Libya: News and Views      LibyaNet.Com      Libyan music      Libya: Our Home

send

الثلاثاء 13 يناير 2009

previous letter                 next letter                 list of all letters

الإخوان المسلمين وبيان سيف الأخير

عمكم الحاج يمسيكم بالخير

لاحظوا انه ما ان يصدر بيان لجمعية سيف القذافي الا ويبدأ السباق بين المواقع المرتبطة به لنشره والانفراد به (الاخوان اليوم – اخبار سيف ) اقصد ليبيا اليوم واخبار ليبيا، بالاضافة الى مواقع التطبيل في الداخل.

اخر عفسات موقع الاخوان المسلمين اللي يسموه زورا ليبيا اليوم هو بيان جمعية سيف الاخير.

كنت اتصفح المواقع الليبية فاستعذت بالله من الامن الخارجي ودخلت على موقع اخبار ليبيا المتخصص في اخبار سيف فلقيت اول ما تدخل على الموقع وتستفتح تلقى عمك نعمان حاط البيان فوووق .. يعني ضروري تشبحه. وبعدها خديت سبحتي وصليت ركعتين ومشيت بعون الله وبمشيئة الله والحمد لله والله اكبر الى موقع الاخوان المسلمين او ليبيا اليوم فقلت بسم الله وفتحت عيوني لقيت هذه الصورة:

ولفتت انتباهي كلمة خاص بالعربي وحتى بالنقليزي كمان .. خاص مرة وحدة .. استغربت وقلت خاص هذي وين يصرفوها .. والبيان ممكن حتى صحيفة الزحف الاخضر اللي يجددوا في موقعها مرة في العام قريب نشره. قلت بالك الحاجة كثرت من السكر في طويسة الشاهي وعمكم الحاج عنده الضغط وعويناته آه ما هه .. المهم خشيت على الخبر .. شوي لقيت خبر .. نفس الطابيلة متاع الخاص :

شوي عمكم الحاج قال خلينا ننبهوا الجماعة بالك التصحيح مازال ما جا من القاهرة من عمك مهدي عاكف رضي الله عنه، فكتبت لهم ملاحظة خفيفة ظريفة للتنبيه وقلت لهم يا اخوة البيان منشور ولا هو خاص ولا هو من التنظيم الخاص متاع اخوان مصر ايام الاغتيالات.

المهم رجعت للصفحة لاكثر من مرة بعد ايام ومالقيتش تعليقي، وقلت واو الباين ان التعليقات ضروري تمر على مكتب الارشاد في قاهرة المعز. لكن يبدو ان فضيلة المراقب .. قصدي مراقب التعليقات مش مراقب الاخوان .. منع تعليقي وغيّر طابيلة الخاص الى شعار سيف الخيري بدون احم ولا تستور ولا تنويه ولا تنبيه .. وسلملي على المهنية الاخوانية .. وهذي صورة الخبر بعد تنبيه عمكم الحاج ..

علاء ماضي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home