Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

المتآمرون

من أول يوم تكونت فيه المعارضة وهي تعاني من القذافي المريض ومن فروخ القذافي الامنيين اللي يرسلهم للاغتيال واللي يبعثهم يتسللوا للمعارضة كل مرة بوجه وكل مرة قناع.... ولما نتكلموا على المعارضة نتكلموا أساسا علي الجبهة الوطنية للانقاذ.ليش لأنها تعتبر اول عمل معارض مبني على موقف محدد واضح ما فيشي اغبش من القذافي ونظامه اللي هو عند الجبهة العدو الأول للشعب الليبي ..و أول بيان سمعه القذافي منها ركبه ستين عفريت و نعرفوا ايش دار بعدين في النامي وفي جاب الله مطر وفي عزات المقريف وغيرهم من المناضلين اللي خذاهم القذافي بظلمه وطغيانه .وزي ما هو متوقع من القذافي ما خلى ما دار بيش يصفي الجبهة سياسيا وبشريا رافعا شعار عليا وعلي أعدائي و أقطع الراس ييبسوا العروق..لهذا كانت الجبهة ورجالها هو عدوه الأكبر لا الصهيونية ولا الاستعمار ولا امريكا ولا كرنكاطي ..علي شان الجبهة.فسّد كل علاقاته مع الدول العربية اللي بحذاه واللي موش بحذاه تونس ، مصر، المغرب، الجزائر. وعلاقاته الدولية ، إيطاليا وبريطانيا..اتفكرو الجيش الايرلندي اللي سلحه وبعدين فرمط فيه ،واتذكروا أيام طز في أمريكا وايام السادات وحسني البارك..كل دولة يحط فيها معارض رجله تصبح عدوة القذافي الأوله..وين ما يحصل فرصة يدعس علي المعارضين وخصوصا اللي من الجبهة ويسيّل دمهم في الشوارع والشقق والطيارات اتفكروا طيارة ال"تي يو" الفرانساوية اللي كان يظن ان المقريف مسافر فيها.وبعدين لما طلعت عليه شايدة الارهاب وبدي يخاف من الشغل المفضوح .. شن دار..بدي يخترق في المعارضة وكل مرة يبعث مجموعة تخريبية..تفتن وتخرب وتقض كل مجهود تديره المعارضة للم الشمل...لو كان قلنا ها الكلام زمان وحذرنا المعارضة و خصوصا الجبهة راكم قلتو هذا تشويش ومبالغة.... لكن توا اتذكروا وفكروا زين من هو يوسف شاكير..من هو قدري الخوجة من هو عاشور الشامس وجمعة القماطي وفنوش وزعيط و معيط و غيرهم اللي اكثر من الهم على القلب..هذو جزء من مؤامرات القذافي علي المعارضة وعلي الجبهة بالذات...ومن هاذيك ليام لليوم وآهو عقاب فضلة القذافي اتبرّع بيهم لولده سيف يمشي بيهم حاله لين يكبروا الصغيويرة الجدد اللي تلقاهم مكسدين في مرابيع البالتوك يتدربوا علي كلام المعارضة.... واللي يقلق منه سيف .. يعني انتهت مرحلته يبعثه لموسى كوسه يمسح بيهم كندرته... لكن هل وقفت الحكاية لحد هني ؟ لا لا لا....انتو اقروا كويس شن صار في تاريخ المعارضة...كل ما يلتم شمل المعارضة كل ما يطلع منشق او اكثر وياريت المسألة توقف عند هذا الحد الدخلاء علي الجبهة من داخلها والهجوم عليها من الخارج..وهذا يا جماعة الخير ما جاش بس من القذافي ولكن من العناصر اللي يرتاح معاها القذافي وينبسط ويتفرهد لما يشبح عمايلهم خصك منهم العاجزين اللي ما قدروش يعطو شي غير الدوة والسمسرة بالقضية الليبية.... اما اللي انشقوا فهم موش منشقين علي الجبهة هم انشقوا علي الثوابت الليبيية الوطنية اللي ترفض حكم الديكتاتور الفاسد.. يعني ما عندهمش مصداقية وطنية..ومصير ها المنشقين كان ينتهي تحت اقدام القذافي اللي قال عليهم [ يتساقطون كأوراق الخريف] واما الساقطين الثانيين قال عليهم [ كمشة لوطيين] يعني من قوم لوط والعياذ بالله يعني حتى لحيهم وسبحهم وبرامجهم الاصلاحية ما شفعتش ليهم عنده...يا والله عليك حال..باهي قول اللي انشقوا ومشوا يزحفوا لعند القذافي وخلاهم امكدسين ومكسدين قدام الخيمة يشلفط فيهم الصقع واللي صفاه صفاه واللي عاود حبسه واللي خلاه يهروك خلاه يهروِك..لين مات بالسكتة القلبية وما فرحش بالقريشات اللي قشْوشَه بيهم القذافي...قول هذو عرفنا حكايتهم وانكشفوا وافتكت الجبهة والمعارضة منهم..ودْره.... لكن الجبهة عندها نوعين من المنشقين ... منشقين قدماء/و منشقين جدد.. خلونا نشبحوا شوية من القدم .. / فمن فات أديمو تاه .. علي راي خوتنا المصريين..
