Libya: News and Views      LibyaNet.Com      Libyan music      Libya: Our Home

send

الخميس 12 نوفمبر 2009

previous letter                 next letter                 list of all letters

الحاج شعيب : فكر فى الحج

عمكم الحاج شعيب طول عليكم الغيبة هلبه ولكن بعدين نقول ليكم ليش طولت وتعرفو عاد التقصقيص مش ساهل هاليام المهم تو خير ما نطول عليكم فى دوه ما ليهاش فايده خلينى نحكيلكم على شن صار وشنو لقيت من معلومات فى هالمدة الفايته.
المهم خلينى نبدأ بقصتى والحج عمكم الحاج قرر السنة هذه الحج هو والحاجة لأنى والله ما نقدر نمشى بروحى من غيرها قول يا سيدى قعدت ندور وننشد على الوكالات الرخيصة وشورنى تأخرت فى الدواره الوكالات الرخيصة شويه لقيتها معبية قول يا سيدى قلنا امرنا لله خلينا ندبروا شوية فلوس ونمشوا حتى بالغلا والكوى مش مهم الحق شاورت الأولاد بالك يعطونى شوى فلوس يعاونونى هالعام يا سيدى الولد الكبير قالى يا حاج والله انا رانى شريت دكان جديد حطيت فيه الى فوقى والى تحتى وعلى دين قلنا باهى الله غالب جينا للولد الأخر قال اسمع ياحاج انا رانى محتاج شوية فلوس نبى نكبر الورشه وداخل على بزنس وصيانة للحوش ولكن كان تبى نوقف كل شىء ونعطيك الفليسات ماعنديش مانع قلت فى نفسى يعنى ( عش طار وعش ما فيشى ) المهم قلت باهى تقدرو تساعدونى خلونى نخدم معاكم بالك نوفر شوى فلوس ان شاء الله, قالى الولد الكبير تعال اخدم معاى (مانجر) فى الدكان الجديد وبدل ما نعطى الفلوس لواحد اخر نعطيهالك وشريكى ما يقول شىء عليك وانت عاد من قبل خادم فى دكانك الأول قبل ما تبيعه قلت يالله الواحد يلقط فلوس للحج من عرقه خير له خاصة وانا ما نقدرش نحج من فلوس المساعدات الحكومية وهذا الى خلانى نطول فى الكتيبه ليكم المهم قول قلنا خلينا ندوروا على وكالة تعطينا سعر رخيص الحق حصلت اكثر من وحده عطتنى سعر مناسب لكن وين ما استفسرت عليهم بالزبط من الناس القديمه الى تمشى كل عام قالولى ياحاج انت راهو ما تقدرش تسكن معاهم اذا كان الحاجة ماشيه معاك لأن سكنهم بعيد على الحرم وعمكم الحاج فلوسه شويه يا دوب يدبر الماكله والشراب وما نقدرش على المواصلات اليومية. قل عمكم الحاج فكر فى فكرة ممكن يصير منها قلنا زعم نقدر نأجر ( موطو ) نركب الحاجة وراى ونسقد نمشى للحرم ونرجع ومش مهم السكن بعيد المهم الرخص قالى واحد مجرب يا حاج انت تعرف ايجار الموطوات قلت له لا والله قالى راهى اغلى من تأجير سيارة فى موسم الحج قلنا يا والله حال كيف الواحد يعمل جتنى فكرة اخرى قلنا بالك نقدروا نرفعو بشاكليط وعمكم الحاج من قبل كانت عنده بشكليط ونمشى عليها للدكان لكن من زمان انخنبت من الجنان والحاجة ايام ضربها السكر اشتركت فى برنامج البشاكليط فى الحديقة وتعلمت كيف تسوق البشكليط قول هالفكرة ممكن يصير منها قلنا يا سيدى خلينا ندبروا فى بشاكليط عرضت الفكرة على الحاج امراجع والحاج الناجى لأنهم حتى هما ماشين وعجبتهم الفكرة قلنا لولد الحاج امراجع يشوفلنا بشاكليط قال وين ياعمى الحاج صعب تلقى الوقت الحالى قلت له ليش البشاكليط فى السوق كاثرات خاصة فى سوق الأحد والله كنا نشروا فيهن الا بخمسة باولند كان كثرث قالى الولد وين يا حاج مقدمك شنو ما سمعتش امال قلت شنو فيه جديد وشنو الى تغير قالى نادى البارونى ما خلالكم شىء قلت له شن دخل نادى البارونى فى البشاكليط مش كان ما عندش شىء الا حفلات العيد وطب الكورة قالى وين ياحاج النادى داير برنامج رياضه ورحلات بالبشاكليط وهذا الى خلى البشاكليط ناقصه هاليام طايحين فيهن شراء غير ورى لبشكليط ودسها يجوك جرى وبيش ما تبى يشروها كبيرة والا صغيرة قديمه ولا جديده قلت له هالنادى الأغبر الا طلع لينا فى اخر عمرنا ورانا ورانا حتى لما الواحد فكر فى الحج قالى الولد انت برا للنادى بالك تحصل منهم قلت له باهى والله على كبير سنى وبعد هالتقصيص وقلت معرفتى لمعلومات على النادى نمشيلهم برجلى وعلى خاطر شنو ( بشكليط ) تى والله لو كان نبطل الحج هالسنة مانى طايح ليهم ولانى مطيح خشمى شنو هذا ما مازال الحاج شعيب طيب الدكر شيخ الشعيبات وزعيم التقصقيص يمشى للنادى الأغبر. قالى الحاج امعيتيق يا حاج سمعت ان بعض الوكالات كان تجيبلهم 10 انفار يعطوك تحج معاهم بلاش قلت له بالك على ايديك يجى الفرج من الله قولى من هى الوكالة قالى والله انا سمعت وما نعرفهمش المهم نشدت وقصقصت لين عرفتهم عمكم الحاج مشى ليهم قلت ليهم انا عندى مجموعة يبوا يمشوا للحج السنه هذه شنو تعطونى كان نجيبهم كلهم ليكم راهم اكثر من عشرة انفار وانا سمعت انكم تعطو للى يجيبلكم عشرة يحج على حسابكم قالولى صح ياحاج لكن توا احنا عبينا وماعدش عندنا مكان لو جيتنا بكرى شوى راهو عطيناك قلت لا حول ولا قوة الا بالله شورها مش مسخره هالسنة الله غالب على امره خدمنا فى التيك اوى ما نفع قلنا ندور وكالة رخيصه ما حصلناش حتى البشاكليط غلوهن وضموهم جماعة البارونى الوكالة الى تعطى بلاش عبت!!!
المهم سمعوا بيا الأولاد قالو لى يا بوى كان تبى تمشى انت والحاجه تو نلموا ليك قلت لهم توا انتم مشئ قلت لكم من البداية نبى نحج وكل واحد منكم طلع لى بسبله تو شنو اخطرلكم وشنو الى تغير عليكم قالوا لى غير لقيناك تاعب وادور قلنا خلى نساعدوك قلت لهم تو بعد ما كل الوكالات الى تسكن قريب من الحرم عبت والله مانى واخد منكم فلس يالا بالك العام الجاى الواحد يبدأ بكرى ويوتى الفليسات ولا يجمعله مجموعة ويمشى على خساب وحده من الوكالات بالبلاش وان شاء الله كان طال العمر نمشوا قول عمكم الحاج هفت على بعايره وما صارش من الحجاج ونتلاقو فى ساعة اخرى طيبه ان شا الله.

الحاج شعيب
مانشستر / بريطانيا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home