Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

يزّينا عـاد! التوري الحقـّاني لازم يحسمها مع التورانجيستا!!
أول أسماء شركات الخنّـابة التوراجيستا!!

يا جماعة يا موسيلماني، يا مسلمين، يا أمة محمد .. تا كيف صار عاد؟ لا أمتى ها التوليدة امتاع سيدي لصلاح هادايا؟ آهو أني غالب في روحي، المالاتيا.. لمرض راكبني من كل جيهة .. لي تلات شهور قاعد برّة، نعاني في الرويحة .. فيكيايا.. كبر يا كبادي ... قالولي رَيّح روحك يا حاج.. وبناتي الله يبارك فيهن، واقفات جنبي كيف زقرللوات الأمن متاع لحكومة.. كول هادي.. ما تاكلش هاديا .. مفيش نيت.. مفيش كتيبة.. مفيش قراية، توا بالله عليكم هادي معيشة؟

لكن أهو عفست اليوم، وحلفت بالطلاق للعزوز... جابتلي اللاب توب.. الكومبوتر (شورها خايفة تريح منها الورثة.. امغير أعبي يا حاجة) ... وقعدت ساعات وأني نفتش ونقرا، لغاية ما انسدت روحي وغلقت ... شن مازال؟

ما عاد فيه واحد إلا ويحكي على الريفورما.. لصلاح .. آخر شي حتى بعض جماعة التوريين... لكن أني إللي نشبح فيه.. بير توتو.. على كل حال ما يصير منّه شي.. إلا لما تقوم جماعة السكوادرا متاع اللجان التورية، اللي يحبوا بلادهم ليبيا، ويحبوا التشيتاديني.. لمواطنين امتاعها.. واللي ما هدروش دم حد.. واللي ما نهبوش.. واللي ما سرقوش، هادومايا لازم يقوموا قومة راجل واحد.. ويعطو لليبيا فزعة.. ويخلـّصونا من ها الجثامة اللي قاعدة فوق صدورنا...

نقصد بالواضح.. لكيارو.. جماعة مكتب الاتصال لقديم.. اللي كبروا ف الفساد، وصاروا يلبسوا في بدالي وقراويط وكاسكيتات (خيرها طواقينا؟).. نازلين من طيارة، راكبين طيارة.. مكاتب زي متاع البيت الأبيض، والا البالاتسو كيجي متاع روما.. سكرتيرات من كل لون وشكل، فيلات تقول قصور الف ليلة وليلة.. فيها حمامات سباحة.. أو حتى بوسكو.. حديقة حيوانات.. كراهب ما تعدش.. م البي إم.. للأودي.. وتوا قالوا حتى كايلاك وهامر.. صغارهم يقروا ف بر لنكليز والميريكان ..

هادولا يا خوتي ما يسلمـّوش بالساهل.. لازم من قويرّا معاهم .. لازم التوري الحقاني بالصحيح يوقف ويدير واجبه، ويحمي البلاد من شرورهم .. هادولا يحبوا إيفشّكوا الإصلاح.. خاطر خايفين على قريشاتهم وكراسيهم.. لا يمكن.. إمبوسيبيلي دي توتّو.. يتسقم حال البلاد وهادولا قاعدين هني ..

احنى لمساكين لمواطنين الييزاني.. ما نسقموش نعملوا حاجة.. عندهم سلاح.. عندهم تروة.. عندهم سلطة.. يا جماعة أني دايخ... شن لازمتهم الحراسات اللي تتبع فيهم وين ما يمشوا؟ همّا خايفين من حاجة؟ خايفين من الشعب يستاقظ؟ والا خايفين من الفورتسا أرماتا.. القوات المسلحة الامبيريالية الاستعمارية الرجعية الميريكانية لنكليزية الصهيونية؟ .. تا شنوا دياولو ها لكلام؟ .. خايفين مننا إحنى؟

إحني ما عندنا غير الحسرة .. لا عندنا لا تروة لا سلطة لا سلاح لا دياولو .. خدوهم أكّل!

التخلص مش مهمتنا.. هادي مش مهمة الزقرللوات.. ماهيش مهمة القوات المسلحة.. ماهيش مهمة البوليتسيا.. الشرطة .. هادي مهمة التوريين الناصحين.. اللي ما عندهمش حسابات في سويسرا.. اللي خايفين ع البلاد ... اللي عمرهم ما تعدوا على بنادم ... خاطر يعرفوهم مليح.. وعارفين جرائمهم .. واني متأكد عارفين حتى وين داسّين فلاويسهم ..

