Libya: News and Views      LibyaNet.Com      Libyan music      Libya: Our Home

send

الخميس 6 أغسطس 2009

previous letter                 next letter                 list of all letters

وليدى وحكاية جمعـية الجالية الليبية

عمكم الحاج كل يوم لابد يمر على صفحة غنيوة واخبار ليبيا والمنارة وليبيا اليوم ومرات ندخل حتى لبعض الصفيحات الالكترونية الليبيبة الأخرى. لكن صفحة غنيوة هى الأساس على خاطر كل شىء فيها تلقى فيها الباهى والشين والعطيب وعمكم الحاج قاعد ما عنده ما يدير يقرأ فى كل شىء حتى دراه الكبد اه املا كيف.

لكن بصراحة نهار واحد اغسطس لقيت اعلان من جمعية الجالية الليبية والاعلان يقول لاجتماع الشهرى للجمعية. تبى الحق انا والله الا حيرنى الاعلان لكن اهو معدلتش عليه وقبل ما نمشى لموضوع اخر تاريته عندى وليد عطيب متكى وراى ويقرأ فى المواضيع الى نخشلها الوليد قالى يا بوى غير ما تغيرش الصفحة خلى نكمل نقرأ ولما كمل الاعلان نشدنى قالى قولى يا بوى عندنا احنا الليبيين جمعية هنا فى مانشستر وعندها نشاط واهو الناس تجتمع كل شهر وين راقد انت يا بوى وما تعلمش بيها ولا عمرك قلتنا عليها شنى يا حاج شورك كبرت ولا ما تبيناش نمشولها. تبى الحق انا قعدت فى حيرة ونخمم شن نرد على الولد كانى قتله ما فيش جمعية والله نخاف يشد عليا زلة وكانى قتله موجودة نخاف يقولى باهى خيرك ما تمشيش للاجتماعات وراك قلت لنا نشاركوا فى نشاطاتها وكانى قتله ما عنديش علم بالاجتماعات السابقه ولا بنشاطاتها نخاف يقولى باهى امالا انا شن ادير وانت طول الوقت الى قاعده فى الحوش يا على صفحة غنيوة ولا الشامس ولا الأطيوش ولا حتى سليمان دوغه ومرة مرة يا بوى والله الا نشوف فيك تخش على جرائد الحكومة وطبعا انت معروف عليك ما تروحش للحوش الا وانت لايد على مانشستر وجوامعها من دزبرى لا النور لا الفرقان لا غيرها خليك عاد من الورش والدكاكين ومكانات الهدرزة والله ما عمرك قلت اليوم كنت فى جمعية الجالية نتفكر مرة وحدة يا بوى من قريب عام فات قلت فيه حفلة عيد ويا ودى معاش نتفكر عيد فطر ولا اضحى والباقى ما سمعتكش تتكلم على شى.

باهى يا جماعة شن نقول للولد نقوله الحق بالك نكره فى الجمعية ولا نسكت ونخليه دايخ ولايم عليا تبو الحق شاورت الحاجة وقلتلها على لومة ولدها قاتلى اسمع يا حاج انت طول عمرك ما تعودش تكذب عليه قوله الحق وامرنا لله هو صحيح فيها نشرة غسيل لكن كيف ما يقول المثل ( كان الكذب ينجى الحق انجى وانجى) توكل على ربى وقوله الحق قلت باهى امالا تعالى حدى بالك ان ناسى على الأقل دكرينى يا حاجه حتى انت عندك فى الرأى حصة المهم سكرت الخربه الكمبيوتر وقلت للولد تعالى املا نقولك الحق دارت الحاجة طاسة شاهى شفطت منها رشفتين وقلت للولد اسمع يا غالى الحق الحق فيه جمعية للجالية الليبية وراهى من زمان مش قديم هلبه لكن المهم فيه والجمعية هادى فى الأول نحسابوها بتهتم بالجالية وامورها لكن يا ودى ما شفنا شىء خاطى من العيد للعيد والعام الفايت تلاقينا وقلنا هيا حبال سو طاحن فى بير وخلينا نختاروا ناس اخرين فى الادارة ولكن شورنا كثرنا على ما وصونا ونسينا السنيين لاوله وقلنا هيا يا جماعة فكونا من الماضى والحفر الأوله والمراكب الى كليناها من الجمعية ونبدوا من جديد واخترنا الناس الى تعشمنا فيها الخير لكن والله ما طلعنا من الاجتماع لين عمك الحاج جارنا قالى يا حاج راهوا مش حايتغير شىء قلتله فال الله ولا فالك قالى خرف انت شورك ما توبش الجمعية هادى باريه على العياب وراهى والله الا زى جامع ضرار فى وقت الرسول عليه الصلاة والسلام قلتله تى شن جامع ضرار يا راجل شن جاب لى جاب قالى قتلك خرف يا شعيب تو تشوف شن يصير والله ما هو صاير حاجه لأن الجمعية فيها كونيات والجميعه كل واحد يدف فى النار لخبزته وكل جهة تبى تاخد الجمعية بيش تسيطر عليها.

