Libya: News and Views      LibyaNet.Com      Libyan music      Libya: Our Home

send

الاربعاء 12 مايو 2010

previous letter                 next letter                 list of all letters

إهداء إلى عمى الساطور

يا عمى الساطور اعلاش انت ما اتحبش البازين , البازين اكلة اكويسة خاصة لما اتكون امفلفلة ومع الليم القارس وعليها اللحيمات ,انت ما تعرفش تاكل بيدك هذا السبب انك ما تحبش الازين , والا انت يا عمى الساطور خايف على بطم الكمبيوتر امتعك يتوسخوا , تقدر تلبس قوانتى و وتقدر تاكل بالكاشيك ,لا ياعمى الساطور حنا اللى ما يكلش البازين ما نعتبروش فيه ليبى , والبازين يا عمى الساطور اينحى حتى فى البرد و هكى حنّاى قالتلى , وحتى جدى ايقول اللى ما يكلش البازين هذا مش راجل , وزعمة اصغارك يا كلوا فى البازين يا عمى الساطور , بس انقوللك ياعمى الساطور اللى ما ياكلش البازين أوهو اصغير مش حيقدر ياكله وهو كبير , وانتم شن تاكلوا يا عمى الساطور و حق انتم تاكلوا فى الفاصولية من الصبح هكى قالولنا و تفطروا على الفاصولية بالدحى من الصبح ومعاها خبزة مربعة , صح ليكم يا عمى الساطور تقدروا تاكلو ماكلة الانجليز , بس اصغارك كان بيجوا لليبيا عودهم يا عمى الساطور باش سنسوا الفاصولية والدخى والخبزة المربعة لان حايضحكوا اعليهم واجد , علمهم يفطروا على العصيدة والمترودة والكسكسى والمبكبكة والبازين اهم شئ , انا انحبك يا عمى الساطور بس كان ما اتحبش البازين انا حا نزعل منك انا وصاحباتى اللى يقرو امعاى تصبح على خير عمى الساطور ونهديك قصيدة على البازين وهذه هدية ليك ولعائلتك ولجيرانك , مع السلامة عمى الساطور :

الا هبي بصحنك فاصبحينا *** و إن كان الغذاء بازين فاعزمينا
مفلفلة بلحم خروف لذيذ *** إذا ما خالطها الإدام سخينا
ترى الرصين إذا ما أمرت *** عليه لأكمامه لها من المشمرينا
أيا هازئا لا يغرنك المنظر *** و إن كنا للشعر مسبسبينا
متى نتربع على قصعة مع *** قوم يكونو حينها من النادمينا
فانا نورد الأيادي بيضا و نخـ *** ـرجهن حمرا بالإدام ممرغدينا
ونبلع اللقمة و نتبعها بأخرى *** و نرفس فوق رفس الرافسينا
ألا ابلغ بني البريوش عنا *** وسكالوبياً و مدمن البانينا
بأياما لنا غر طوال *** كنا فيها للقصاع ماسحينا
فكم من قصعة نسفناها *** وكنا عليها لليم عاصرين
وكم من قصعة جلسنا إليها *** فكأنها لم تحوي الطعام سنينا
ألا لا يعلم الأقوام يوما *** بأنا للقمة في قصعة مرجعينا
ترى القصاع وقد رفعت *** كأنا بفيري لها غاسلينا
نكون الأولين إذا عزمنا *** ونكون من المعششين إذا نسينا
مخافة أن يفوتنا البازين يوما *** أو نكون في الأعراس من الغائبينا
ونأكل ما سبك بدقيق شعير *** ويأكل غيرنا مبكبكة و سامادينا
ونأكل إن أكلنا بأيدينا *** ويأكل غيرنا بشوكة و سكينا
إذا بلغ الفطام لنا صبي أفطر *** بعصيدة و اتبعها الغذاء بازينا .

زيزي الصغيرة
جمعية عالم الأطفال


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home