Libya: News and Views      LibyaNet.Com      Libyan music      Libya: Our Home

send

الخميس 3 سبتمبر 2009

previous letter                 next letter                 list of all letters

سهراية الحاج شعـيب فى رمضان

السلام عليكم ورحمة الله وبركاته صحى فطوركم وصحى شريبتكم وابدانكم ان شاء الله عاد رمضانيات يا غوالى جانا رمضان والايكال السمح المرتب والتراويح والسهراية والسحور وانتم تعرفوا عاد رمضان ليه شنه ورنه غير عاد شوية دواخ واعصاب وفيه عاد بعض الناس الى تكلمه تحصل فيه حماق وباص.
المهم عمكم الحاج نهار الخميس الى قبل رمضان دار هرجه مزبعره مع الحاجة تعرفوا بدى التنقنيق من الصبح على خاطر قضية رمضان قلت لها يا حاجة اصبرى خيرك طايره وديمه وانتى راكبه فيك النار رمضان ان شاء الله يوم السبت وانت عاد تبى ((تسبقى العرس بردحة)) قالت لا رمضان يوم الجمعة قلتلها اسمعى خلى نشوفوا امتى يعلنوا عليه هنا وبعدين ليها مدبر حكيم المهم يا ستى قمعزى انتى وولدك وخليه يكتب فى ورقه شنو الى خاصك من قضيه وان شاء الله نطلع نا وياه بكره الجمعة ونجيبوهلك المهم ما تزعليش فى ها الرمضان عاد بعدين منو بينا كل شىء ولا نزعلوك ، قالت ايوه انت ديمه هذا طبعك ادير الهرجة وبعدين تطلع منها ((زى الشعرة من العجين)).
عمكم الحاج بعد المغرب قصقصت على رمضان قالولى ان شاء الله يوم السبت وها الكلام قالوه فى جامع دزبرى تعرفوا عاد احنا الليبيين الحق نتبعوا فى جماعتنا ومشايخنا. المهم ما نكترش عليكم فى الكلام نهار الجمعة قلت للولد هيا نمشوا نصلوا ومن بعد الجمعة نمشوا نيجبوا القضيه الى تلزمنا قول صلينا وخدينا الامساكية ومشينا شور دكاكين البكستان وبدينا عاد هات وجيب الى نبوه والى ما نبوشى من لحم لا خضرة لا دقيق لا دحى لا تمر لا رب لا عصبان لا شبت ومعدنوس على بوريك على غيره عمكم الحاج ما خلى شىء وبالمره عاد كل دكان يعطيك امساكية شهر رمضان المبارك روحنا للحوش والحاجة تفقدت كل شىء وقالت بارك الله فيك ياحاج تعيش وتجيب ان شاء الله هالعام وكل عام.
قول عاد نصف الليل ضرب التلفون لقيته الحاج امراجع بعد ما باركلى برمضان وجابنا الكلام لصلاة التراويح قالى ياحاج وين بتصلى ان شاء الله قلت له صاحبك زى العادة انا فى رمضان ما نصلى الا فى دزبرى ومن بدرى استادنت من الامام صاحبى فى الفرقان وقلت له تعرف انا كل عام الاوقات عندكم والتراويح فى دزبرى . قول يا سيدى الحاجة دارتلنا السحور وتسحرنا بكرى شويه وحمدنا لله وشكرناه ومسكنا.
قول فطرنا فى الجامع وصلينا المغرب وروحت للحوش نلقى عمتكم الحاجة موتيه الصفرة عاد شنو بنقوللكم ريحة الماكله لا قتنى فى العتبه هاديك الشريبه الليبية السمحة والرز واللحم والسلايط وطويسة الشاهى الخضر وما ننسوش المقليات والمشقشقات وتعرفوا برواحكم الباقى. المهم قلت للولد ترى شوف الامساكية امتى صلاة العشاء شويه والولد جانى جايب نصيب امساكيات قالى يا بوى والله ما عرفت الوقت الصح راهن محتلفات واجد قلت له كيف الخبر هذا ترى اتصل بعمك الحاج ابشير خلى نباركله برمضان وبالمرة ننشده على الصلاة فى دزبرى المهم اتصلت بسى الحاج ابشير ونشده على الصلاة قالى راهو فى دزبرى التراويح الساعة احداش الا ربع قلت له ياحاج مش الوقت متوخر شويه قالى والله هذا الى قالوا عليه . المهم توكلنا على ربى ومشينا صلينا وجبنا امساكية مسجد دزبرى وبعد الصلاة اتصلت بصحابى وقلت لهم السهراية الليله عندى فى الحوش قلنا خلى نسهروا شويه ونتسحرو مع بعض.