المنشقين القدم فيهم اللي كانوا من اللول مدسوسين علي الجبهة ....هوينه سمينا شوية منهم فوق واشبحوا كيف شكلهم توا...منسخطين طلق عليهم القذافي لونه ومضمونه. وفيهم اللي بعد ما طلع من الجبهة وخرب صف المعارضة/دارولهم احزيبات / يعني باللغة المتفصحنة تنظيم حزبي..صْغَيْرون ما ينشبح الا بالمكروسكوب ميش في حجمه بس / توا نتكلموا علي حكاية الحجم والمضمون بعدين /..ويطبعله وريقتين يحسبهم علي الاعلام المعارض.. خوذلك هيْ..والحُزيب هذا ما يتخطاش 3 من الناس.. يعني صبعين والحق الطين..وعلاش نمشوا بعيد ونتعبو في روحنا..خلونا نشبحوا اطْشَيْشِه...يعني اشْويّه..وبالأسماء خلي كل واحد يعرف حجمه ويعرف انه ما خطماش علي الليبيين راهو الليبيين ميش ساهلين .. يا هوه... هذا الحُزيْب يتكون من ثلاثة نصّابين..واحد اصبح من كثرة النضال اللي غط علي قلبه / بعد ما انشق علي الجبهة واستولى علي دخل الاستثمار اللي كانت الجبهة تموّل بيه في روحها وحطه في جيبه وقال يا فكيك..و التم علي جماعة قالو انهم يساريين وهذو حكايتهم حكاية يجي وقتها...وهذو الجطلاويين هم علي الترهوني والمعلِّم متاعه محمد شمام....قول يابابا عمكم بريك اسويسي المنشق حط علي وجه ماسك الايمان والتقوى والنضال / اللي علي بالكم/ حتى لين اتوفق واصبح رئيس هيئة المتابعة بمساعدة الجطلاويين الاصلاحيين... مدد يا سيدي سين مدد... بريك سويسي قايد المؤتمر الوطني عليك عازة.. قايد المؤتمر باسم تنيظيمه الخطير حركة التغيير والاصلاح..ومعاه في ها التنيظيم قائد سلاح الدموع وآمر كتيبة التلتلة والقفاصة والكذب في اذاعة صوت الامل القايد منصف البوري اللي أول ما بدت دارت لقاءات مع فروخ القذافي.. ريتو التكتكة الاعلامية متع سي منصف البوري هذو رموز المجتمع المدني الجماهيري..وكان نسيتو لافندي منصف ما فيش مرة يتكلم فيها الا ويزايد علي الناس بأن اذاعة الجبهة الوطنية اللي كانت تبث من السودان صارت بفضله هو وبفضل جهوده..و في هذي يسمحلنا المثل الليبي اللي قال اتغرب واكذب..نبي نغيره الى انشق واكذب...اما اذاعة صوت الأمل..اللي قالوا ان القذافي منعها وموش قادرين يردوها على موجة التلفزيون وعليا الطلاق ما يسمع فيها واحد في ليبيا..وكله كذب وتلفيق..لكن شن بيقول الواحد مع ها الرهوت...اما العضو الثالث فهو صاحب الاذاعة الخطيرة الحاج صابر اللي ما يعرف كوعه من بوعه لا وطن لا كرنكاطي ما يعرف الا الفلوس ..الفلوس الفلوس/بعدين عندي ما نقول علي حكاية الاذاعة هذي وعمكم صابر مجيد/... وهذا الحزيب الثلاثي هو اللي قاد الانشقاق على الجبهة.. واليوم يقود فيه علي المؤتمر الوطني وعلى ثوابته الوطنية.
أما المنشقين الطازه علي الجبهة...فكل الناس عارفين بالواحد من افومهم هما موش من حد ثاني مازال غير البيان والغريب انهم يملكون الوقاحة اللي اتخليهم يشتموا تنظيمهم علي عينك يا تاجر وما عندهمش الشجاعة اللي اتخليهم يكتبو بيان يعلنو فيه علي انشقاقهم...ويخلصو الجبهة من وجوههم ..لكن مفتاح الطيار وابراهيم قدورة وابراهيم جبريل وزهير الشريف وفايرز جبريل وتوفيق منينة.. عندهم الوقاحة وما عندهمش الرجلة اللي تخليهم يكشفوا علي وجههم الحقاني...وهما قاعدين يمرمطو في اسم الجبهة لين يتمو حاجتهم منه .....هذو هم اللي يحمو في بريك وفي جماعته.... وهذو هما اللي خشوا وطلعو في المؤتمر الوطني مع شوية يدعو انهم مستقلين علي راسهم الترهوني ورشيد ابسيكري وهما اللي يبو يركبوه مطية يمشو بيه لقايد الاصلاح ..وهما يتصورو ان عندهم جمهور كبير ..../ جمهور البالتوك.. والله حرام فيهم اسم جمهور هذو اسمهم اتفش البالتوك وكناسته امثال الزعيم اللي ما صارش بكل..المفك..كاتشافيتا...اللي فرحان بدوره الواطي اللي يلعب فيه...و د سبتموس الغبي...ورشيد الكيخيا السخيف متاع قول يالطيف.. ما اثقل دمه.وفيلسوف البالتوك الانتهازي اللصقة الخرياط شعبان معيو.. والمخبر المعفن القبايلي.وعقاب الشلة المعروفة بالشلوشة والجهل واللي ما فيهم الا الدردا وام حنك....الحق الحق هذا جمهور ممتاز يليق بابراهيم قدورة والطيار وجبريل وبريك سويسي..وهم أحسن جمهور للمنشقين الجدد والقدم.

العارف


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home