Libya: News and Views      LibyaNet.Com      Libyan music      Libya: Our Home

send

السبت 8 أغسطس 2009

previous letter                 next letter                 list of all letters

إلى البزناس منصور بن داقوا وعصابته

اطل علينا منذ ايام البزناس الدكتور منصور بن داقو(طبيب التجميل الذى فضّل ربيع كندا على حر ليبيا القائض) من خلال اذاعة القنفوذ وكعادته كل سنة اخذ فى التباكى على الشعب الليبى وعلى صحته وتفنن الى حد القرف فى اظهار غيرته على ليبيا واهلها واهتمامه بصحة الليبيين واستفاض فى التأكيد على تبرعه بوقته الثمين للكشف على مرضانا الذين ليس لهم بعدالله الا منصور وزملاؤه بزناسة كندا وبريطانيا!!!. توا ياوجه الزينقو (هذه هى اللهجة التى يفهمها هؤلاء البزناسة) مش هذى ليبيا اللى بعثتك لكندا باش تولى راجل وترجع تخدم بلادك....كل اللى اخذته ليبيا منك ومن امثالك فى كندا وبريطانيا هو زيارة بزنس مرة فى العام. بالله جاوبلى على هالسؤال: انت مش موقّع على تعهد باش ترجع الى ليبيا بعد نهاية البعثة؟ علاش مارجعتش؟ كان الموضوع فلوس صحيح مرتبات ليبيا مش زى كندا لكن شن اللى وصّلك باش تخدم فى كندا انت وغيرك؟ مش فلوس الشعب الليبى؟ ...ردوا لليبيين اللى صرفوه عليكم وانشاء الله بعدين تمشوا فى ستين داهية...وان كان الموضوع انك مش متقّبل النظام الجماهيرى فى ليبيا وماتبيش تعيش فى ظل الثورة العظيمة بعد مامصّيت خيرها فهذا موضوع ثانى يبى تهدريزة باهية وين مايحب قليبك!!! رانا عارفين كويس انه مافيش واحد فيكم قلبه على ليبيا وانها بالنسبة ليكم بزنس وبروباقاندا وطلب شهرة...انتم تديروا فى واسطات وبتكلبوا باش جمعيات سيف وعائشة تدعوكم ولما تجيكم الدعوة تبدوا تتشرطوا وتطلبوا فى تذاكر سفر ليكم ولصغاركم وفى اللى يشرط تذاكر درجة اولى ودفع مبلغ محترم وبالدولار وبعدين يطلع الحقير على المرئية ويقعد يزايد ويتغنى بحب ليبيا!!!العملية كلها بالنسبة ليكم اجازة عائلية مدفوعة الثمن من دم الشعب الطيب وبدل ماتدفعوا للشعب اللى صرفه عليكم تزيدوا تذبحوا فيه.

والى المسئولين عن دعوة هؤلاء البزناسة الى ليبيا اقول:

1- هل حاسبتم هؤلاء البزناسة عن سبب عدم التزامهم بالتعهدات التى امضوها بالعودة الى ليبيا بعد انتهاء بعثاتهم؟

2ـ اتقوا الله فى اهلكم فى ليبيا فليس كل من عاش فى الخارج طبيب ناجح ويستحق ان يُدعى الى ليبيا كطبيب زائر. فمثلا هذا البنداقوا يعمل فى مستشفى ريفى فى ادغال كندا(مايعادل مستوصف فى اوبارى او جخّرة) يرفض الكنديين (المقومين) ان يعملوا فيه ثم يأتى الي ليبيا ويتم التطبيل له على انه بروفسور فى اكبر مستشفى جامعى في كندا. مارأيكم فى طبيب ليبى فى بريطانيا اعرفه شخصيا تمت دعوته الى المؤتمر الأول للاطباء الليبيين بالخارج منذ عدة سنوات على اساس انه استشارى فى جراحة زراعة الاعضاء وكان يٌنقل من طرابلس الى بنغازى فى سيارات المراسم الفارهة وتم دفع كل مصاريف سفره....المشكلة انه حتى يومنا هذا مازال طبيبا تحت التمرين فى الجراحة العامة مع انه تجاوز الاربعين ولاعلاقة له بزرع الاعضاء(او حتى زرع الصفصفة) من قريب او بعيد. طبيب اخر من بريطانيا تنكر لليبيا بعد انتهاء بعثته وكان يذهب الى ليبيا على انه استاذ زائر فى تخصص امراض الدم بتسهيل ودعاية من والده الذى يرأس مصحة تابعة للامن الداخلى ولكنه فى الحقيقة كان طبيبا تحت التمرين وكان مهددا بالفصل من البرنامج التدريبى لرسوبه المتكرر فى امتحانات الزمالة البريطانية. وهناك امثلة كثيرة على هؤلاء النصابين الذين لم يكفهم التنكر لليبيا بعد انتهاء بعثاتهم بل ارادوا ان يسرقوا المزيد عن طريق النصب والضحك على ذقون الليبيين.

نحن لايهمنا ان يعودوا الى ليبيا فليبيا بخير من غيرهم ولكن عليهم ان يسّددوا كل ماانفقناه عليهم قبل ان يغربوا عن وجوهنا الى الابد. وسوف نعود للموضوع وبالاسماء الثلاثية ان لم تتوقف هذه المهزلة.

بروفسور فى اكبر مستشفى جامعى فى كندا!!!ويانارى على الليبيين.

ليبي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home