Libya: News and Views      LibyaNet.Com      Libyan music      Libya: Our Home

send

الجمعة 2 اكتوبر 2009

previous letter                 next letter                 list of all letters

الحاج شعيب : هدرزة العيد

السلام عليكم وكل عام وانتم بخير يا جماعة بمناسبة عيد الفطر المبارك وتو عمكم الحاج بيحكيلكم عاد على شنو صار فى العيد وحفلاته المختلفه. تعرفوا عاد انا من قبل وافقت للحاجة والعويله انهم يمشوا لحفلة نادى البارونى وعطيتهم الفلوس وثانى يوم تبوا الحق رجعت فى كلامى وصكرت راسى ورجعت الفلوس من الولد وقلت لالالا ما فيش مشى . لكن على ما حاولت مع الحاجة تفكنى من الحفلات وسريبها صكرة راسها وحلفت كان ما تمشى لوحدة من الحفلات على الأقل ماهى معيده معانا وبتمشى حرجانه عند خالها فى مدينه اخرى ببرطانيا والحق عمكم الحاج فكر فيها هلبه ولقيت نوافق للحاجه خير من تشريد العويله فى هالعيد المبارك وتبو الحق صاحبى الحاج امراجع تتدخل وحلف لى ما تزعل العويله قول يا سيدى وافقنا لكن بشرط انها ما تمشيش لحفلة نادى البارونى قالت هى فيه حفلة غيرها على توا؟ قلت لها شوفى بالك فيه جهة اخرى توا تعلن على حفلة المهم الحاج امراجع قال اسمع ما فيش غير حفلة البارونى الآن وانا العويلة ماشيين خليهم يمشوا مع بعضهم قلت يالله باهى امشوا لكن زى ما قلت لكم ما تفتحوش افامكم غادى الدنيا متخلطه الحاجة فرحت ودعتلى بطول العمر. كيف عاد بالله عليكم مش بعلها وعشرت عمر.
المهم الحاجة مشت للحفلة نهار الآثنين وعمكم الحاج قعدت انا وخوى امراجع زى البوم بروحنا قالى بالله لوكان مشينا مش خير من هالقعده قلت له يا سيدى ما فاتك شىء كان تبى تمشى الوقت مازال حفلتهم عالخبر من الساعة 6 حتى 11 فى الليل وسهرتهم مطوله تقدر تلحق لكن انا حالف عليها ما نمشيلها شنو تحسابنى قطوس (( نقذف ونلغى )) انا عندى مبدأ قالى باهى اهى الجمعية قالوا حتى هما بيديروا حفلة وانت الجمعية عندك معاهم خلاف على خاطر الاجتماع الشهرى ولا نسيت معناها ما تبيش تمشى للحفلة قلت له صحيح عندى معاهم خلاف وانا ما قلت غير الحق وزعلونى يوم الاجتماع لكن انا نبى نمشى للحفلة لأن جماعتى اكيد كلهم بيمشوا وانت واحد منهم قالى والله الا عندك حق ننحرموا من حفلتين يا ودى هالكلام ما يصيرش.
قول يا سيدى الحاجة روحت من الحفلة فرحانه وزاهيتلها الحضيره والصغار روحوا حتى هم فرحانين وجايبين نصيب العاب والبنيه مزوقه وجهها تقول غير شيشبانى والحاجة جت بتحكيلى على الحفلة وانا زى ما تعرفوا طايرتلى وجايتنى قوز قوز من البارونى وجماعته قلت لها فكينى توا ما تقولى لى شىء الحاجه شورها مروحه معبيتها اوكال والصغار حتى هما كلهم دخلو لفراشاتهم رقدوا.
