Libya: News and Views      LibyaNet.Com      Libyan music      Libya: Our Home

send

الأحد 14 ديسمبر 2008

previous letter                 next letter                 list of all letters

بداية عام جديد وعلى الله يجيك الفرج يا ليبيا

السلام عليكم رحمة الله

أنا شاب ليبي عمري 23 وعايش في أوروبا حبيت نراسلكم و نشارككم فرحة العيد و تشاركوني في بعسض أحزاني .

يا خوتي مانيش عارف نلوم على من على حظي أني مانيش من مواليد الفاتح و الا نلوم على الفاتح اللي ما جاش في الشهر اللي نولدت فيه انا و مرات نقول زعم انلوم على اليوم اللي جابتني فيه أمي وكان ميلادي في ليبيا.

بالله عليكم يا خوتي كيف ندير و الحال هادي ما تسرش حد .

كان هناك حاجة نريد نحمد الله عليها وكل شي من فضله أن ربي ما جعلنيش الساعدي القذافي و الله الحمد لله رب العالمين حتى مع الفقر بس نعيش و نموت راجل .

ياهوووووه نلوم على من .

على كلاب القذافي و ألا المعارضة الليبية و خاصة اللي في الخارج .

ياناس بالله قولوا لي مازال ما تعلمتوش .

ما سدكمش النشاف و العراك و الدسايس و الحفر لبعضكم ياريت نسمع منكم خبر طيب على بعضكم .

يا ناس ساعدوا بعضكم و فكروا في الشعب الليبي اللي يشبح لكم و عابي عليكم .

أنا واحد من الناس اللي حارقني ما صاير فينا من طلم ولد الحرام و اللي قاهرني زيادة .

لما نشوف الناس اللي خرجوا بسبب الظلم و القهر ما همش قادرين يلموا بعضهم على راي ينفعهم و ينفع بلادهم .

أنا كل يوم على الإنترنت ندور في شي يفيد بلادي يا ريت نشوفكم في يوم على راي واحد و تخلوا ليبيا قبل كل شي بينكم انسوا الدوة و النشاف و السب في بعضكم .

ان شاالله تعذروني في الكلام اللي قلته انا عارف اني صغير لكن والله يا خوتي حارقتني بلادي و اللي صاير لاهلي و ناسي و الشباب اللي ضاع هدر و الله يا خوتي و انتم اكبر مني و تعرفوا اكثر مني الشباب اللي زي حالي و قاعدين في البلاد يراجوا في اقرب فرصة بيش يطلعوا ملوا مالحال و قلة المال و الله في رقابنا كلنا اللي صاير في بلادنا و نحن هنا ناكلوا و شباعه و خوتنا قاطعهم الشر و القل و الذل .

اخوكم
محمد رشيد
mo2007uk@yahoo.com


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home