Libya: News and Views      LibyaNet.Com      Libyan music      Libya: Our Home

send

السبت 12 ديسمبر 2009

previous letter                 next letter                 list of all letters

عن الملحق الثقافي بشئون الطلبة ببريطانيا

اكتب احبائي الطلبة وغير الطلبة اليوم وسامحوني لاني حنكتب بالعامية وبالفلاقي لانها اللغة الوحيدة اللي يفهمها الملحق الثقافي سعد عبد العزيز مناع احمد، ومعليشي خلوني نتكلم باللهجة الغرباوية اللي يكرها سعد احمد ويحقد عليها.

اول الكلام نبدوه بلقبه واللي هو احمد ومش كيف ما يقول مناع وبعدين نجو لتاريخه قبل ما يجي لبريطانيا، كان يخدم في مركز دراسات الكتاب الاخضر في مدينته سرت وطبعا خرب المركز والشاهد على هذا كله زملائه وبعدها مسك امين المساعد للشؤون العلمية بجامعة التحدي وخربها هي الاخرى وحكايات النهب والخنبة ومعاكسة البنات كلها معروفة وما فيش داعي للكلام عليها مرة تانية.

وعاش فترة من عمره في تشاد ولانه من قبيلة القذادفة من سرت اللي فتحت له ابواب لي ان كلنا نعتقد بان كل واحد من سرت معناها راجل واصل و انه ما يقدر حد عليه وباور قوي لكن حتى ابناء عمه مش راضيين عليه لان الناس كلها تشكي منه واهل قبيلته مش عارفين شنوا اديروا امعاه حاصلين فيه هالورطة زي ما حاصلين فيه احنى.

المهم بعد ما خرب جامعة التحدي وطرده منها عبدالهادي موسى طردة مليحة، بعدين جابوه لبريطانيا بعد سبعين واسطة ولولا الواسطة ما عفسها اهني شني هو عبقري والا من الطلبة المتفوقين او الخبرة القوية اللي عنده، لكن الواحد ما عنده ما يدير للواسطة والباور اللي خرب البلاد.

وهنا بدت المشاكل بينه وبين الطلبة، لان هذا البلوة شخص تافه وناقص اخلاق وما يعرفش المعروف والخير وكله حقد وكره للطلبة، وبالله عليكم شفتوا شكله النحس وقداش وجهه عبوس وكيف يلبس ويشمر في سرواله قريب يوصله لصدره ها الشلافطي وشفتوا كيف يعامل ويكلم في الطلبة والله اتقول يخدموا عنده والا بوه امورتله المكتب والناس كلها عبيد تحته.

لكن راهو ما فيش من اجبن منه غير هو يحب يصيح ويعلي في صوته قدام الكل باش يخافوا منه ويقولوا الناس فكنا منه، لكن جابن وخواف كبير.

وكل مرة يطلع علينا بقصة اول ما بدي بتسكير الاتصالات والهاتف وبعدين بالمنظومة والايميل وقبلهم تصنيف الجامعات وهذه الجامعة مش معتمدة وامشي اقراء في هذه الجامعة والكلام الزايد امدعه.

غير نبي نعرف منين متخرج هالعبقري سعد ومن وين واخد الدكتوارة من اوكرانيا والا من ايرلندا، ياودي الكلام بعيد على بعضه وديما يقول لازم الطلبة يقروا في الجامعات المصنفة بس تي بالله ها الجامعات الليبية المصنفة اللي متخرجين منها ناس شكلك.

بعدين انجوا لرده اللي يكتب فية في النت وباسماء مستعارة ويعاون فيه اتنين من الموظفين امدعه ويقول ويكتب ويعلق بان الامور كلها مزبوطة والمنحة تنزل في اول الشهر ومنحة الكتب والحاسوب والتداكر كلها تنزل للطلبة وما فيش تاخير والتامين طورناه ومددنا العقد.

