Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

أقلام رصاص

القلم الأول :

للدكتور أبو بكر بعيرة أقول له ياه يا دكتور ذكرتني بالذي مضى ، فالسيناريو الذي حدث معك حدث معي ولكن بأبطال ومخرج آخر وأزيد على قولك "اللي يبدلك بالفول بدله بقشوره" أقول : "الـ..؟ ولا جميل الـ..؟" .

القلم الثاني :

للدكتورة أم العز الفارسي أقول لها يا دكتورة مقالتك في غاية الروعة ، الحمد لله ياربي مازال فيه كتاب منا وعلينا ويحكو في قضايانا كتاب يمشوا عالاسفلت مش امتاعين الطيارات ...؟

القلم الثالث :

للصحفي الصغير المبتديء "BABY JOURNALIST" رضا علي عيسى أقول لك يا حبيبي الكلام التالي : مقالتك يا عزيزي مغالطة لنفسها وقولي كيف ؟ياسيدي انت قلت ان فيه زحمة ودعاك حتى ان الجهاز اللي ثمنه 70 يباع بـ400 وبعدها يا بعد عمري قلت ان الطوابير علامة مسجلة ليبية ، ياعيوني لو كان فيه طوابير راها ما كانش فيه زحمة بل بالعكس يا غالي عليا الطوابير هادي عملية تنظيمية !
ويا بابا انت طلبت بأن الطوابير تكون علامة مسجلة ليبية ونظممموها للموروث .. معليش اسمحلي يا بي "بفتح الباء وسكون الياء" شن فهمك في الموروت ولا هو كلام وتكتب وخلاص..باهي اللي ما سمعك صالح القذافي أمين جمعية ثقافة وفكر الطفل الليبي "اللي داير أغنية جدي ايطبل عالطبيلة" ,, يا بطل عييب مش كل حاجة ايديروا فيها الليبيين معناها تصبح موروث ليبي معناها الهمبورقا والمكياطة وأغاني الميلودي انخششوهن عالموروث حتا هنا ولا لا ؟ (حط النقط على الحوروف).. ثم انك داير حاجة هتيكة في تاريخ اللغة العربية "وينكم يا جماعة الثقافة في ليبيا " انت قلت في أمر لا تتناطح عليه عنزتان ، يا حبيبي انت ناقلها زي ماهيا عنزتان بينما الأصل معزتان "طبعا النت فيه هكي وهكي وانت شوف روحك لما تنقل" وبش تتأكد أن العنز عامية أسأل الدكتورة خديجة فهي تعرف أكثر مني في الأمثال الشعبية ، تقريبا فيه مثل ايقول : بعدما... ؟ العنز.
أوكي يانونو صحفي ، وأنا كتبتلك بنفس الأسلوب اللي كاتب بيه مقالتك التملقية باهدار دم رئيس تحريرك يا أممور .

القلم الرابع :

لكل كاتب ليبي يكتب لأجل الكتابة أقول له أكتب لأجل القضية الانسانية ، لاحقاق الحق ، للشرف ، للكرامة ، وأولا و أخيرا للوطن ...
لا تكتب للأشخاص فكلهم زائلون ....
لا تكتب للكراسي فبعد العزاء يمشن مع الخيمة ....
لا تكتب لأجل المال لأن المال نقمة وليس نعمة .....
وأخيرا نصيحة من أخ عارف ومجرب اذا قابلتك صفقة على حساب ضميرك وفيها مكسب مادي كبير ، الرجاء رجاء خاص :
اقبلها واتفل على وجهي ........

أسامة البرغثي
صحفي حر
ليبيا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home