Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

الى السيد فوزي عـبدالحميد / المحامى

لقد أطلعت على رسالتك الموجهه لسفير الجماهيرية العظمى فى بيرن بسويسرا بخصوص طلب تعويضكم ماديا فى عقاراتكم وحسباتكم المصرفية والتى تم الأستيلاء عليها من قبل الثوريين الغوغائيين فى مدينة بنغازى وكذلك تعويضكم على سنوات الغربة والمعناه التى عانيتها خلال غربتك وتشريدك من بلادك منذ أكثر من 28 سنة.

والله طلبك منطقى وحقك فى التعويض حق مشروع ولاغبار عليه... بس يأستاذ فوزى... السيد سفير ليبيا فى بيرن/ سويسرا هو عبارة عن موظف مأمور وليست لديه صلاحيات تخوله بدفع تعويضات أو كفالات الا اذا كان الآمر متعلق بـــ.......عليك نوووور....أبناء العائلة المالكة لثروتنا وحاشيتهم....هذاالسفير مسكين ماعنده مايديرلك وبالك موش موجود فى سويسرا بكل بعد فيلم الهانيبال وعارضة الأزياء الآخير.....

تعرف من اللى عنده أفلوس ليبيا كلهن ويشرتع فيهن شمال ويمين بلاحسيب ولارقيب واللى أنامتأكد موش حيرفضلك طلب....أيوه عليك نوووور ....سيف الأسلام....أنا فى رأى أتغير عنوان رسالتك وتبعثها لسيادة الرئيس سيف الأسلام اللىقاعد يصرّف فى فلوس ليبيا من غير حسيب ولا رقيب وأنا متاكد موش حيرفضلك طلب ياأستاذ فوزى.......راهو سيف ياأستاذ فوزى حشيشته تعويضات ... مافيش حد يطلب تعويض اللى مايعطيه له (وفوقة بوسة كمان ...زى مايقولوا المصرية) هو أيدور بس على حد يبى تعويض.... الفلبينيين عوضهم، الأمريكان عوضهم، الفرنسسيين عوضهم، البلغار عوضهم، الأرلنديين عوضهم،واليهود عوضهم، واهم التشاديين يبى أيعوضهم....سيف الأسلام مشكلتة أنه مايتحملش أيخلى فلوس ليبيا فى الخزانة واللا يعملوا بيها أى مشروع تستفيد منه ليبيا ....مايقدرش هو هكى زيى بوه بالضبط مستعد أيطرطش فلوس ليبيا فى كل مكان أخر بس موش ليبيا...شوف بوه على سبيل المثال ...يمشى أيزور جنوب أفريقيا ويكب فى سياره أوتانتا بالريموكو مليانة أشوالات دولارات من فئة الــ100 دولار ويربخ فيها تشرتيع فى الدولارات على الناس اللى يجروا وراه ....أيتكى عاى بوركينة فالصوا أيدحلهم 5 مليارات دولار كاش ويبنيلهم فندق خمسة نجوم من 7 طوابق، مجمع تجارى متكامل ومصرف (بنك) بفلوسه بكل ، ثم يذهب الى أوغنده ويتبرع ببناء جامعة كاملة بجميع ملحقاتها بما فى ذلك بيوت الطلبة التابعه للجامعة وكذلك طريق سريع يقطع أوغندة من شرقها الى غربها، ويزور السودان ويبنى لهم برج تجارى فى الخرطوم يسمى ببرج الفاتح (سوف يتم أفتتاحه فى الفاتح من سبتمبر القادم) ويمشى المصر ويدح 10 مليارات لبناء مدينة "القذافى" فى ضواحى القاهرة من غير عشرات الملايين اللى وزعهن على بدو مصر والصعايده...والأن يفكر فى أنشاء مدينة فى مطروح أسمها "مدينة الوحدة"....واهو السيد أحمد طراش الدم يرغب فى أستثمار 150 مليار دولار فى مصر ....ابلاد واغمه ... أنا أنقولك عليك وعلى سيف ...وبعدين موش هو أبعظمة السانه قال كان فيه حد وقع عليه ظلم يكتبلى طلب يوضح مدى الظلم الذى وقع عليه وهو سوف يأخذ له حقه ويتم تعويضة....

.وبعدين ليش يأخى أتنقص من قيمتك وتطلب فى 100 مليون دولار بس...والله موش خير منك الميريكان اللى عوضوهم بــ 3 مليارات دولار....على الأقل أطلب التعويض باليورو موش بالدولار...

أرجو لك التوفيق فى طلبك وفى الحصول على تعويض قيّم....وردبالك تنسانا من الحفلة راهو حتى نحنا رقاد أرياح يأستاذ فوزى وعندنا فيك حق... أهو أقل شىء قدمنالك النصيحة.

الحاج عوض


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home