Libya: News and Views      LibyaNet.Com      Libyan music      Libya: Our Home

send

السبت 3 اكتوبر 2009

previous letter                 next letter                 list of all letters

بالله خلـّوا نادى البارونى فى حاله

أنا نسكن فى مدينة مانشستر وأقريب لمجريات الأحداث وإللى إيصير فيها ونعرف البير وغطاه والله إلاّ الحسد واكل اقلوب كمشة ناس وخاصة الناس إللى أقديمة وإللى قاعدة أتهروك فى أمكانها وجاء نادىأصغير أسماه البارونى وكلالهم الجوماخللاّلهمشى حتى حاجة جماعة مانشستر كلهم يعرفوا لمّا إيصير دورى كلهم يدفعوا فى إشتراكات الملاعب ممكن النادى إيجيب فى الجوائز والكل يعرف أن الجوائز هى رمزية ومش مطلية بالدهب والكل يعرف ان النادى عنده عنوان عند الإتحاد الإنجليزى بس ماعنداش مقر لا إيجار ولا ملك ومش عارف على شن يكتبوا وعلى شن إيهدرزوا مرة معارضين ومرة مخابرات وياشينك حالة بالله خللوا الصغيويرة يلعبوا كرتهم وخللوا النادى على حاله ودورولكم على حاجة اديروها على حالكم خيرلكم وياريت المخابرات الليبية أتصير تخدم فى ناسها زى ما يدير نادى البارونى كان هذا إحنا من توا حاندعوله باش إيديرلنا كمشة نوادى واعلاش لا على الأقل انحصلوا منهم حاجة تنفعنا وبالك النظام بالحق أتغير قاللك مخابرات اشهد باالله انكم تفهموا بالتحليل وفك الشفرة و باهى انتم يامعارضة مش عندكم إمكانيات ليش ماديروش زى نادى البارونى وتلموا الناس إللى قاعدة مطرطشة فى كل مكان وماطروحش للبلاد وإلاّ نادى البارونى أمكوش على بريطانيا كلها وإدا كان نادى البارونى شغل مخابرات ممكن أدقوللنا شن الفايدة إللى حا يحصللوها من وراء النادى يا فهيم والدوة للكل تى هوا النادى عالنها للكل انه هو هيئة للتواصل بين البلاد وبين الجالية وين شغل المخابرات إيجى بس أحنا أولاد مدينة وحدة وأكلام المرابيع أمتعكم قاعد يوصل للكل وخللينا نتكلموا بالفلاقى والله أنا أجماعة نادى البارونى ما يعرف أى واحد فيهم إنى نكتب فى هذه الرسالة ولا خاش فى إجتماعاتهم ولا نعرف حتى وين يجتمعوا لاكن الواحد إيشوف فى العوج ويسمع فى ناس الهم واكلهم وامقلقهم ونادى البارونى دارلهم كابوس ومش عارفين حتى شن يكتبوا أعليه واحد قاعد إيمضغ ان النادى أمسجل فى ليبيا وهى ليبيا غولة حتى كان أمسجل فيها وواحد قاعد إيقول الفلوس منين إيجوا أما أفلوس وقداش هالفلوس ألف ألفين أتقوا الله ياجماعة بالله اتكلموا أبمنطق وبعدين وبعد ما قال ان النادى تابع للمخابرات يبوا النادى تندار فيه إنتخابات يا شينك حصلة وخلاص وبعدين إيجى ويقوللك أجماعة النادى إيكرموا فى ناس ما يستاهلوش ,عاد خللوكم على جهة وحدة كان النادى تابع المخابرات فكوكم منه وإلا ديرولكم نادى خير منه بس أنا وأنتم تعرفوا أنكم ماتقدروش أديروا نادى لان أنتم تخصصكم الدفنقى والدوة الفارغة واللقنى والله انا صاحب اصغيويرة واصغارى مرتاحين عالأخر فى النادى والنادى شالو هم أكبير من على أكتافى وظلم أنى انا أنخلليكم تتهجموا على هالنادى وانا واحد من الناس إللى محتك بجماعة النادى والله احرام أعليكم وأنا وأنتم نعرفوهم ونعرفوا أخلاقهم من قبل ما يصير النادى وانتم كلكم تقصدوا فى هالنادى حتى أنكم لما تكتبو ضد النادى تدكروا فى حاجات من داخل النادى زى المدرب وأصياحاته معناها أنتم لاصقين فى النادى وقضية المخابرات مش عارفين كيف نبوا أنصرفوها ووالله لو تابع للمخابرات الله ينصر هالمخابرات إللى دارتلنا مشروع ريحو فيه أصغارنا وفكوهم من الدوران فى الشوارع وحفظهم من المخدرات والمصايب إللى أنتم تعرفوها أكويس وتعرفوا شن قاعد إيصير فى أبناتنا ودرارينا هيا انا توا أبندعى للمخابرات وأنتم قولوا أمين ( اللهم أحفظ مخابراتنا على أعمالهم الصالحة وأحفظهم من كل مكروه , أللهم أجعل مخابراتنا يفتحوا لنا نادى فى كل مدينة وفى كل قرية وكل أبلاد) باهى هذا إللى داراته المخابرات وتوا نبوا أنشوفوا أنتم شن هو إللى درتوه وإلا إللى بالديروه مش عيب أعليكم أدجى مخابرات تاخد منكم الجو وأتخلليكم زى القزازين أمقاعمزين إيعيش نادى البارونى وفيه مثل أقديم إيقول إللى ما ألحقش العنقود قال قارس وفيه مثل تانى إيقول أتغرب وأكدب لكن شورهم أصحابنا تغريبتهم كانت أطويلة واجد على مستوى كدبتهم بس بالله ممكن أدقولولنا كيف اعرفتوا أنهم فى المخابرات أه أنا أنسيت لأن الوتائق تطلع بعد تلاتين سنة والجماعة ما يقدروش إيقولوا السر توا صح اكلامى وإلا لاء أنا أمصدقكم بس قصدى عالوثائق ما يطلعوش توا بس أكيد عندكم شريط فيديو فيه الدليل على أن جماعة النادى تابع للمخابرات أه مسحوه الصغار بالغلط لا حول ولا قوة إلا بالله وياريت نادى البارونى يسمعوا فية وديرولنا بيان إيوضحولنا شن موقهم من إللى قاعد إيصيروأنا من توا والله نبصلهم بالعشرة إنى أنا أمعاهم تابعين للمخابرات تابعين للمعارضة حتى كان تابعين للجماعة إللى مجننهم النادى المهم يخدموا جاليتنا وأحنا والله ماشفنا منهم إلا كل خير بس لو أنتم ياجماعة النادى فى المخابرات معناها فيه اعجوز أدعت أن ربى يهدى المخابرات الليبية والدعوة كانت فى شهر رمضان فجيتوا أنتم ناس طيبة والله تعجبنى يا نادى البارونى يا زايد همهم وياحارق دمهم وللحديث بقية .

الناصر بالله إبن المقفع


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home