Libya: News and Views      LibyaNet.Com      Libyan music      Libya: Our Home

send

الثلاثاء 13 يوليو 2010

previous letter                 next letter                 list of all letters

هنا العظمى!

مازلت نا هو نا يا دكتور فرج 6.. ما درت حوش ولا لقيت مرا.. نموت خيرلي
مازلت نا عزّابي..
مازلت نرجا في القروض وعابي
ومازلت تحت الحيط نا واصحابي.. لا بيع بعنا ولا هناك شرا
ويا صاحبي بالحال مانك غابي..تمت علينا جايزه الزكا
(امنورين يا شباب البالتوك).

هل يمكن لنظام يهاب فيه رئيس الوزراء "قائد ثورة" ولا يأبه لغياب القانون أن ينجح؟ في خطاب للعقيد معمر القذافي قال فيه بما معناه أن بعض الرؤساء الافارقة معجبين بالتقدم الحضاري في ليبيا ويفتخرون بانجازات ثورة الفاتح.

وعلى سبيل المثال وعند رؤيتهم لمبنى "برج الفاتح" في طرابلس، يعربون عن امنياتهم بأن تقوم "الجماهيرية" ببناء أبراج الفاتح في دولهم الافريقية!!!!! ماذا لو رأوا دبي أو أبوظبي؟

صدر بيان في كوتونو عاصمة بنين عن رئاسة الجمهورية هناك خلاصته أن الرئيس ياي بوني قد تحصل على موافقة العقيد معمر القذافي بخصوص الآتي:

- ليبيا تتعهد باعادة تأهيل فندق نجمة الجنوب في كوتونو وستستثمر مبلغ 3 مليارات فرنك افريقي في هذا المشروع. - سيقوم الطرف الليبي (؟؟) بشراء قطعة أرض من الهيئة البنينية السابقة (لماذا سابقة؟) للضمان الاجتماعي بقيمة 5 مليار فرنك افريقي لاقامة فندق 5 نجوم عليها بتكلفة ستصل الى 30 مليار فرنك أفريقي.

- تتعهد ليبيا ببناء حوالي 70 فيلا رئاسية فخمة على قطعة أرض فندق الشيراتون سابقا التي اشتراها الطرف الليبي (؟؟) بمبلغ 25 مليار فرنك أفريقي.

- تتعهد ليبيا ببناء مخازن للمنتجات النفطية بقيمة 15 مليار فرنك أفريقي (لماذا مخازن للنفط هناك؟ العلم عند الله وعند الشعب الليبي صاحب الثروة والسلطة وليس عند جهات اجنبية! ها ها ها ها).

- أعرب العقيد القذافي للرئيس البنيني عن رغبة بلاده (؟؟) في تنمية زراعة الارز في بنين على مساحة 100 ألف هكتار في اودية اويمي وفي مونو من أجل خلق فرص العمل للشباب البنيني ومضاعفة ايرادات البلاد.

لا حول ولا قوة الا بالله. حسبنا الله ونعم الوكيل. فعن أي اصلاح تتكلمون يا سادة؟ اعفونا من محاضرة "فوائد الاستثمار في الخارج" ارجوكم.. وخللو التبن امغطي شعيره. الشباب الليبي في ليبيا محتاج لفلوس بلاده في بلاده!

توفير فرص عمل للشباب في جمهورية بنين أهم من توفير فرص العمل للشباب في البطنان وطرابلس والزاوية وبنغازي وسوسة؟ كيف ينجح الاصلاح واموال الشعب الليبي تهرّب الى الخارج يوميا؟

ام هل يكفي الشباب الليبي رفع شعار "معا من أجل ليبيا الغد"؟ ليبيا الغد المفلسة؟ ام ليبيا الغد امتاعة المجاري المكسرة؟ ام ليبيا الغد امتاعة المستشفيات المنهارة؟ ام ليبيا الغد امتاعة المدارس اللي بدون دورات مياه وبدون شبابيك وبيبان؟ والا معا من اجل ليبيا الغد اللي قسمها الثوريين الى كومونات براريك زينقو؟ والا ليبيا الغد اللى حيستمر فيها تصكير فم الليبي بعد تكسير سنونه لو انتقد أي "قذافي" ولو نقد ايجابي؟

ارحب بكل الخطوات الجادة في الاتجاه الصحيح ومن اجل اخراج ليبيا من هذا الكابوس الذي اكل الاخضر واليابس، لكن ما اراه واسمعه على ارض الواقع اليوم في ليبيا لايمكن اطلاق "اصلاح" عليه.. لأن كل خطوة اصلاحية تحصل يكون قد تم الاتفاق على ان تتبعها خطوتين او ثلاثة الى الوراء تلغي تلك الخطوة الاصلاحية.. يكفي ذرا للرماد في العيون يا سادة.