تي قولي يا سي الدكر هذا كلها اللي ادير فيه بجميلك يا جاهل، تي ماهو علي خاطره كله جايبينك هنا باش تساعد الطلبة وتمشي امورهم وتسعى على راحتهم باش يلهوا في قرايتهم مش ادمرلهم حياتهم وتخليهم يجروا وراء المنحة ومنة الكتب والحاسوب والتامين المفروض ما فيش ولا طالب ليه علاقة بالامور هي لانها المفروض تنزل منتظمة في وقتها ومعروف قداش ينزل لكل طالب قبل ما يجي من ليبيا مش انت اللي تحدد قداش ينزل وامتى ينزل.

وانت ديما تكتب وتعاود بان امور المكتب عال العال وكل الطلبة راضيين علي خدمات المكتب واجراءاتهم تمام التمام لكن الواقع عكس هذا كله والامور مش مزبوطة وانت وجماعتك سبب الخراب والمشاكل.

المنحة تنزل في اول الشهر لكن التلخبيط والخنبة عيني عينيك يا سعد وبنعطيك متال واحد وهو قداش عندك طالب بدي الدراسة على طول قصدي ما قراش لغة انكليزية وانت الفلوس كلها واصلة من ليبيا .

تراه قولي يافالح، هاه .

انت قلت في مقالك الاخير بان الطلبة كلهم مايجوش 2800 طالب وطالبة وبالله عليك قولي قداش واحد منهم ما درسش لغة. لنفرض 250 طالب بس مادرسوش لغة ، اضرب هذا الرقم في 9000 باوند لكل طالب وهذه رسوم لغة لسنة والنتيجة هي 2,250.000 باوند اذا انت خانب لان ما فيش ولا طالب اعطيته فلوسه من مستحقات اللغة والطلبة يطالبوا فيك بالفلوس ولا واحد اعطيته ولا حتى رجعت الفلوس لليبيا وكلها في جيبك انت وجماعتك.

شفتوا يا خوتي الطلبة وين الخنبة والتلخبيط وما تصدقوش الكلام اللي يكتب فيه في النت ويقول الامور تمام والمنحة تنزل في وقتها والتفنقي الزايد امدعة واللي يرضى بالظلم والخنبة من مستحقاتنا راهو يعتبر زيه واللي يناصر الظالم يعتبر زيه واللي حتى يسكت على الظلم.

واالي مش مصدق يسال اي طالب او طالبة مدرسوش اللغة وهما نفسهم ما يعرفوش وين الفلوس امشت.

هذه فلوس اللغة بس ولكن فيه افاريات و امور اخرى الله اعلم بها، لكن العاقبة في النهاية للخونة والمجرميين امتالك يا سعد لان دخلت التاريخ من بابه الاسود والوسخ وما تفرحش بهذا المنصب امدعك

انت ما تندريش على الدنيا شنو يصير فيها غدوة وين ايكون امكانك وين ترفعك الدنيا ربما تحت رحمة احد الطلبة اللي ظلمتهم وحا تشوف وتلقى الناس اللي ظلمتهم وخنبت مستحقاتهم لان الدنيا صغيرة والناس تتلاقى والجبال ما تتلاقى.

فلهذا لازم عليك تعيد حسابتك وترجع كل الفلوس اللي خنبتها من مستحقات الطلبة واللي ترفع فيها لليبيا وتطلب السماح من كل واحد تعرضتله وعاملته مش كوس وتستغفر ربك وتحسب ستين حساب قبل ما تقول اي كلمة مش كويسة ولازم عليك ما تتعلم الادب والاحترام وبلاش التهور والكلام الزايد.

بصراحة لازم عليك تقعمز بروحك في مكان خالي وتفكر كويس في اللي درته وتراجع شريط حياتك كلها وتتعلم من اخطاءك حتى تتحسن وتعرف بان الناس ساكتين لك على خاطر عندهم دراسة وعائلات ومش فاضيين بيك وان الفلوس اللي خنبتها ممكن تدفعا دواء لعلاج ابنائك واسرتك.

وفي الاخير انت حر وكان ما غيرتش من افعالك وتصرفاتك ما تخسر الا انت.

طالب ليبي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home