Libya: News and Views      LibyaNet.Com      Libyan music      Libya: Our Home

send

الثلاثاء 1 ديسمبر 2009

previous letter                 next letter                 list of all letters

الحاج شعيب : تقصقيص فى السياسة

السلام عليكم ورحمة الله كيف حالكم يا جماعة الخير وكل عام وانت بخير وعمكم الحاج والله لعند يوم الوقفه ما حصلت واحد من الجماعة الى ينسقوا فى الضحايا المهم قمعزت نا والعويلة كلهم وقررت بنتبرع بضحيتى لوحدة من العائلات الفقيرة فى وحده من الدول، تبو الحق الحاج امعيتيق صاحبى القديم قالى تبرع لعائلة فى ليبيا قلت له انظنى فيه عائلات افقر من الى فى ليبيا والمسلمين الى فى ليبيا ما ينخافش عليهم وخوتك الليبيين ما ينسوش بعضهم فى هالعيد المبارك وانا نريد نتبرع لعائلة من الدول الفقيرة المهم امشيت عطيت الفلايسات لصاحبى الشيخ عبدالله فى الجامع وريحت روحى من هالقصة.
وعمكم الحاج مشى خدى سقيطه فرشكو فيها العيال والعيد شنوا فى الغربه شوى فى اول يوم بس واقلب الصفحة وارجع للكساد كيف قبل.
المهم مش هذا موضوعنا عمكم الحاج قرر يقصقص على السياسة فاضى وما عنداش ما شاغله قلنا خلى نقلبوا على جماعة السياسة نقصقصوا عليهم ونجيبوا خبرهم ، قانا خلى نبدو بالجماعة المعارضه والحق انا والله قبل ما عندى رغبة فى التقصقيص عليهم لأنى ما نيش متاع سياسة ولا نتبع فيها والسياسة مدرهتلى كبدى من الى صاير فيها ولكن الى خلانى نقصقص ونحكى ليكم والله الا شىء كبير وبصراحة الواحد معادش قدر يسكت على الى صاير والمثل الأول يقول ( تغرب واكذب ) وهذا الى صاير على الأقل عندنا فى مانشستر، عارفكم بتقولولى كيف وشنو صاير وشن قصدك يا حاج تو بنجيكم بالكلام امغير اصبوا شويه نكمل الهدرزه.
المهم تعرفوا عمكم الحاج لابد كل يوم يفتح صفحة خونا اغنيوة ويشوف شنو فيه جديد والحق اغنيوة الوحيد الى ما يدس شىء باهى ولا شين مليح ولا قبيح وما يتحشم من حد الى تكتبه تلقاه تبو الحق مره مره نلقى فى دراه كبد وكلام والله حتى الدجاج ما يرضاش ينقبه لكن نقولوا الصبر يا رب بالك هالناس تتحشم على وجهوها ويبطلو هالصراكه لكن ما فيش فايده ومرات تلقى عرب ما لهاش صنعة غير تكبير الشورّخ والفتنة بين الناس ويديروا( من الحبه قبه ) لكن هذا مش موضوعنا تو بعدين نلهى بيهم ونقصقص عليهم ونفضخهم عند اغنيوه والحى يسمع، تو انا بنحيلكم على جماعة اخرى المهم فى عدة مرات نلقى عند خوى اغنيوة مويضيعات تخص جماعة المعارضة والحق والله الا نتابع فيهم وفى هلبه كلام يقولوا فيه والله الا يمسح على القلب وعندهم الحق لكن الى قاهرنى مره مرة يديروا فى شنو يسموا فيها هاذى الى سماها مظاهرة ولا اعتصام ولا ابصر شنو، قلنا باهى ما فيش باس هذا شىء كويس كان يتلاقو الناس الباهية والمحترمة والى عندها كلمة واحترام عند العرب المهاجرة ومرة مرة نلقى فى قائمة للمعارضه تبو الحق نقرى فى جميع الأسامى الى فيها كلهم. فيه الى نعرفه وفيه الى ما نعرفاش.
عمكم الحاج من زمان داير هالموضوع فى راسى ونبى نحكيلم عليه لكن كل مرة نقول هيا بالك هالجماعة غير دافيلهم مركب ومكبريلهم راسهم وضاحكين عليهم اصحابهم. لكن تبو الحق الجماعة صدقوا ارواحهم وكل مرة يعاودا فى الكره، وبيش ما حد يلوم عليا ولا ياخد الموضوع بشكل عام ويحسابنى ضد المعارضه نبى نقول ليهم لالالا رانى ما نقصدش المعارضه المحترمه والناس الباهية وصحاب العقل الزين والكلمة ولا نقصد الناس الى ما نعرفهاش كلهم عندى محترمين لين نقصقص عليهم لكن انا الى نقصده جماعة معينه اهنا فى مانشستر نعرفوهم كويس وهما يعرفوا ارواحهم مليح وبدأت القصة معاهم لما لقيت اسماهم فى الليسته الى تعارض فى زيارة القذافى لأمريكا والله لما قريت الليسته مع احترامى للكثير من الموقعين والباصمين عليها