نهار الجمعة الصبح بعد ما الحاجة دارت لينا عصيده وفطرنا قالت لى يا حاج نبى نستادنك رانى بنمشى لحفلة جمعية المرأة فى جامع دزبرى قلت لها نعم؟ وين هالحفلة هذه ما سمعناش بيها وما فيش عليها اعلان زى البارونى وجمعية الجالية ولا حفلة خاصة قالت والله انا ما نعرف حاجه دايرين اعلان ولا لا ما نعرفش وافهمها زى ما تبى المهم انا معزومة من الحاجة مرت الحاج حوسين قلت لها والصغار منو بيهم؟ قالت ارفعهم معاك راهو غادى ممكن ما يبوش صغار وانا بنرفع بنيتى بس والناس كلها رافعه صغارها لحفلتكم فكنى منهم خودهم معاك ولا خليهم فى الحوش الحق طارتلى قلتلها باهى والله تو عقاب عمرى نقعد نكركر فى الصغار ونجرى فى جرتهم قلت خيرك مش غير انت راهو الناس كلها رافعه صغارها وتو تلقاهن غادى قدامك قلت لها توا زعم حفلة المرأة هذه صحيحة بالك غير مقلب لأنى والله ما سمعت بيها قالت قلت لك فيه حفلة وبنمشيلها خيرك ياراجل ادور فى الدوه!!! المهم قلت لها باهى امشى غير ما تعطليش. قول يا سيدى نهار الجمعة مشينا لحفلة الجمعية وتلاقيت انا وصحابى ومعارفى مش كلهم لكن باهى اغلبهم وتعرفوا عمكم الحاج اصحابه معدودين والحق الجماعة مش مقصرين الشاهى والقهوة والحلويات وسندوتشات الحرايمى والله كول ما تبى حتى 5 انصاف والبطاطا للصغار والمشروب والصغار لعبوا على النطاطه وجايبين شايب رومى يضحك فى الصغيويره وزى العادة جابوا الى يزوق فى الصغار والحكاية امبحبحه الحق.
قول كملت الحفلة متاعت الجمعية وروحنا ومشى الولد جاب امه من حفلة المرأة والحاجة مشت دارت عشاء للصغار وطاسة شاهى اخضر شنو الواحد واكل حرايمى. وبدى عمكم الحاج عاد زى العادة تقصقيص قلت لها شنو حال حفلتكم متاعة المرأة اكيد مزبعرة الحاجة الحق شكلها مش مزبوط وما هيش طربانه ردت عليا قالت باهيه وسكتت قلت لها خبرينى بالتفصيل عاد قالت شنو بنخبرك الحق الحق والله الا عارفاتك لو نقول الحق توا تزعل وتقلب لينا الليله نكد قلت لها ليش قالت والله يا حاج تبى الحق الحفلة المليحة والمنوره حفلت نادى البارونى والله الى دفعناه ما هو خساره فيها والله انا والبنيه الا فرحنا وبيتى لعبت وتلاقيت انا وهلبه نساوين من كل مكان صح هلبه ما نعرفهمش لكن الحق الجو تقول عرس مش حفلة عيد. تلفتت للولد وقلت له بالك حتى انت بتقولى ما كليتش وما حصلتش العاب وهيجت فى حفلى الجمعية. يالا نوض كل واحد يخش فراشه ما فيكم غير تكسير الرأس.
وقعد عمكم الحاج يتمتم بروحه قلت والله انا جماعة البارونى ما نطيقهمش وما عنديش ليهم خلوق لين نعرف شنو هما ومنين وشنو برنامجهم هالعرب مش ساهلين وانا لا يمكن نمشى ليهم ولا نحضرلهم محضر الحاجة سمعتنى قالت خيرك ياحاج تكلم فى روحك العفوا بسم الله الرحمن الرحيم قلت لها بالله فكينى من سوك وادمدرى فى فراشك راهو جوى حسه تعكر وجماعة البارونى ما يخلوا حد مرتاح حتى فى حوشه ما ليقت ميعاد الا ويتكلموا عليهم شنو هالمصيبه الى حصلنا فيها فى مانشستر تو مش كنا مرتاحين لا جاليه ليبيه لا غيرها لا حفلات لا رياضه جونا قلبوا البلاد وخلونا تقريب الواحد يشك فى روحه مع المعارضه ولا مع الدوله ولا مع روحه .
وتوا عمكم الحاج بيرقد وان شاء الله مع تقصقيصه اخرى كان لقينا اخبار مهمة .
وتصبحوا على خير والسلام عليكم ورحمة الله وبركاته .

الحاج شعـيب
مانشستر / بريطانيا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home