Libya: News and Views      LibyaNet.Com      Libyan music      Libya: Our Home

send

الجمعة 13 أغسطس 2010

previous letter                 next letter                 list of all letters

من عوج ليام بوالعشة معارض

السلام عليكم
قريت مقال للسيد فرج بو العشة عن امكانية ان يكون السيد جمال الحاجي أحد مخبري أجهزة الدولة الأمنية وانا هنا لا أدافع أو ألغي الفكرة عن السيد جمال فقد عودتنا الأجهزة الأمنية على مثل هذه الحالات وإن كنت أتوسم فيه الخير ما أردت قوله للسيد بو العشة أن الجمل ما ينظرش لعوج رقبته فكل ما قلته عن السيد جمال الحاجي مردود عليك فمن أنت يا بوالعشة لتقيّم جمال الحاجي أو غيره خلينا الأول ننسى زمزكتك لوله وكرك للحبل في جريدة الزحف الأخضر وبعدين ساهل ناخذوا كلامك وإلا انخلوه هذي قضبة ثانية ويا خوفي أنت اللي تطلع فيها مخبر لأنه أنت كيف ما قلت على الحاجي مازلت تمرح فيها وما جا شورك حد .
بعدين ما اتقول لي أنت طاريلك مطرى "الشخاخ اللي يبي يرقد في النص " مو عاجبك حد والكل امقصر مع القضية ، فحضرتكم المثقف الوحيد اللي يفهم في كل شي والحلول كلها عندك واللي ما يجيش على فاهقك حيه عليه وحيه ..القلم مبري والنت مفتوح .
شخصياً ممكن تمرق عليا قصة المعارضين اللي يحاولوا يمسكوا العصا من النص، فالحقيقة أن الأضاع قد تغيرت نوعاً ما ، طبعا للأفضل يعني بعض ما كانوا معارضينه "معدش منّه " ، لكن اللي نا مش فاهمة أن سي بوالعشة أيام وهي واكلة بعضها والدنيا تطبخ هنا في ليبيا كان من أكبر الزمامير في جريدة الزحف وكان على قول الجماعة دمّه خضر ، هضا أيام التشنيق في الجامعات والتشنيق في شهر رمضان وأيام ما كان الثوريون يطّوطحوا مع المشانيق ويهتفوا نبوا شنقا في الميدان .وأيام البوابات والتجنيد الإجباري وحرب تشاد وشركة التسويق الزراعي وشركة التسويق المحلي ...الخلاصة أيام دراه الكبد. هذك ليام كان بوالعشة زايط فيها مع مجلة شهرزاد في قبرص وما يندري على ليبيا وين تفتح ... ولما جماعة الإعلام كلاهم الحسد من يالا بوالعشة وما يلهطه وبالدولار من الدفنقي اللي يكتب فيه جاته الدفرة وسكّروا له المجلة واسكرطوه شنكه بره .
بقدرة قادر تحول بوالعشة من مناظر للثورة إلى معارض لها والداهية مش هنا الداهية انه يبينا نفهموا أنه في كل الأحوال عنده حق ولازم انتبعوا كلامه أيام وهو ثوري وتوا وهو معارض والأدهى والأمرّ يبي روحه رايس ويبي يقعد بوها كيالها . يا راجل كان اللي صار امعاك العكس راني قلت أنك شفت الأمور بدت تصلّح وما فيش باس كان دكيت راسك مع الريشي وبويصير والخوجة ودوغة وبقية الأسماء .. لكن اتسيبها أيام اللمط وتتفكرها بعد ما سكّروا عليك الجعبة هذا ايخلينا انقولوا أن العملية كلها مصالح في مصالح .
يا سي فرج تره والنبي ما ريّحت اعضامك وهنّيت روحك وقمعزت بعيد وخليك متفرج بس ... يا اخي احترم عقول من تكتب لهم وردّ بالك اتقول أنك كنت صغير في السن أو كنت فاهم غلط أو كان مغرر بك أيام ما كنت امنبح ريقك وتضرب في السما بالبوني وتهتف للي توا اتسب فيهم وبلاش العبط امتاع المصاروة رهوا الكل امورّق بيك وبالدنفيرة اللي امعاك .
وحط في بالك انك أنت آخر من يتكلم عن ليبيا ومشاكلها وشكل الإصلاح فيها رهوا النجع ما زال ما صارت له خلوة نت.

عز الدين


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home