Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

خشوا عـالنار او قالوها... نبوها فعـلا حريه!

انكان الجهمي مجنون ... كل الشعب الليبي كيفه... صدقني ميه فالميه
وانكان الدكتور مريض ... كل الشعب الليبي مرضي... تشغل... حالتم نفسيه

منهو اللي ما هو متكدر؟ ... لاعدل او لا قانونيه
مالتسعه او ستين امصيبه ... لا دستور و لا شرعيه
اللقاقه زاطو فيها ... لا هم حس او لا بيتيه

كمن تاجر كان امبحبح ... داروا دكانه جمعيه
تما عند الباب مدنقر ... يخدم فيها باليوميه
زاد الضغط او جاه السكر ... ومعاهن سكته قلبيه

لستاذ اللي كان امبجل ... شالوه او قالوا حزبيه
مالسبعين خذوه تواري ... خش السجن اغبي طاريه
في "قاريونس" ريت اوجوه ... منحوسه غبره شريه
ماني عارف وين لقوهم ... قالوا لجان او ثوريه
والكليه تمت فوضي ... تلبيز اداره ذاتيه
7 ابريل عليهم يشهد ... شنق او تعذيب او فاشيه
"الفاتح" ياما داروا فيها ... كمن طالب راح ضحيه
والشيخ اللي باهي صيته ... كروه او مو داير سيه

حتي الكوره خشوا فيها ... خلوها لعب هلاليه
كم لاعيب قديم امقطر ... زروه او خش الجنديه
والجيش اللي كان منظم ... تما للعفنين مطيه
والرتبه ماعادت تسوا ... عطيت بالتلفيق عطيه
واللي متذمر ما طول ... راح بسبله شيطانيه
والباقي جوا دكوهم ... لا قانون او لا انسانيه

ريت بعيني شايب يدمع ... يرجي في ولدا بالجيه
عيل موش كبير صغير ... من طلاب الثانويه
كذابين خذوهم قالوا ... ماشيين لطبرق دوريه
فالنار الحمرا حطوهم ... لا استعداد او لا امداديه
في غفله ما معاهم والي ... جتم قوات تشاديه
لاصقر او لا ثاير يفزع ... وين القوات الجويه؟
الاف اللي راحو فيها ... وين انحط المسؤليه؟

و اللي برا ما خلوهم ... تتبيع او قتل بوحشيه
في "بوسليم" مجازر صارن ... عدوا فيها الف او ميه
في فبراير في بنغازي ... شبان رموهم جمليه
والحاصل ما خلو والي ... في درنه حرب اباديه
واموال الشعب اللي راحت ... مليارات اتقول شويه

منهو اللي ما هو متنكد ... يلعن فالسلطه الشعبيه؟
ساكت كنه يوم تكلم ... جاته لجان ارهابيه
حتي ولديه ايبهدلهم ... كان جابوه اخباث النيه
لكن واجدين اللي صبو ... مابو يرضو بالدونيه

الجهمي و الدكتور رجال ... ليبيين ضنا ليبيه
خشوا عالنار او قالوها ... نبوها فعلا حريه .

ابن القاسم
________________________________________________

ـ حقوق النشر والالقاء للجميع .


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home