اليوم اللي نتخلص فيه من ها السكوادرا الخامجة.. اللي ليل نهار قدام الناس تهتف وتصرخ بالمباديء والمقولات والهتافات .. ومن ورا الناس تخنب وتسرق وتسكر وتزنى وتفصل في مؤامرات .. وتخوّن في فلان .. وتصنّف في علان .. نحّوا فلان .. بطلوا فلان .. فلان خاين .. فلان مشكوك فيه .. فلان حزبي .. فلان من جماعة بن لادن .. فلان إخوانجي .. فلان رجعي .. الخ.

لكن لما يطلعوا تريس ما يخافوش باش ينظفوا لبلاد من خماج الريفوتي.. المخلفات.. الكناسة.. اللي يمصـّوا في دمنا .. وقاعدين واقفين في وجه كل واحد يقول كلمة جوستو طيبة!

يا جماعة خودوها مني .. راني شيباني.. وعشت هلبة .. وياما شبحت .. الناس في بلادنا يعرفوا كل واحد ف مطراحه .. ناسنا يعرفوا الخامج .. ويعرفوا التريس من ضنوة التريس لمسقمين المتربيين .. يعرفوا السرّاق .. ويعرفوا الشريف ..

تبّوا إصلاح اقتصادي بالصحيح مش كلام تخرييط؟ ...

تبّوا إصلاح سياسي باش تتعدل أمورنا وتولي مريقلة؟

لازم أصحاب مشروع الخير يطبّصوا في تنظيف الحوش الجواني .. الحوش الدكنوني .. حوش التوراجيستا .. هادوما اللي واخدين التورة حرفة وصنعة بطــّال .. ناقص علهيم يكتبوا في البطاقة الشخصية (المهنة:.. توراجيستا ، يعني توري) .. يعني خانب كدّاب .. يعني أرّيفيستا.. وصولي انتهازي منافق دهقان.. ولازم يكتب في السيرة الذاتية (الهواية: التسلط على رقاب الناس وتغبير أحوالهم) ..

البوبولو متاعنا.. شعب ليبيا.. يعرف كل واحد ف مطراحه.. يعرف شكون خنق العباد وعلقهم في المشانق .. وشكون حط أولاد الناس المسقمة في الحبوس سنين وسنين بالكدب والتزوير والتلفيق.. تقولش عليهم إلا جماعة -الكونتي دي ساد- هاداي متاع "السادية" .. اللي ما يتكيّفوا إلا بتعذيب الناس وضربهم بالسوط والفلقة ومعاملتهم كيف البهايم ...

هادي الماركة العلامة المسجلة هيا اللي توا قاعدة واقفة بالمرصاد لكل عملية إصلاح وعلاج.. وما تبيش لا تراسبارينزا.. شفافية.. ولا محاسبة.. ولا قانون .. ما يحبوش إلا قانون الجونقلة الغابة ...

اليوم اللي يتنحوا .. وإن شاء الله قريب .. هاداك اليوم حتى لو حانت ساعتي، نموت مرتاح على بلادي وناسها ...

يا جماعة الخير الصلاح ...إذا مافيش حسم مع المتسلقين الوصوليين التوراجيستا .. مفيش لا إصلاح لا دوة فارغة ...

المرة اللي فاتت قلتلكم عندي ليستة طويلة عريضة أكثر من 115 اسم شركة وهمية متاع خنبة وسرقة وسراكة بطالة .. معظمها يستعملوا فيها جماعة التوراجيستا ..الإيبوكريتي.. المنافقين الطبالين الزمارين ...وفيه منهم أمناء لجان شعبية عامة.. اللي ولّت لجان شعبية خاصة من زمان...وريقاتي في طرابلس .. لكن أهو نعطيكم بعض منها ما زالوا في راسي.. وأني متأكد.. سيقورو.. أن الشركات هادياي تتعامل مع التوراجيستا مية مية .. خاطر كل خنّاب وسرّاق عنده أعوان واصحاب وأحباب .. وربي على ما نقول شهيد:
Oxesan أوكسيزان
Livitic ليفيتك
Howard Rock هاوارد روك
Union Engineering Enterprise يونيوني إنجينيرنغ انتربيزا
Sinclair overseas سيكلير اوفرسيز
Addisa أديزا
Onocou أونوكو
Chemistry & Technology ltd .كيمستري تكنولوجي
Seamen inc . سيمين إنك
Ertos Commodities إيرتوس كوموديتيس

الحاج الطرابلسي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home