Libya: News and Views      LibyaNet.Com      Libyan music      Libya: Our Home

send

السبت 7 مارس 2009

previous letter                 next letter                 list of all letters

كفاءات المؤتمر الوطني !!

كنا نحسوا بالإهانة لأن المؤتمر الوطني الأول تم تزييفه بالمؤتمر الثاني,,,,, قلنا الله غالب,,,,,,واستسلمنا للأمر الواقع,, ليس في الإمكان ابدع مما كان,,,,,, ومادام المؤتمر الثاني اصبح بحكم قضاء وقدر,,,,,فعلينا بالصبر والإحتساب وماهيش اول مرة نقبلوا بأقل القليل ,,,,,, و راد الله علينا,,, نحمدوه على كل حال.
قالوا راه المؤتمر الثاني حيكون كله كفاءات ما فيش حد يعبى لا علي اسم ولا علي تاريخ نضالي ,,, نبغوا كفاءات،،،،،اكثر من عامين ونحن نسمعو في غناوة الكفاءات,,,,,المعلم كتشافيتا بدا يغني فيها على السيكا،،،، طلع روحنا بالكفاءات,,,,, اللي ماسكين الموتمر من رقبته المعروفين,,,, من الطيار حتى لرشيد السلاك وبريك سويسي يمحشوا فيه وهو يردد في كلامهم مثيل الببغاء,,بس الببغاء صوته أجمل,,,الكفاءات,,,الكفاءات,,,,,/ انشاالله نكتب فيها صح يا جماعة/,,,,, اللي عقّبه كاشافيتا كمله مفتاح الطيار واللي عقّبه مفتاح الطيار كمله علي الترهوني واللي عقبه الترهوني كمله رشيد السلاك,,,اللي عقبه السلاك كمله ابراهيم قدورة أو,,,,المرود*,,اللي عقبه المرود ,,, طبسله بريك سويسي/ شياب درنه عندهم علم/ حتى من,,المنظّرة المعجزة,, ندى صبري,, عياد لحقت على عرس الكفاءات وبدت تعطي في محاضرات في نظرية الكفاءات/ عطبك علينا من كفاءات/ بقيت كلمة كفاءات زي اللوبانة في الفم المشقّم تسمع التطربيق من غريان لعند غات ومن غات لعند امساعد,,,,, قلنا وعلاش لا,,,,, يا زينك كفاءات ,,, اللي اتديره العمشة ياكلوه ضناها,,,,,, ونحن ضنى المؤتمر ناكلوا ما يديروه قادة الموتمر،،،،،/ عليك قادة كل امعمش احرف من التاني !!!!,,,, وبدن الأفاريات ,,,,, الموتمر سيد قراراته,,,, ما مشيناش بعيد على التصعيد يا سادة,,,, مرات لندن موش بعيدة ياسر على سرت,,,موسى كوسة ثاني ركبته في واحد من اوكاره السرية,,, علي بعد شبح العين مثابة سعاد الفيتوري الثورية ,,وموش بعيد منها يخبط الالكترون الصحفي الجماهيري جايب امعاه,, ليبيا اليوم,, واخبار ليبيا,,, وموش بعيد عليهم عيسى عبد القيوم و عقاب الرابش امتاعه,,, عليك خلطة,,,, وما خفي كان اعظم,,,, وموش بعيد منهم في شوارع ومراكز اللجوء الانجليزية ينتشر الأعضاء والعضوات الجدد للموتمر المحظوظ,,,,, و حتى انكانهم مازال ما اتحصلوا علي اللجوء,,,ما فيش مشكلة,,,, نلقانهم كفوا ووفوا,,غطوا علي مشكلة العدد ,,, وكلهم اصبحوا مشاعل تضوي تراكين الموتمر,,,,,كل الصعوبات تم التغلب عليها,,,وتم الموتمر جاهز من مجاميعه,,,,,,قول بدت الكولسة بين الشمام وقدورة ومفتاح الطيار وبريك سويسي ورشيد بسيكري وبدا التصعيد ,,,,, تمام اتقول انك في مؤتمر الشعب العام / قلتلكم لندن موش بعيدة على الجماهيرية العظمى ,,,,,,وبعد أن بدأت اعمال الموتمر بالاستماع لكلمات مناضلين البالتوك,,,المناضل المرعوش فلتر,, والمناضل الملطوش كاتشافيتا,,, والمناضل المنفوش مفتاح السيد الشريف,,,,,واستعرض الأعضاء قدراتهم ومهاراتهم وتاريخهم النضالي الطوييييييييييل,,,, شوي وبدينا نسمعوا في ضرب البنادير,,,دج ,, دُم ,, دج,, دُم,,,, الصلاة علي النبي يا ولاد,,,هيه,,هيه,,هيه,,, يا بنديري هيه ماعندك خبر,,,,اتقول بوغوفه جا حتى هو/ الله يرحمه ويوسع عليه/,,, آهو بدن الكفاءات يطلعن,,, شن رايكم في طلعة الكفاءة الشابة ؤُ هي شايلة الاعلام والسناسق و تقود في الحضرة,,,وتنده في سيدي عبد السلام الأسمر,,, تستور ؤ نور,,,هذي الكفاءة الشابة تتمثل في شيخ الشباب مصطفى اسكندر/ مثقف البالتوك المعروف/تعرضت مواهبه للصقل والتلميع على يد المربية,,الفاضلة,,,,فوزية شلابي,,, نلقانها ربت وكبرت,,, فحبىَ الله الموتمر بالصوفي الموهوب مصطفى اسكندر,,, كفاءة ونص,,,من هضاك اليوم والمؤتمر أصبح تكية ونشاطها يقوم علي دج,,, دم ,,, ؤُ يا بنديري هيه,,, وما كملش الكفاءة مصطفى اسكندر نوبته حتى باغتته كفاءة نضالية جديدة وهي الاعلامية القديرة ليلى الهوني وهي قضت بالضربة القاضية على الكفاءة,,النضالية,, القديمة المعروفة في مجال البالتوك بغزارة علمها وسعة اطلاعها ألا وهي الكاتبة الخطيرة نجمة اللجنة السياسية للمؤتمر السابق دلوعة البالتوك ندى صبري عياد التي تطلق على نفسها ريم ليبيا/الصلاة علي النبي/ بعد معركة تخلى فيها مكتشف المواهب المعروف حسن الأمين عنها لصالح ليلى الهوني,, بالرغم من انها كانت نجمة موقعه,, ليبيا المستقبل,, وكان ينشر لها مقالات,,على الرغم من تفاهتها,,فإن نصفها اما مسروق واما بقلم السيد فاضل المسعودي!!!,,, وبعد ان انجلى غبار المعركة لصالح الكفاءة الجديدة ليلى الهوني,,,, انسحبت الكفاءة القديمة ريم ليبيا تجر أذيال الخيبة وتلعن في الجماعة اللي دعموها و دارو منها نجمة القضية الليبية وتخلوا عنها بدم بارد,,,, مسكينة القضية نلقانها انه مزالها طاح وماو ناقصها الا النواح. ليلى الهوني صبحت غرسة راديو الأمل برعاية منصف البوري فكان يسقيها كما يسقي النبتة في الهجير ويحميها من العواصف والزمهرير في راديو الأمل الذي يبث,,, حتى هو من لندن,,,,وحتى منصف ما خلا من جهده من ناحية اعداد وصقل الكفاءات,,, وشوي كان طوّل راديو صابر مجيد راهو تم ابراهيم قدورة البسباسي أمام غرسة ,, ليلى الهوني و راه اسم البرنامج تم المكحلة والمرود بدل,,البسباسي آه يا راسي,,,, ولا حول ولا قوة الا بالله العلي العظيم.
لكن الدوة موش هنا يا عرب الموتمر,,,, الدوة ان بالرغم من كل هذه المهازل يجي السيد القائد,,, قايد الموتمر الوطني الثاني ابريك سويسي,,, ويكتب لروحه رسايل بتوقيع فرج القرقعي,,, آهو الخبط اللي موش بعيد علي نشاط القيادية ليلى الهوني,,الوطني,, عليك قايد متاع طروح,,,,,, لو كان اتقدّر المسؤولية تعلن استقالتك وتحل ها اللجنة العطيبة ,,,, موش تبعث الرسايل لحضرة جنابك بتوقيع,, فرج القرقعي,, اتحشموا فسدتو العمل الوطني و المؤتمر الوطني,,, وهذا موش جديد عليك انت وجماعتك هضا هو دورك متاع زمان يا سيادة القايد,, يا سويسي,,,, والناس كلها تعرف انه ما فيه مكان للنضال الوطني تخشه إلا و تفسده وإذا ما وجدت فرصة لفساده فتسبب له الانقسام والانشقاق,,,, بلا فرج القرقعي بلا رسايل مموهة بلا بهتان و تصرف كما الرجال اذا كنت تستطيع ,,, انكشفتم على حقيقتكم ,,, وفاحت بنتكم ,,,,اختفوا,,,, اختفوا وردوا المؤتمر للشرفاء,,, ليبيا موش ناقصة ابغاديد.

بوسيفي أصيل


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home