Libya: News and Views      LibyaNet.Com      Libyan music      Libya: Our Home

send

الأحد 7 نوفمبر 2010

previous letter                 next letter                 list of all letters

عيب وعار

_ ترى فهمنا .. هذا فسري .. واللا انت شن تسميه ...
_ عندك حق .. كمشة صعاليك من تونس على خشبة ...
_ وتوه بالله عليك .. هذا اسمه فن !!!
_ يا راجل .. احترم شعور الفنان ...
_ فنان .. قالك .. فنانين زلحة ...
_ والله .. عندك حق .. هاذو .. ما يستهلوش الاحترام .. توه فوق من الاربعين عام ...
_ باهي .. يا جماعمة .. علاش هم ما خذوش الفرصة .. وانسحبوا ...
_ كلام فارغ .. هاذو اصلا ما تركبش عليهم .. كلمة " انتم ليبين" ...
_ شوف .. اني نأكد كلامك .. الليبي بالاصل وبالفطرة .. ما يحبش فن الهمج ...
_ صحيح .. والله .. ها الفن اللي عودونا عليه .. وخاصة في شهر رمضان الكريم .. والله عيب ..
_ يا اخي .. ما تحترموناش احني .. احني تعودنا .. احترموا هذا الشهر الكريم .. لوجه الله ...
_ يا راجل .. عالم بارد مهيف .. وبعدين يا جماعة الفن .. في كل العالم مربوط بالاصالة ...
_ كمشة فلاقة .. مهيفة .. ياخي .. اعطونا حتى شوية فن من البلاد .. اللي انتم جايين منها ...
_ والله .. غائبة .. اللا العصا ...
_ ايه .. ايه .. العصا .. أيه .. ايه .. المسواق .. لانهم .. ما احترموش انفوسهم ...
_ تعرفوا .. يا جماعة شنو .. اللي ما يحترمش نفسه .. ما فيه حد يحترمه ...
_ يا اخي .. الناس هاذو .. باردين هلبة .. صارو هم اهل البلد .. مسكينة ليبيا ...
_ ما عليناش .. خليهم يصيرو .. على الاقل يعطونا فن بلادهم زي " القافلة تسير" .. علاش التبلعيط ...
_ واحد .. دايرلك هيصة اسمها " فكر واكسب " .. وواحد دايرلك شطحة اسمها " الشاهي باللوز " ...
_ لا .. لا .. واللي ما دوختني هلبة .. غولة الجنانات " خالتك مشهية " ...
_ توه .. يا جماعة .. انتو معاي واللا ضدي .. ورايكم في هذا المستوى من الفن ...
_ خليه .. لين يبقى فن قبل .. وبعدين نقيموه ...

عبدالرحمن السبتي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home