Libya: News and Views      LibyaNet.Com      Libyan music      Libya: Our Home

send

الثلاثاء 12 اكتوبر 2010

previous letter                 next letter                 list of all letters

قرأت لك :
ثقافة شعب وليس أخطاء دولة تدوينة بالعامية

ثقافة شعب وليس أخطاء دولة تدوينة بالعامية

مدونة "تلقيحة" :

http://16.com.ly/index.php/2010/10/culture-of-a-nation/

أمس عندي ولد أختي مرض شوية ، وتعب وصارله ضيق في التنفس ، فأضطريط أني نمشي من حوشنا لحوش اختي باش نرفعه للطبي انعاينه ، وهذا شئ مفروغ منه ، بس سبب التدوينة ، أنه علاش لما تشوف حد مخنون ، وفاتحلك ( الفليتشات الأربعة ) ويداعك علي الطريق وفاتح الضي الطويل وكلاكسات ، وواضح انه عنده حالة مرض أو شئ ضروري ، علاش متخليلاش الطريق ؟

هل هو مرض نفسي باش اتطلع روحك سواق ؟ هل أحني الليبيين معادش عندنا حنية علي بعض ؟ تي شني هذا يا ناس والله العظيم الطريق ناخذ فيها بالسيف وبالعافية ، قصدي اني مش من مناصري السرعة في الطريق ، ولا اني نبي اندير روحي مخلوع او شئ ، بس صعبة عليا ولد اختي 3 سنين و9 شهور انشوفه قدامي مش قادر يتنفس وبنمشي بالشوية ، أو بمعنى أصح نقتل علي خاطره أي شخص ، بما انه من دمي ، يعني في اللحظة الي طلعت فيها منشوفش في حد قدامي صح ، بس في نفس الوقت يا ناس حد عنده حالة خلوله الطريق ، تي والله المرور بارك الله فيه يشوف فيا انداعك في السيمافروا الي قبل جامعة الفاتح طلعني في الاحمر ، أصلا واضح حد مستعجل عنده حاجة من واحد مكسد ومعنده شئ ، عموماً والله العظيم من أمس علي أعصابي أني في الموضوع اهوة ، خليك عاد من النظام الي في مستشفى الطبي ، اتشوف الزحمة مرافقين مع مرضى مع زوار مع هلبة ناس مخلطة ومعجنة علي بعضها ، نظام مفيش بكل ، أي حد عنده حالة مفروض ينزلها ويفتح الطريق لغيره من الناس ، لو حد عنده حالة متخليش باب الطوارئ زحمة ، وهذا الشئ متعارف عليه في جميع انحاء العالم ، حاجة ثانية الأمن فرحانين باللبسة متاعهم ، وواقفين ويشوفوا في الغلط وميتكلموش ، وفيه ناس لابسة زي رسمي مفهمتش هما شني ولا شن وضعهم في المستشفى ، نزلت أختي في الباب متاع الطوارئ ومشيت اندرس في السيارة ، زيني زي أي واحد ليبي وين ما فيه الزحمة بنمشي ، لقيت زحمة قدام باب مسكر مكتوب عليه الزوار ، خشيت اندور في اختي في الزحمة ملقيتهاش ، وبما اني منعرفش وين الاسعاف ولا هكي ، قلت خلي نسأل حد من الشباب اهما الي لابسين رسمي وزي ما قلت قبل معرفتش شن وظيفتهم ، نسأل فيه وين الاسعاف هو واقف علي واحد ثاني زيه ، يشوف فيا ويتلفت للي معاه يكمل الهدرزة ، شديته من يده انكلم فيه انقوله وين الاسعاف ، فاتني بكل ، اهيه ؟ تي شني مش واضح قدامه زعمة ولا لابس طاقية الاخفاء ، يا بني آدم وين طاقية الاسعاف ، قصدي الاسعاف وين يدخلوا في الحالات ، شبحلي وقالي متقوليش خيرك ، طبعاً في الموقف اهوة واللحظة اهيه بيبدى الخرط من جيهتي اني لأنه على عليا صوته ، و يتكلم بالأسلوب الي هو فأكيد مش رح يفهم لين تخرط عليه وتعلي صوتك ، عليت صوتي وقتله يا بني آدم لينا ساعة انكلموا فيك وين الاسعاف ووين يخشوا الحالات قولي وكمل هدرزتك لين يطيب خاطرك ، دخهههههههه فعلاً سخرية ، رد عليا بكل آدب واحترام يا خوي اني غير مسمعتكش بس اهوة الباب من هني اتخش تلقى وبدي يعطي في النعتة عاد ، هني اني هديت شوية وقتله بارك الله فيك وكان مفروض من الاول توقف شوية علي الإتصالات بالشركات وأسعار العملة وتلهى بينا رانا بشر زيك ونبوا نسألوا سؤال بس ، سكت الراجل ووجهه ولى احمر زي الطماطمة ، تي شني يا ناس هكي معقولة ، المهم خشيت لقيت اختي في قسم الاسعاف متاع الاطفال ، عايناه الولد وضربوله يبرى ، وداروله قناع بخار او اكسجين بخاري ولا حاجة زي هكي تسرحت اموره شوية وبدي يتحرك الولد هذاكا وين تريحت اني ، عموماً حاشى القاريين والمستمعين ، بنخش لدورة المياه طبعاً سألت عليها ودلوني عليها ، مشيت خشيت الشيشمة مكسورة هذي النقطة الاولى ، قلت اندور كلينكس او حاجة نمسحوا فيها على اساس مش واصل فينا التطور باش تلقى الماكينة الي اتطلع في هواء سخون باش تنشف يديك ، برضوا مفيش به ، انشوفوا صابون ولا حاجة ، تي نفس الشئ وااااااااك وخلاص

غسلت يديا وطلعت نخرط بيني وبين نفسي ، بس توة اهو نخرط معاكم ، بالله عليكم هذا وضع مستشفى من اكبر المستشفيات في افريقيا والله حال يبكي يا ناس ، وهدا الكلام الي صار امس حكيتهولكم زي ما صارلي ومن وجهة نظري الشخصية اقروا وردوا عليا لو غلطت في حاجة التدوينة بالعامية ومصلحتش فيها شئ من اخطاء إملائية ولا مطبعية فالسامحونا بالله ….


عبدالرؤوف أبوجناح


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home