Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

غـير خيرهـن لايام

غير خيرهن لايام شاطن فينا
مستعجلات لواه يجرن بينا

الوقت تغيّر
والعمر ناقص عمر..صار قصيّر
اتجي تحسبه تلقاه فيك ايحيّر
ويقولك " مشغول"..لا ما تجينا
غير خيرهن لايام..

زمن عجايب
ايبات فيه الشاب يصبح شايب
بعكاز في ايده ودمعته عالغايب
يعتب على لايام...ويبكّينا
غير خيرهن لايام..

ماهو فاضي
هالوقت بينا صار شيخ وقاضي
رخانا في طريق الياس زي في الماضي
بيبيعنا بسنين من يشرينا
غير خيرهن لايام..

"هي هكي"
الدنيا مع الواقف علي المتكّي
ووين تنشده المظلوم يبدا يبكي
وتغصره عبرة زها ماضينا
غير خيرهن لايام..

غير خيرهن لاوقات
تشكيلهن ياصاحبي..ما يسمعن شكوات
ما يشبعن..ما يهفتن..مالن علينا وثقلهن آهات
يجازي الله زمان ماهو لينا

غير خيرهن لايام شاطن فينا
مستعجلات لواه يجرن بينا

حسين رحومة التربي
هلسنكي ـ 18 يناير 2008
huseinturbi@libdacafe.com


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home