لكن تبو الحق قعدت نضحك لين اطلع صوتى بره للشارع جت الحاجه قلت خيرك يا حاج ان شاء ربى يعطينا خيرة هالضحكه قلت لها اسمعى الموضوع مش شورك بري على حالك المهم اتصلت بصاحبى الحاج امعيتيق وقلت له يا حاج افتح صفحة اغنيوة واقراء الليسته متاع الى معارضين مشيت القذافى لأمريكا وشوف الأسماء الى من مانشستر قالى الحاج انا قريتها قبلك وقلت سبحان متبث العقول قالى الحاج امعيتيق توا بالله عليك الى كاتبين قدام اسماءهم واحد ناشط حقوقى ليبى والأخر ناشط حقوقى واعلامى والى كاتب باحث اجتماعى ومعاها حاجة اخرى والى داير روحه ناشط سياسى ليبى والى مدرى ايش بالله عليك هادوم يتحشموا على انفسهم وهما مش عارفين ارواحهم ويعرفونا نعرفوهم ليش دايرين هكى ولا زعم فيه حاجه اخرى ، قلت له اسمع انا حسب اعتقادى الجماعة لما قالولهم وقعوا تو تحصلو مشيه بالبلاش لآمريكا وخلينا نحطوا قدام اسماءكم حاجة كبيره بيش الجماعة يقتنعوا بيكم وتعرفو المشيه غادى ليها شنه ورنه والى انتم تبحثوا عليه راهو غادى فى امريكا كاثر وارخص من هنا. الجماعة ضربت فى راسهم وقالوا خلينا نركبوا الموجه ونمشوا على الأقل نحصلوا نغيروا الجو ونضربوا ليلتين ولا ثلاته فى دار السلطان الكريمه والمهم التموين متاعنا كاثر غادى ورخيص وتعرفوا عاد شنو القصد بالتموين ضحك الحاج امعيتيق وقالى اسمع يا خاج فيه خد فى جنبك يسمع فيا قلت له لالا انا بروحى قالى ما تواخدنيش فى هالمثل ياحاج ( لو كان ما نعرفك يا ؟؟؟؟؟ نسميك العطاره) والجماعة هذوا نعرفوهم هما فيهم الى ما يعرفش روحه هو شنو ولا يعرف حتى كلمة معارض ولا ناشط سياسى ولا حقوقى شنو معناها بالزبط المهم قلت للحاج معيتيق توا انا بنمشى نجيب اخضيره للحوش وبعدين نتلاقوا سكرت السماعة وطلعت لدكان الباكستان متاع الخضرة ودباير الماكله تلاقيت انا وصاحبى الحاج ( ؟؟؟؟؟ ) ما نقدرش نقول اسمه راجل محترم وراس كبير فى مانشستر وهدرزت معاه فى الموضوع وقلت له انا ما ريتش اسمك فى القوائم متاعت معارضه مشيت القذافى لأمريكا ولا لقيته فى ليستات اخرى ضحك وقالى باختصار يا حاج شعيب هذا الوقت مش لينا وانا هذا الى خلانى ما نقدرش نطلع جنبهم ولا اسمى يكتب معاهم شنو يقولو الناس عليا الحاج فلان يتبع فى شلة (؟؟؟؟؟) اللهم استرنا يارب العالمين. الليبيين فى ما نشستر يعرفوا ( البير وغطاه ) وياحاج شعيب فكنا من هالموضوع وقولى شنوا حال الحاجه والعيال. قلت له بارك الله فيك ويطول عمرك وحملته السلام للحاجه عنده والعويله كلهم. وتوا عمكم الحاج يبى يقول ليكم بيت شعر معروف فى الوطن ( يا نويرتى ماعاد فيه ابادى *** البل فى الزريبه والغنم فى الوادى ) والعاقل يفهم .
المهم التقصقيص ماشى وبالله الى عنده بيهم علاقة كويسه ولا يتحشموا منه يمشى يقول للجماعة قمعزو فى بيوتكم اشرفلكم وفكونا من وجوهكم على الأقل الناس الثانية تحترم المعارضة الليبية وحتى احنا نحترموهم لكن انتم ما تخلوناش نفضحوكم بالاسم ونفضحوا تقمعيزاتكم الخاصة وعلاقاتكم المشبوهة خلوكم فى حالكم و!!!!!!!! .
المهم عمكم الحاج انا والحاجة كل واحد منا ماشىء لحفلة عيد مختلفه عمكم الحاج ماشى لحفلة الجمعية وان شاء الله يكثرو لينا الماكلة زى حفلة عيد الفطر ويكثرو الحرايمى والبشكتى ويجيبوا لينا المهرج الأول الى لعب الصغيويره ولا زعم توفى لأنه كان مسكين شاد روحه غير بالعافيه على قولت خوتنا المصريين لكن فرح العيال ولا انقول ليكم الى جاى للحفلة يجيب معاه ماكلته واللحم ونشوو غادى خير والحاجه هيا وبنتها الله غالب ما فيش صبايا فى حفلة الجمعية خليها تمشى وين تريد ما نيش حارمها.
توا عاد تبقوا على خير وكل عام وانتم طيبين وراكم تكثرو الشوى ولا العصبان.

الحاج شعـيب
مانشستر / بريطانيا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home