Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

جانا عـيد.. عـدّى عـيد

شن صار في الدنيا
ليش اقسينا؟
ليش العمر يجري؟
ورحلنا قبل ليام ما تزهينا

تباعد هلبه
مشوار هالغربه
احتار الدليل معاه ضيع دربه
والعمر يا صاحبي اتقل سنينه
شن صار في الدنيا؟ ليش اقسينا؟
ليش العمر يجري؟ ورحلنا قبل ليّام ما اتزهينا

عدّى عيد..جانا عيد
وغربتنا ما زال اتزيد
مبروك عيدك يا وطن يا غالي
زايد حنيني ليك شاغل بالي
عدّى عيد..جانا عيد
غربتنا مازال اتزيد

سألنا ليش الغربة طالت
نشدنا ليش حظوظنا مالت
قالوا: الصبر..دموعنا سالت
نصيب وقسم..قصيرة ليد
عدّى عيد..جانا عيد
غربتنا مازال اتزيد

عدّى عيد..جانا عيد
شعلنا شمعة..رشّينا العطر وراجينا
ذرفنا دمعة..نحسابو الدنيا تراضينا
رمانا الحزن لموج بحوره..تارينا للياس عبيد
عدّى عيد..جانا عيد..

بعدنا عنهن
حومات..حارات الوفا ساكنهن
مش بيدنا ولا بيدهم..مكتوب باعد بينا وما بينهن
ويا خياط اثواب العيد
على رحمة والديك وناسك..ترا فصللي عمر جديد

عدّى عيد..وجانا عيد
شعلنا شمعة
ذرفنا دمعة
في غربة مازال اتزيد .

حسين رحومة التربي
هلسنكي - ديسمبر2007


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home