Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

حركة بصيص الأمل : بيان

أيها الإخوة الليبيون الشرفاء ويا أيتها الأخوات الليبيات العفيفات:
السلام عليكم وأسعد الله صباحكم ومساءكم أينما كنتم وحيثما حللتم

رسالة من القلب إلى الشعب الليبي

عيب عليكم أللي إتديروا فيه – لا عاد فيه حيي ولا أخلاق وما تلقى إلا قليل الأذب وخوه –تتي وين النخوة والشهامة أللي كنتم مشهورين بيها – بالله عليكم إتخلٌوا في واحد هرواك يتحكم فيكم لمدة أربعين عام والمصيبة ما زال تتوقعوا خير من وجه الشكورطة -- راهو كليتوها فلق – توا عرفتوا سياسة أقطع راسي وقص وأللي ما يدير شي ما يلقى شي هي سبب البلي كله – تي والله حرام عليكم أللي إتديروا فيه – كثرة النفاق والكذب والتبلعيط علي بعضكم هو أللي جابلكم الفقر والمرض والعازة – حتى خوتكم من دمكم ولحمكم لحمتوا فيهم – وينك يا قطعة أرض ملك لإخواتكم تلهطوها – وينك يا إحياش ملك ناس تانية تنقزوا فيها – وصل بيكم الظلم والحسد والحقد إلى حد ما بديتوا تتجسسوا علي خوتكم وأقاربكم من دمكم ولحمكم لصالح واحد شلافطي جاي من قعر سرت وحتى أصله ما زال مشكوك فيه – راهوا معمر مش مسئول بروحه عللي يصيريلكم – هو عبارة عن واحد مغندف جابوهولكم وحطوهولكم غصبا عليه وعليكم وينفذ في الأوامر .

يا جماعة الخير راهو إحني أللي برا إستاقضنا بكري وأللي طلع علي حسابه طلع وأللي طلع علي بعته طلع وقررنا نقعد برا بكرامتنا خير ما نعيش تحت حكم كمشة إحمير أكرمكم الله – والله إحني إنديروا أللي نقدروا عليه بيش نفضحوا وجه الكرنافة ولكن في النهاية المسئولية مسئوليتكم أنتم أللي في الداخل .

والله لو كان مش علي سبب حفنة التراب أللي إستشهدوا من أجلها إجدودنا وعلي شان القلة من الليبيين الشرفاء أللي صمدوا بالرغم من كل البيبان أللي سكرها النظام في وجوهم بيش يركعوا زيهم زي غيرهم لنسينا ليبيا وغنتها .

يا جماعة مش حرام لما تسمعوا بفرخه في جامعة قار يونس فاصلينها من الجامعة لمدة ثلاثة سنوات ومع هذا تمٌشي في الطروح علي بوها على أساس إنها مواظبة على الدراسة ويستمر هالغبي في رفعها وجيبانها بدون ما يعلم شن أللي صاير وشن ال لفالط أللي بنته إتدير فيهم – مش هذا شي إيشرك الشلاتيت – إلشفع يا رسول الله .

أهو تقريبا كل يوم تشوفوا في محطة القنفود كل مرة كبسة علي مهربي الهروين وكأن هذي الجرائم صارت أمس مش من عشرات السنين أللي فاتت – يعني يبوا يورونا أنهم بيديروا حاجة لهالمشكلة بعد ما الشباب ضاع وعائلات إتدمرت .

بالله عليكم شوفوا خوتكم الطلبة الليبيين في أمريكا أللي جوا أخيرا علي حساب البعتات وكيف إيعامل فيهم النظام ويصرف عليهم مبالغ غير كافية حتى خلتهم يعتمدوا علي معونة الحكومة الأمريكية من الجبنة وحليب الأطفال وخلتهم يمشوا لسوق العتق الأمريكي بالك إيحصلوا علي حاجة مستعملة يرقدوا عليها وحتى بناتهم واولادهم قعدوا إيقٌروا فيهم في المدارس الأمريكية العامة بالبلاش وهذا سيترتب عليه مصائب أخلاقية وخاصة لبناتهم أللي يقروا في المرحلة الثانوية – ولو كان مش لمساعدة خوتهم الليبيين المقيمين لكثير منهم لصارتلهم مصايب لا تغفر – أما السفارة متاع النظام همها الوحيد التنكيد علي الطلبة بدل التسهيل وزيادة المرتبات لأن من حقهم إيعيشوا حياة معززة مكرمة بعد القهر أللي إتحملوه طوال فترة ترعرعهم في ليبيا .

راهوا كل شي واضح وبالمفضوح توا – وقل على ليبيا السلام – إنقولولكم راهوا المليارات أللي يخنبوا فيها القطاطيص المنفوخة والبنية التحتية المتدمرة لا تعني شي مقارنة بهدم الإنسان الليبي ودمار شامل من جميع النواحي سواء كانت أخلاقية أو إجتماعية أو دينية أو حتى كرنكاطية إلا من رحم ربي بالطبع – هذي هي المأساة بعينها وأللي تاخذ مئات السنين بيش نقدر نبني جيل جديد يذكرنا بالأجيال أللي فاتت .

أسمعوا كلام الحق ولو كان وجاع – راهوا السبب الحقيقي في أللي صار فينا هو إحني ولازم نغير من سلوكياتنا حتى تولي ليبيا لينا أحني مش لي كمشة بزقليف .

الحل الوحيد قدامكم هو الندم عللي فات وما تخلوش الوجوه المقلبه يتحكموا في مصيركم ويستمروا يضحكوا عليكم بكمشة فلوس وتستغفروا ربكم وفي النهاية راهوا الجهاد واجب للدفاع عن الشرف والمال والأرض .

والسلام عليكم
حركة بصيص الأمل
libyaforlibyans@maktoob.com
libyaforlibyans2008@yahoo.com
23 مايو 2008


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home