لماذا لا يبني ذلك الفندق على التراب الليبي، بالقرب من طلميته او شحات او لبده وصبراته؟ لماذا نبني خزانات بترول في بنين وعندنا مئات الالاف من الليبيين في ليبيا يقطّر عليهم سقف الزينقو في درنه والعجيلات والمرج وفي قمينس وفي تاجورا وفي الزنتان؟ وعندنا في ليبيا شباب ليبي في الثلاثينات من العمر ولا يتكلم أي لغة اجنبية.

أنا متأكد تمام التأكد من أن جواب أعضاء حزمة الكرناف الثورية هو كالآتي: والله الشعب الليبي قرر أنه يستثمر امواله في مشاريع في أفريقيا!

علي اليمين كذابين!

الشعب الليبي والله ما يبي هالصحبه مع افريقيا والافريقيين اللي قاعدين يلهفو في رزق الشعب الليبي بموافقة القيادة وبنأ على رغبة القيادة وبأوامر من القيادة وتسهيلات من القيادة.

كذاب اللي يقوللي أن فيه مواطن درناوي شريف وافق أن ليبيا تبني محطة بنزينه في مالي بدلا عن مدرسة ابتدائية في درنه.

وكذاب اللي يقول انه فيه مواطن من بنغازي وافق ان ليبيا تبني هوتيل في جمهورية بنين بدلا عن انشاء محطة لتحلية المياه في بنغازي.

وكذاب اللي يقول انه فيه مواطن مصراتي شريف قال/ اوكي افتحو مستشفي في النيجر وتمشي مصراته في ستين داهيه.

ويكذب اللي يقول انه فيه مواطن سبهاوي شريف وافق ان ليبيا تصلّح جردينة قصر رئيس بلاد الواك واك بفلوس السبهاويين وسبها مدينة "الشرارة الاولى" مافيهاش شارع واحد نظيف.

ما هذة الثورة؟ ما هذا الاصلاح؟ من الذي قرر من البداية حرمان الشعب الليبي من ارزاقه؟

كيف اصلاح؟ والاخ قائد الثورة بنفسه قاعد يخيّر في الليبيين بين الكهرباء وبين الصحة.. بين التعليم وبين الزراعة.. انكان تريدو مجاري معناها انسو التعليم.. وانكان اتريدو تصليح شبكة الكهرباء العطيبة معناها السنة هادي ما فيش صحة ودواء.. وانكان اتريدو دعم المكرونة والطماطم معناها انسو السكن!! الفليسات على داب الحال. لكن على داب حال من؟

كيف يا سبحان الله؟ هادي دولة شنى؟ شنو نظام الطروح الفاضية هادا؟ ونظرية شني وعلم اقتصاد وتخطيط شني؟ هذا تخبيل مش تخطيط!

بالله عليكم فيه برلمان ناس محترمين ودولة محترمة ايخش عليهم الرئيس ويقولولهم اذا كان بتديرو مشاريع اسكان معناها لازم تلغو مشاريع الصحة؟

فيه نواب شعب ووزراء أو امناء دايرين روحهم يفهمو في الوطنية ومصلحة الشعب يسمعو كلام زي هادا من السيد الرئيس او القائد وما فيهمش ولا واحد تكلم ولا رفع صوته وقال / لا يا سيد يا قايد! لا يا سيادة الرئيس او القائد، احنا الليبيين بلادنا غنية وبعد كل هذا الحرمان الثوري لينا الحق اليوم في الصحة والسكن والتعليم والمواصلات والكهرباء ومعادش راضيين بالحياة بالتقسيط! ومش موافقين على الاستثمار في افريقيا ونبّو نستثمرو عقاب قريشاتنا في اجدابيا وفي زواره وفي غريان وفي بنغازي وفي طرابلس وغات وجادو.. مش في مجاهل افريقيا، ولو زاد\ علينا الخير احنا مش بخلاء. بالله عليكم، ليش ما فيش ولا امين مؤتمر شعبي واحد قال ليش حطيتو فلان في وزارة كذا؟ وليش ما فيش ولا امين مؤتمر شعبي واحد سأل رئيس مؤتمر الشعب العام/ ما هي الجهة أو الشخص الذي صعّد فلان الفلاني وسلّمه حقيبة وزارة المالية مثلا؟

لكن من ناحية ثانية فيه ناس هلبه من النواب عن الشعب مساكين ما يعرفوش شني هي الحياة البرلمانية المزبوطة.. كل اللى يعرفوه هو كلام القايد وديمومة الكراسي للثوريين والاستماع لترهات اللجنة الحاكمة لمؤتمر الشعب العام ومافيش حد يرفع صوته فوق صوت عضو في اللجان الثورية.. وهادي هي مشكلة من مشاكل هذا الحل البديع الذي حوّل حوالي 5 ملايين ونصف مواطن في دولة نفطية الى افقر شعوب العالم ماديا وثقافيا.

