Libya: News and Views      LibyaNet.Com      Libyan music      Libya: Our Home

send

الخميس 13 أغسطس 2009

previous letter                 next letter                 list of all letters

خبر جمعـية الجالية الليبية فى مانشستر

المرة الأولى حكيتلكم على قصة وليدى وجمعية الجالية الليبية فى مانشستر الى قالوا دارو الاجتماع الشهرى لسبوع الفايت. وبعد الصلاة على النبى صلى الله عليه وسلم تو بنقول لكم ايش الى صار. عمكم الحاج شعيب صبر تقريبا 4 ولا 5 ايام وكل يوم انخش زى العادة نقلب فى الانترنت بالك نلقى شىء عن الاجتماع اهو الواحد يلقى حاجه واتيه خير من النشده لكن ما فيش فايده ما هناك شىء نزل فى الانترنت. قلت هيا امرى لله نمشى ننشد وخلاص قلت للولد تره ابرملى على الشقفه السيارة ونظملها امورها قالى يا بوى خيرك املا تبى تتبعد فى السفر هل المرة قلت له لالا لكن عندى دوره كبيرة على اكثر من مكان. المهم اليوم الصبح بعد ما دارتلى العجوز عبود زميطه وطاسة شاهى وفطرت قلت هيا خلى نطّق فى الحاج مراجع هو الأول عارفه بيتشمت فيا لكن الراجل صاحبى نتحمل الى بيقوله . يا سيدى مشيت له واول ما شافنى قالى جيت يا حويج عارفك تشمشم فى الأخبار وانا ما عندى ليك تفاصيل لكن المهم طلع كلامى صحيح قلت لك الجمعية باريه على العياب ومصدقتش وجانى خبر الاجتماع رغم انى ما حضرتش وبيش تصدق انا ندلك على شخص حضر معاهم الاجتماع قلت له بالله عليك من هو وبسرعة قالى خيرك مستعجل توا نشربو طاسة شاهى والحاجة اديرلنا لقمة عصيد ونمشوله مع بعض حتى انا ما شفتاش من زمان قلت له انا والله الا فاطر هيا نمشوا نشربوا الشاهى مع صاحبك .
المهم مشينا للحاج خيرالله الحقيقه تفضل بينا وبدينا عاد فى التقصقيص لين وصلنا للجمعية الحاج خيرالله قال يا جماعة والله مانى عارف جماعة الجمعية شن يبوا منا مشينا للاجتماع المهم جوا حوالى عشرة انفار ولا اكثر شويه وجماعة الادارة لقيناهم جايبين شوى شاهى وقهوة وكل واحد يهدرز مع صاحبه قعدنا شويه نراجى شنو فيه من برامج جديده ولا كان فيه حاجه اناقشوها ولا جدول اعمال لكن الكارثه ما لقينا شىء ولا واحد فهمنا على حاجه. المهم الحاج خير الله الحق جابلنا صونية دشيشه شعير ضربناه وطلعت انا وصاحبى مراجع وقلت له يا حاج صاحبك شكله زيك ما يحبش الجمعية انا نبى نزيد انقصقص قالى ردنى لحوشى ودير عرفك المهم قلت اليوم نبى نمشى نصلى فى مسجد النور توى نلقى هلبه جماعة غادى المهم مشيت صليت العصر وبعدها وانا قاعد قدام الجامع نراجى بالك نلقى واحد نعرفه نسمع فى جماعه حامقين ويتكلموا على الجمعية واحد منهم يا ودى شكله والع هلبه يهدر بصوت عالى نسمع فيه يقول جماعة الجمعية ما يتحشموش على وجوهم يضحكوا علينا ويقولولنا اجتماع وما اجتماع ونحسابوا بنلقوا فايده لكن تاريته الدوة كلها هدرزة ولقّنى زايد يحسابونا ما عندنا ما انديروا كيفهم. رد عليه واحد اخر قال تعرف شكلهم محصلين