المهم يا ولدى بوك شوره فعلا ما يتوبش وكلام عمك الحاج جارنا والله الا شوره حق وفعلا الجمعية اليوم ليها عام وما زالت زى قبل ما شفنا شىء ولا داروا حاجه تلفتت للحاجة وقلت لها قولى بالك دارولكم نشاط ولا دروا اجتماع حضراته النساوين بس؟ قالت الحاجه لالا والله ما رينا حاجه ولا سمعنا بشىء.

تبى الحق قبل بنقول للولد هذا الى صاير وخلاص لكن لقيت نفسى مضايقه وخلوقى فى شيشه والحاجه عارفتنى لما نكون طايرتلى، قالت لى يا حاج شنو ما زال داس؟ فرغ الشكاره وخلاص ما عاد فيه شىء مدرق وشكلك ما زال عندك ما تقول. قلت لها والله الا عندك حق خلى نفضفض تلفت للولد وقلتله انا الى مضايقنى اكثر هذه السنة انه فى السنين الأولى كان فيه اجتماع سنوى وخلاص لكن السنة هذه بصراحة حسيت ان الجماعة يضحكوا علينا ويحسابونا مغفلين وروسنا مسكرة قالى الولد كيف يا بوى؟ قلت له معقولة يظهر اعلان يقول الاجتماع الشهرى يعنى وكأنه كل شهر يعقد اجتماع وانا نعرف انه والله من الاجتماع متاع الانتخاب العام الماضى ما تم فيها اجتماع كانش لناس معينيين وبعدين لو كان فيه اجتماعات شهرية وين الاعلان عليها وين محاضرها وشن ناقشوا فيها ومن حضرها. تى والله ما عمرنا سمعنا بيها حتى فى الهدرزه. باهى تبوا اديرو اجتماع معندناش مانع لكن تكذوبوا علينا وتقولوا اجتماع شهرى تى هذا الى ما نقدرش نصدقه ولا حتى نرضى بيه تى عينى عينك كذب وزيادة تنشروه فى صفحة خونا اغنيوة الى يقروا فيها الكل تى والله انا ما فيه واحد لاقيته الا ما يقولى شن لعب الصغار متاع الجمعية شنى الجماعة يستغفلوا فينا ولا كيف. الحاج امراجع لما لا قيته امس فى بعد صلاة المغرب قعد يضحك ويقولى سمعت يا حاج باجتماعات الجالية بعد ما عفلقنى شويه وعرفنى بنزعل قالى لالا يا حاج غير اهدأ شويه المسألة راهى نكته راهى كذبة ابريل غير تأخرت شويه لا فيه اجتماعات ولا شىء ولا حتى هناك جمعية فعلية اصلا. انا فى الأول فكرت نمشىء ونفضحهم قدام الحاضرين واجدين ولا شويه ونحل عليهم لسانى لكن بعدين قلت بينى وبين عقلى توا لو كان نمشىء ونتكلم انديرلهم شان ومرشان ترى فكنى منهم.

المهم بعد ما حكيت للولد الحقيقة قالى باهى شن الرأى توا تبى تمشى ولا لا قلت له اسمع فكنى من القطاف الزايد وفكنى من الكلام على الجمعية وبالنسبة ليا انا سادنى من المراكب والكذب وبالله الذى لا إله غيره مانى عافسها ولا عاد امصدقهم وتلفتت للحاجة وقلتلها اسمعى رمضان على الأبواب ان شاء الله مبارك على الجميع وراك تقولى لى نبوا نمشوا لاحتفال الجمعية وراك ما زال تجبديها على لسانك نقصه كان احيانا الله الى العيد توا ندبروا لمه فى الحوش خير من ها القطاف والله نلمد ليك عجائز مانشستر واديروا حفله فى الحوش على لمة عصيده ولا حتى كان تبى تكبريها والله ما عندى مانع بس الله يرضى عليك ويسلمك فكينا من احتفالات الجمعية الى ما فيها غير النفاق.

اما انت يا ولد ما نقدرش نمنعك عارفك شاب وتبى تشارك اهو فيه جالية صومالية مسلمة قريبه لنا جهة جامع الفرقان امشى وشارك فيها تلقى احترامك وعلى الأقل ما فيهاش لا كذب ولا نفاق ولامين بعضهم ويخدموا بدون مشاكل.

وهيا توا نتلاقوا بعد الاجتماع والخبر توا يجيبوه الحصاده.

الحاج شعـيب / مانشستر


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home