قول تلاقينا وحديث يجيب حديث وكل واحد بدى يحكى على اول يوم صيام وشن صارله فيه وقديش دار هرجه وشنو تعشى وغيره . الحاج امعيتيق قال يا جماعة الخير انا والله الا حاير فى صلاة العشاء والتراويح ولامساك وصلاة الفجر الحق راهو فيه فرق كبير بين المساجد وخايف غير الواحد يضيع اصيامه ومش عارف ليش الخلاف غير فى صلاة العشاء والفجر صلاة المغرب يا ودى كلهم قريبين لبعض وما فيش فرق يندكر. قلت له والله انا تبى الحق ماشى على دزبرى صحيح التراويح متيخره شويه والامساك بكرى شويه حتى هو لكن انا تعرفنى ما نخالفش مشايخنا شنو الواحد يعرفهم الا فى الفتوى ولا فى حل المشاكل وغير باهى يصلوا فى التراويح سقادى وما يعطلوش والا بعدين يخش علينا الامساك والواحد ما يلحق حتى ريحة شربة اميه يبل ريقه والنهار طويل.
الحاج فرج قال احنا والله نصلوا فى العشاء الساعة احداش الا ربع والامساك مع الساعة اربعة تقريبا. رد عليه الحاج امجاهد قاله اتى فيه جوامع العشاء الساعة عشرة وربع والفجر اربعة ومعاها شى عشرة دقايق وهذا الى مدايرلى دوخه وين تشبح الامساكيات تلقى روحك دايح وحاير فى احتلاف الآوقات. قلت خلى نغير الحديث قلت للحاج ابشير شنوا هالدوة عندكم فى دزبرى قالوا فيه مشاكل وخلاف بين واحد من مشايخ المسجد وبين شيخ آخر قالوا فى مركز البخارى ولا مش عاف شنوا رد عليا الحاج امجاهد قالى والله الا عندك حق فيه دوه صايره يا سيدى شيخنا فى وحده من الجمع خطب وغلط فى الخطبة والشيخ الثانى امتاع البخارى رد عليه وصححله معلوماته وشبخنا فى دزبرى زعل من التصحيح وصارت هرجه وكلام وكتيبه بيناتهم عند اغنيوه قلت له انا قريتها والشيخ الثانى هذا من وين ليبى لنا ولا من بلاد اخرى قالى لا مش ليبى لكن عربى قلت له وانت يا حاج امجاهد انت شنوا ريك قالى انا رأى شيخ مسجدنا غلط ومش لازم يقول هالكلام ومش لازم تكبر الهرجة لين توصل اغنيوة والكتيبه ووالكلام البطال قلت له كلا انا ليبى وزى ما قلت لك انا والله ما نستفتاش الا عند مشايخنا فى دزبرى وكل ما تصير مشكله بين الولد وشريكه فى الدكان نقوله برا لشيوخ مسجد دزبرى وشوف رايهم والحق الحق انا رانى ما نقدرش نساير شيخ اخر وزيدها يازايد مش ليبى. الحاج فرج قال فكونا منه هالموضوع كل واحد منا يرقد على الجنب الى يريحه وغير الموضوع وردنا لموضوع اختلاف الامساكيات قال والله يا جماعة خايف غير يختلفوا فى العيد كان أحيانا الله كان غير جت فى صلاة العشاء مش مشكله رد عليه الحاج امجاهد قال له المشكله مش فى صلاة العشاء زى ما قلت لكن المشكله فى الامساك بالك الواحد يضيع صيامه زى ما قال الحاج امعيتيق.
قلت له انت خود على المسجد الى تصلى فيه وخليها زى ما يقول المثل ((فى رقبة عالم ولا ظالم)) ودين ربك يسر مش عسر ((ونيتك جملك)) كل واحد يواخده ربى على قيس نيته. المهم استعجلت الحاجه فى السحور بيش عاد نتفادوا الخلاف فى الامساك وتسحرنا وكل واحد مشى للجامع الى يصلى فيه فى الفجروان شاء الله كان صارت دوه ليها معنى فى السهراية الجاية نقول لكم عليها وهيا نسأل الله ان يتقبل صيامكم وطاعتكم وعاد ما تنسوش الواحد منكم يكون شاد اعصابه شويه فى رمضان ويدكر الله راهو البصص والزعل كاثر. وتبقوا على خير ان شاء الله.

الحاج شعـيب
مانشستر / بريطانيا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home