نصيب فليسات من البلدية ويبوا يدبرو وين يصرفوهم ولا اهو يغطوا الموضوع بشوية فواتير. يرد عليه واحد اخر والواحد الله قاله اسمع هدوما يضحكوا على انفسهم مش علينا والله الا عارفين زقاطتهم والى ما زال يمشى ليهم يقصوله رجله. بصراحة ما طاقنيش الصبر خشيت فى الهدرزه وقلت لهم اسمعوا انا من بكرى وانا نسمع فيكم تتكلموا على الجمعيه وبصراحة ليش انتم صابرين عليها الى هالوقت مادام انتم عارفينهم ما يديروا فى شىء رد عليا واحد منهم قالى ياحاج احنا متحشمين منهم ومخلينهم يرتعوا بحملهم كيف ما يبوا ومن اليوم الأول عارفينها الجمعية مش صاير منها اتى والله العظيم هما جماعة الادارة الى انتخبناهم الا زى حزمة الكرناف فيهم الى من نهار انتخبناه ما يعلم بالجمعية الى اليوم ولا حضرلها اجتماع المهم نبى نغير الدوه لأن الجمعية خلاص سادنا من الدوة عليها وتأكدت انها ما فيهاش فايدة ولا بدير فايده فى المستقبل وقبل ما نتكلم على موضوع اخر تدخل شخص شكله يسمع فينا من بعيد قال يا جماعة سكروا هالموضوع الجمعية راهى فى غرفة العناية المركزه وقريب تسمعوا بها ماتت وان شاء الله يلقوا من يدفنها والخوف غير تدفنها البلدية وما يندارلهاش عزاء. ضحكنا كلنا وبيش نغير الموضوع قلت لهم يا جماعة بالله نبى ننشدكم على نادى البارونى الى طالعنا فى مانشستر ومرة مرة نلقاهم دايرين نشاط والله تبوا الحق انا ولدى قالى يا بوى نبى نخش فيه قلت له لا فكنا منه والحق أنا مشّوب منه مش عارف شنوا موضوعه ومنو فيه وجماعته هدوما منين يجيبوا فى الفلوس زعم من البلديه ولا من الحكومه ولا من مكان اخر؟ راهو الأمر قاعد غامض وهذا الى مخلينى مش قادر نبعث ولدى غادى قالى واحد من الجماعة ناس هلبه راهم دايخين زيك تبوا الحق الواحد لا يقدر يدم لا يشكر!!!! لكن نبى نقصقص عليه وما نقدرش نصبر لابد نجيب الخبر الصحيح وعلى العموم ماهناكش شىء يدرق هاليام. قالى واحد من الجماعة انت خيرك يا حاج ماك راضى على حد لا الى يخدم لا الى ما يخدمش فلت له انا والله الا واجعنى حال الليبيين فى مانشستر ويا ودى فى بريطانيا كلها خيرهم زى ما قال واحد ((حزمة كرناف)) وانا نشوف فى الجاليات الأخرى تخدم فى بعضها ويحبوا بعضهم واحنا ما فينا غير الكره والبغض والتقطيع.
المهم توا تبقوا على خير وبعدين نتلاقوا ان شاء الله خلونى توا نكمل دورتى ونصلى المغرب فى دزبرى بالك نلقى اخبار غادى. ايه انا ناسى حاجة اخرى من زمان سمعت بها . قالوا جمعية المهاجرين ولا مش عارف شنوا مش حتى هى أعلنوا عليها من زمان؟ رد عليا الحاج معيتيق قالى مقدمك يا حاج هاديك ماتت فى بطن امها قبل الولاده. قلت له انا لله وانا اليه راجعون ليش ما قلت لنا راهوا مشينا عزينا. ودعت الجماعة وركبت خرخاشتى ومشيت ونتلاقوا على خير بعون الله وقوته يا جماعه وشورنى كثرت عليكم سامحونى بالله عليكم.

الحاج شعيب
مانشستر / بريطانيا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home