبيوتر ... وخلي يدبر في راسه ... مش عندنا تجار ... علاش يجيب تاجر واحد .... علاش ما نشجعوش القطاع الخاص ... علاش ما نوزعش العطاء على عدد كبير من اصحاب المكاتب الصغيرة ... الموضوع ما يستهلش كله ثلاثة مليون ... مش مهم لكن اعطيهم بمبلغ و لو رمزي باش ما تزرعش في الناس الاتكالية ... اصبحت اليوم ثقافة سائدة.
نجوا للنقطة الثانية ... التراب ... مشاريع النجيلة وسيدي السايح ... هادي اولا ملك الدولة الليبية ... لا قدرت تزرع فيها والا قدرت تدير فيها شي .... واحسن شي يندار فيها مشروع بالشكل هذا ... لان الحكاية بدت تفدد تقول رزق بوهم ... وينك يا معسكر والا ارض دولة يجوا يقسموها شوراع ويبيعوها للغلابة ... والا يعطوها لشركة اجنبية برخص التراب ... لكن قبل كل شي ... فيه نقاط لزم تؤخد بالاعتبار ... اولا حني نبوا نوطنوا سبعة الاف اسرة في هذه المناطق ... الي حوليها كله بناء مخالف وغير مخطط و العذر للمواطنين ... لقوها حايسة ما يجيش حد يواخدهم والا يطيح على روسهم شقا عمرهم بعدين تولي حاجة خارج نطاق السيطرة ..... المهم ... المناطق هادي مفيهاش مراكز حضارية و مراكز خدمات ... يعني سكانها بالسيف عليهم كل يوم يديروا مسير من و الى وسط العاصمة ... ومشاء الله الطرق عالكيف هي هكي وخلاص الواحد معش يقدر ...الشي الاخر حني مفكرناش لا في مواد بناء و مدى توفرها ... ولا في العمال ... و لا الاسرة الي رح تقبع في تلك الضواحي الخالية من مظاهر الحضارة ... سوف نكون جيل من الاسر الفقيرة ... بدون اي تخطيط .... وحني مش عارفين كيف المصرف بيسلفهم ...ولا كيف الالية التي سوف يتم بناء عليها تحديد المستحقين ... ومن وين بيجبوا حق الربي ....خلطة بيصة خاشة بعضها .... اسكن جيب صغار و اقعد عيط ... عندك حق الدولة سكناتك و اعطاتك كل شي ... مفروض تصرف عليك ... و بالمناسبة اطالب ان يتم منح الشباب فتيات للزواج ... وننصح بالتعاقد مع بعض دول الاتحاد السوفيتي السابق.
و اخيرا فيه سؤال محير ... الي هو كيف تمنح هادي المبالغ ... ومن وين اذا كان حني دخلنا في حدود 40 مليار بس ... ومن بيصرف ... و شنو الغطاء القانوني ... والا هي عملية عناد ... على اي حال الموضوع فيه ايجابيات لحد ما ... لكن المفترض التخطيط الصحيح ... حني شنو ضيعنا غير الفوضى ... وكل شي في مرة وحدة ... وكان فيه حد يعرف شنو الوراقي الي يبوهم ... وعنده حد يتمنا بريت تقولولي عندي مجموعة ملفات نبي نتملهم.

الباش مهندس
libyanvip@yahoo.com
http://www.libyanvip.blogspot.com



previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home