Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

قالوا القايد زعـلان وزامق قلنا خير دعـوته؟

قالوا أن مندوب القايد في مجلس الأمن مسترجل هالأيام ! وبلكي لأنه يرأس المجلس نيابة عن إفريقيا كيف ما تعرفوا قيسه كبرت الحكاية في راسه ويحسابه هي الدوه وفرح بكرسي الرئيس – وهو كرسي مغير منظر وخلاص لا يحك لا يصك - وقعد وعلى طريقة القايد يتفلسف ويحلل ويركب في الكلام ويبقبق ومداير روحه يدافع ع الفلسطينيين نيين وصل في اللحم الحي بعدها نطوله مندوبين فرنسا وبريطانيا وبلجيكا وإمريكا وطلعوا بره القاعه وسيبوه يهدرز بروحه ! ,,,, وعاد ياسيدي بن سيد قالوا القايد زعل واجد من هالموقف وأمر بوشلاقم يستدعي سفراء هالدول في الجماهيرية الخاربه ويبلغهم إحتجاج وزعل القايد من هاالعمله وهالرخية والسلحة الشينه ! ,,,,, وعلشان تكبير الشورخ حاول النظام عن طريق بعض علاقاته مع بعض وسائل الاعلام يبين أن النظام قام بتوبيخ الدول التي إنسحبت ! ,,,, وأنا بدوري نقلت الكلام لعمتكم الحاجه قصدي العويله وبعد وصلت في الخبر اللي يقول أن بوشلاقم هزب ووبخ سفراء الدول الغربية قالت وهي تضحك وبعد شهقة شهقتها المعروفه : ياك إلا يهزبهم وإلا يبوخهم ! ,,,, مازلت الا هذا ؟ عطني كان دعوه ! ,,,,,, وواصلت عمتكم الحاجه الكلام وقالت : يا حويج أول مره تمر عليك الحكاية ؟؟؟؟ وأنا عهدي بيك أنك مش غشيم ! ,,, تراهو هذا مجرد عتاب حبايب مش اكثر ولا أقل وبعدين أنت مش عارف أيش القصة وليش كل هالتكبير الشورخ هذا ياودي؟؟؟؟ لاهي قصة رجله ولا فلسطين ولا اسراطين ولا صمود وتصدي ولا نم !
الحكاية وما فيها أن المنجوه المحروم زعلان واجد يا كبادي أوواخد على خاطره من الدول الغربية وخصوصا من حبيبة القلب (ليزا) وسبب الزعل يا حويج - وربنا ما يجعل زعل بين الحبايب - هو الهدية ! ,,, تذكر الهدية والا لا ياحويج ؟؟ تي الهدية إللي قاعد هالمحروم كل شوي يعيط عليها كيف ما يعيط العيل على لعبه يبيها ! ,,, تذكر أنه قعد يعيط ويقول لأمريكا (تي وين الهدية يا امريكا ؟ وين الهدية اللي وعدوني بيها يا عالم؟) ,,,, الهدية مقابل ماعطا المركان من تنازلات وتعويضات وخدمات وانبطاحات .... يعني توه معقوله يا حاج بعد كل هالخدمات والتعويضات وال وال وال ..... إلخ ما ياخذوش على خاطره ويبعثوله في أسرع وقت حبيبة القلب (ليزا)؟؟؟؟؟ والله حرام عليهم الراجل مشتاق وقريب يموت من الفرقه ,,,, وهي عاد - الله لا يسامحها – قاعده تدلع عليه وخاطه عليه وقاعده تفط وإتطير من مكان من مكان الا لخيمة القائد ! , والله هذي حاله إتزعل وتقهر بالصح وتفلق القلب وتشق الكبد ! , خصوصا كبد الغاوي الملهوف ! , ووالله إن كان تشوف حاله ياحووووووووويج وكيف يطلع هالمحروم في الليل من الخيمه كل ما يسمع صوت طيارة مخطمه على سماء ليبيا ويقعد - ياناري ويانويييييييييرتي - يشبحلها ويبحت فيها بعيون رقراقه وكبيده مشتاقه وقليبه يرعش ويقول في عقله وهو خانقته العبره :
( زعم فيك الغالي يا طير ** أيش ندير ** رقد بختي مدفون في بير )!؟
هذا كلام الحويجه أم حمد وبصراحه هالمره غلبتني في التحليل والزقاطه وعاد الموضوع فيه غيات وفيه صبايا ونساوين و(ليزا وما ليزا) أكيد عاد الحنينات يفهمنه ع الطاير أكثر من نحن الرجاجيل ! ,,,, وهيا تمسوا على خير !

الحاج حمد


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home