Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

يا سيادة العقيد "العبقري"

يا سيادة العقيد و الزعيم و البطل و الفاتح و المغيث والمفكر الكبير و الأنيق والعبقري"بلا منافس من بعيد أو قريب"...

أنا ريكو, الشاب الليبي الذي اثار اعجابه بأناقتك سابقا...أود ان اخلع لباس الموضة بضع دقائق قليلة لاثير و بصوت صاخب اعجابي بفهمك و فكرك العميق جدا الذي أثرته في القمامة العربية, اسف, أقصد القمة العربية لدرجة شعوري بالغرق و الدوخة من أول جملة قلتها. فأنت كلامك يريد مفسرون عالميون متخصصون في الأفكار العقيمة, أقصد العميقة التي لا يفهمها المواطنين الاغبياء(امثالنا) مقارنة بدوامة ذكاءك و عقلك.
بس والنبي يا قائد عندي لك كم سؤال:

• قلت ان المستقبل العربي ضائع و سنتحول الى محميات...الا تشعر بان ليبيا هي أول محمية من هذا النوع؟ معاش عرفنا روحنا ليبين ولا من قبائل "البولوبولو" الافريقية و لا ليبيا هي ليبيا ولا جماهرية عظمى ولا انت قائد ولا رئيس ولا شني بالضبط؟؟؟بصراحة انا مرة نلبس ليبي و مرة نلبس افريقي و معش عرفت روحي انا من ولا ايش؟
• قلت ان اسراطين هي الحل و قلت انها تكون دولة ديموكراسية تضم الاسرائيلين والفلسطنيين معا...والنبي يا حاج الاخ القائد, ليش منجربوش الديموكراسية هادي في ليبيا الأول قبل اسراطين بدل الغمة اللي ميدرهالنا؟ ولا احنا مكتوب الشقا والهم للأبد؟معلش متزعلش مني ..انا مبسوط من الكتاب الاخضرجدا و افكاره بس نحبو نجربوا انواع اخرى...انت طموح و تحب التغيير( هادا عرفته من حبك في تغيير الالوان و قصات الشعرو الاظافر المستمرة)
• أما في موضوع صدام, تساءلت ليش ميعملوش تحقيق في شنقة...ايش رايك نبدو بيليبا و نديرو تحقيق في قدلة بودبوب و غيرهم؟ صدام ديكتاتور ميستحقش منا أي عطف...هادا بصراحة مصير أي دكتاتور يحساب روحه قعد ربي..يجي اللي اقوى منه و يشيله زي الدجاجة...صح ولا لا؟
• قلت لازم نعملو برنامج عربي نووي؟ تي وين, مش انت تبرعت بمشروع البمب النووي(كبمب العيد) الليبي الى امريكا ؟؟ ولا شني صار؟

معلش, تحمل غبائي....بس والله بانك اكثر الحكام "مخلصين" للمواطن,هادا علاش نسأل فيك...فالمواطن الليبي وصل اللى القمة بقضلك انت وحدك...انظر الى شوارعنا و بيوتنا و اقتصادنا....الليبي يعيش في العصر الذهبي و ياريتك يا قائد خديت معاك صور للمواطنين الليبين و حالتهم الممتازة و الابتسامة الخضراء التي لا تفارق شفاهم من ازدهار حالتهم توريها للحكام اللي مبهدلين شعوبهم و قاهرينهم و مشحتينهم ...و ادعوك و بكل جرأة انت تغير تاريخ ليبيا وتجعله يبدأ من 1 سبتمبر 69...

ريكو بيكو
ليبي محب للموضة\معجب بعبقرية العقيد
-الثلاثاء-عام 39 فاتحويا


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home