ويستمر الاعلام الثوري البديع في ليبيا في تزييف الحقائق وفي الاشادة بانجازات ثورة الفاتح والتغني بمسرحية "سلاطة الشعب"!

برجاء الانتباه للسؤال التالي/ لماذا وحتى الآن لم تطالب أي دولة او اي شعب بتطبيق النظرية ومقولات الكتاب الأخضر وسنة قايد باشا و"سلطة الشعب" والنظام الجماهيري؟

هل سمعتم عن اي حزب سياسي او تكتل شعبي او دولة تبنّت افكار النظرية العالمية الثالثة وتصر على تطبيقها؟ الجواب كما يفرضه الواقع علينا هو / لا لم يحدث لأن نظام " سلطة الشعب" البديع مات في مهده وقتلته الانانية الثورية ولم ينجح في ليبيا لأنه يقدم حلول "دوام السلطة للقائد" فقط، فكيف ينجح في غيرها وتاريخه ملئ بالانتهاكات والفشل والمآسي والاختلاسات والقتل والتدمير والهرولة فوق اجساد اطفال مرض الايدز و"الاستثمار" خارج حدود ليبيا؟

لم يطالب ولا شعب واحد بتطبيق سلطة الشعب حتى بعد صرف تلك المبالغ المهولة من خزينة الشعب الليبي الجائع على تسويق ما يسمى ب "حكم الشعب" وترجمة الكتاب الأخضر الى كل لغات العالم وعلي حساب بيت مال الشعب الليبي.

حكم أو سلطة الشعب في ليبيا اليوم يسير حسب هوى من اخترع "سلطة الشعب" وليس حسب تطلعات الشعب الليبي!

لكي "تنجح" سلطة الشعب في اي بلد آخر كما "نجحت؟" في ليبيا اليوم، لابد من قيام ثورة في ذلك البلد ولابد للثورة من أن يكون لها "قائد" تصبح تحريضاته ومداخلاته دستورا يسيّر امور دولة "سلطة الشعب". ففي بريطانيا مثلا ان اراد الانجليز ( اولئك الجهلة الذين لا يفقهون شيئا من امور الديمقراطية وحتى كاتبهم الكبير ومفخرة ادبهم وثقافتهم شكسبير اتضخ انه مش شيخ وبس بل وزبير كذلك)، ان اراد الانجليز اعتماد سلطة الشعب كحل لمسألة الحكم الملكي "المتعفن" لابد من قيام ثورة ولابد من خروج المسيرات في شوارع لندن وليفربول ومانشستر وسوانزي وبرايتون وغيرها وأن يخرج من بين الانجليز "قائد" للثورة، لأن التجربة الثورية الليبية في الحكم تقول ويوميا أنه لابد من قائد يقود مركبة سلطة الشعب.. ولابد للثوريين البريطانيين من القضاء على الافكار الرجعية لطلبة اكسفورد وكمبريدج وباقي الجامعات البريطانية.. ولابد من القضاء على اذاعة البي بي سي الرجعية وتحويلها الي بوقا للثورة ولابد من تسليم مفتاح بنك انجلترا المركزي لقائد الثورة .. ولابد من رص كم الف بريطاني في الضويقه.. ويفضل شنق بعض المواطنين في ميدان البيكاديللي او في سوهو..و.. ولابد من تحويل قصر باكنجهام الى قاعة مؤتمرات.. حتى يستمر الكفاح الثوري وينتصر الشعب الانجليزي على رجعيته ويتحرر كما تحرر الشعب الليبي!! بالله عليكم هادا كلام ايصير منه؟

قيام "سلطة الشعب " في اي دولة يتطلب قيام ثورة. النظام المسمى ب "سلطة الشعب" يرتكز على افكار فرد واحد وتحريضات الزعيم والقائد الواحد الاحد.. لكن ماذا تفعل الشعوب التى ليس بينها "قائد"؟

كلنا بشر وسنرحل عن هذة الحياة الدنيا في الموعد الذي حدده لنا الخالق.

ماذا سيحدث لسلطة الشعب بعد انتهاء العمر الافتراضي لقائد الثورة؟ من سيحرّض؟ من سيتدخل؟ من سيقرر؟ من سيشيد؟ من سيعرب عن..؟ من سيحاضر؟ من سيعلن؟ من سيصعد الوزراء؟ من ومن ومن ومن ومن؟

في وسط مدينة طبرق فيه حفره كبيره كل الناس تاعبين منها.. اجتمعت كل انواع اللجان الشعبية والثورية وناقشوا مشكلة الحفره من كل تراكينها وقرروا حل مشكلة الحفره الملعونه.

اليكم توصيات مؤتمر شعبية البطنان بالخصوص/ نوصي ببناء عيادة اسعافات اولية في جنب الحفره...

مدريد 85



previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home