Libya: News and Views      LibyaNet.Com      Libyan music      Libya: Our Home

send

الجمعة 9 يوليو 2010

previous letter                 next letter                 list of all letters

ابليس ناوي يهج من ليبيا

في الحقيقة وصلتني هذه الرسالة من احد الاصدقاء علي بريدي الكتروني في صورة نكته متداولة في الشارع السعودي.. الا انني اراها تخص الشارع الليبي اكثر من الشارع السعودي لما نعيشه من ماسة وفساد مشتشري في جميع اركان الدولة الليبية بكل مستوياتها وحتي مشاريع ليبيا الغد التي فاق فيها الفساد عما كان في السابق.
ولذلك عجز ابليس ان يتكيف مع الوضع وفشل في ممارسة مهامه الشيطانية، لانه واجه تحديات شرشة لم يستطيع مجابهتها ولذلك قرار الرحيل.
كان إبليس في غرفته , يلملم ملابسه في حقيبة إلى جانب باقي متعلّقاته ...
على المنضدة القريبة كانت استقالته موقّعة ومختومة حسب الأصول , وبجوارها تقبع تذكرة سفر إلى جزر برمودا الديمقراطية ..
كانت ملامح وجهه في تلك اللحظات تنطق بالحزن, والكآبة , والإحباط , واليأس , وقلّة الحيلة ...
مع دهشة مزمنة ارتسمت عليه منذ فترة ليست بالقريبة, واعترافٍ بالعجز والفشل ولذلك قرر إبليس الراحيلٌ عن بلادنا إلى غير رجعة...
وبرغم من ان هناك الكثير من اصديقائه الي حلفوله باطلاق ما هو ماشي ويدعود من الشيطان .. الا انه اعتذر وحلف حتي هو باليمين الواعر مهو قاد في هالبلاد الي صارله فيعا سنين عاطل عن العمل.
ويقول ابليس؟؟؟؟
خلاص قرّبت أموت من الجوع في ها البلاد .. ابديت بسبسي ؟ انحول في الوسواس والخنّاس !
كنت من زمان أوسوس للوحدة تترك ولدها يبكي وهي تحكي مع جاراتها, توا صاروا بروحوم.. يرمون اولدهم يبكوا حتي ابدو يكسرولي في راسي .
كنت أوسوس للواحد ينسى يسمّي بالله قبل ما ياكل .. توا الواحد مايلقى شئ يأكلها !
كنت أوسوس للشاب باش ايعاكسوا البنت وهي ماشية بالشارع, صاروا البنات هما الي ايعاكسوا ويناشبوا في الشباب ويقولوا في كلام أنا نستحي أنقوله !!
ازمان انوسوس للواحد باش يسرق شن ياكل.. توا الواحد يسرق 100 مليون عيني عينك .. ومفيش شيطان يقدر يمسه .. وحتي اني بروحي منقدرش حتي نقرب جنبه.
كنت انوسوس .. لوكيل النيابة باش يظلم المتهم.. توا القاضي بروحه الظالم وحتي المحامي ياخد في الرشوة باش يغرق البرية.. يعني اتعدو علي خدمتي؟؟
كنت انوسوس.. للمجرمين باش ايديرو المشاكل ويتعدوا علي القانون.. توا الشرطة وحتي رئيس المركز بروحه يعطي في التعليمات باش يتعدوا علي اعراض الناس وممتلكاتهم.
كنت انوسوس.. لكل امام ومؤذن باش ما يرفعش صوته.. توا رئيس الاوقاف بروحه وقفهم عند حدهم وحلفلهم بالطلاق لو واحد صوته يطلع من الجامع ولا يجعز واحد راقد الا ما يقصله السانه.. توا اني نقدر انديرها هذي؟؟؟
ازمان كنت عندي كلمة مع المنحرفين واني الي انمشي فيهم زي ما نبي منغير شي و في كل الظروف.. توا معادش ايعدلوا عليه لان الحكومة جندتهم وتعطي فيهم شنوا يبوا؟؟
يقول ابليس صار عندكم فائض بالفساد يكفّي 40 سنة قدّام.. صرت أخاف على نفسي من هذا الوضع!!
صرت مرّات أوسوس بالمقلوب .. أقول للمسؤول إرحم.. وللحرامي يكفّي .. خلّي شويّ للحراميّة اللي جايين بعدك ..
ما دام إنتو بروحكم ما شاء الله اديرو في كل هالبلاوي, أنا إبليس وش نقدر اندير اكثر من الي صاير خلوني نمشي اندور علي خدمة انديرها ؟

الغزال


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home