Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

شنْ معـناها تأسيس حزب ليبيا؟
حزب إللي يحبّوا ليبيا؟

· ولاء الحزب لليبيا خصّ قصّ، لا أرابو لا أفريكانو لا وزّة مريّشة!
· الشفافية والانتخابات الحرة وحرية الرأي وحريةالتعبير شروط أساسية!
· الحزب باش إيصير منه سيدي الإصلاح هاداي! ويسهّل ميلاده!
· أسباب تشكيل الحزب باش لبلاد ما تمشيش في طرشة أشنيّف!
· مستعدين نسامح الخنّابة والقتّالة بشرط يعترفوا ويطلبوا السماح ويردّوا الفلوس!
· لازم نعملوا كشوف قاعدة بيانات بكل واحد خشّ لحبوس في الــ 38 عام ! ولازم يتعوضوا مع عائلاتهم بما يرضيهم!

هادا رايي أني بس!
شكل الحزب؟
أول شي الحزب هاداي حزب افتراضي فيرتيوالي .. غير موجود! مفيش لجنة مركزية .. مفيش مقر ... مفيش منشورات .. مفيش رئيس ... مفيش لجنة إدارة .. مفيش ناطق رسمي .. مفيش بيانات ... مفيش مانيفستو برنامج سياسي .. مفيش رئيس .. مفيش سكرتير مفيش سكرتيرات.. مفيش شي بكّل ... .... كل ما فيه:
شروط الانضمام
الواحد اللي ينطبقن عليه الشروط يحقله يخش الحزب بروحه ... يسكر علي روحه الدار ويوقف قدام المراية وإيقول: أني نحب بلادي ليبيا ونحب الليبين اكّل بكّل بخيرهم وبشرهم ... وأني بنخش بروحي في حزب ليبيا ونعمل كل الخير اللي نقدر عليه باش نساعد خوتي لمواطنين ... ما نسرقش .. ما نكدبش .. ما نغشش .. ما نطبلش .. ما نزمرش وإذا كان ف الأول عملت حاجة من هادولا ... أني باش نتوب ونعترف بذنوبي في الوقت المناسب .. وباش نعوض خوتي على كل حاجة ماسخة عملتها لما نعمل كل الخير اللي نقدر عليه ... وإذا عملت حاجة بطالة ماسخة نعتبر نفسي مرفود أوتوماتيكو.... وعلاش سيدي الحزب هاداي؟
أيوه باش أنقوللكم ... إحنى صارلنا زمان نحطوا في اللوم على الكوفيرنو لحكومة وتريسها، وما نشبحوش في عوج رقابينا ... كلنا خطايين ... الموظف حتى لو كان نظيف لما يعطل ف مصالح الناس ويتمحقن عليهم ويكشخ في وجوهم باش يفش غله فيهم وينتقم من الكومبليسو مجموعة العقد امتاعينه ... ايطبص إيضايق في حوال العباد ... في معظم الحالات ... ومرات إيطبص يخنب بعض الحاجة وإيقول "خيرني أني بس .. لحكومة كلها تخنب وتضرب وتحبس وتضايق ف العباد!" ... وإلا إيقول " خدوا مني رزيقتي وأملاكي ... لما ناخد حاجة أنكون خلصت في بعض الحاجة ...
هادا كلام فاسد ووصّلنا للفساد والخراب اللي قاعدين فيه .... المطلوب من كل واحد منا يعمل حاجة في صالح خوته إللي ما سقموش ... خوته الجواعا .. العريانيين الزريانين .... لحكومة كيفها كيف كل حكومات العالم تحب الأمور تمشي أبوستو عال العال .. لما تكون عابية عليك يا سيدي المدير وإلا الموظف الصغير ..... وإنت ما تعملش في الواجب خاطر تحساب روحك تتسبب في السفورتونا ليها يعني تعاكسها وتخلي حالها ملقلق أنت في الحالة هادي اتسببت في مصايب لخوتك الليبيين ...
لحكومة فاسدة ما قلناش حاجة تريسها فسّاد معلوم ومعروف.. العالم كله عارف .. الجوّاني والبرّاني ... لكن لوا يا سيدي لفندي تفسد في روحك وتفسد في حال العباد ... ؟
لحكومة بسلامتها ماكنة ومربّطة حبالها مليح وعندما المرتزقة والسلاح والشندي من غير عداد.. .. يعني معناها أحني نقمعزوا ونقطعوا حبل المودة والرحمة؟ .... .. كلام فارغ ...!
كل واحد منا يقدر يعمل حاجة تفيد البلاد والعباد من غير لحكومة وانباشها ... وإذا كل واحد يحب ليبيا ويحب الليبيين .. الأمور تتغير غصبا عنها ... لكن الخنوع والنخّ .. والتساهل في المال العام واللعب بمصالح الناس .. هاداي ما هوش شغل حكومة هادا مننا إحني ...!
الأحزاب ممنوعة؟ ووك علينا!
باهي ممكن تقولوا تكوين الأحزاب ممنوع وأشكون اتحزب خان لأخر الموزيكا امتاع كشمة التوّار اللي ما توّروا غير الغبرة ..... أهو باش نرد عليكم:
أولا كابّونا لكبير (ربي يطول عميره) زمان وجه دعوة بتشكيل حزب .. وآهو ولده ما شاء الله عليه السبادا امتاع لسلام باش يعمل حزب الإصلاح .. .. لوا ما نساعدوش البابا ووليده؟ ... ما يكونش خير زعمه؟
حزب سرّي لا مكان له (انتروفابيلي)
وبعدين هوا وين سيدي حزب ليبيا هاداي؟ ... ما هناش .. هوا موجود باس في القلوب .. حب الوطن والمواطنين مكانه لقليب ويخرج لي برّه بعمل الخير ... موش بضرب الدنفقي ودق الحنك ... يعني يفتشوا عليه ما يلاقوش ... (خلّيها تاكلكم يا زقروللوات!!)
يا جماعة الفيتا لحياة موش كلها وكال وشرب وزياط ... لازم إيكون عندنا هدف... هدف ناس بوجوهها .. هدف نبنوا دولة امسقمة ... أهو لينا أكثر من خمسين عام مستقلين .. . ما عرفناش نعمل دولة وحكومة زي الناس ... شن ناقصنا؟ .. زعمه الفياكّا والتنبلة ونظرية أخطى راسي وقص؟ وإلا طبص تخطاك؟ ...
يا جماعة عيب عليكم حتى نجع الشيخ شخبوط اللي في أبو ظبي صار مننه وابقي دولة تضرب تعور .. خيرنا إحني؟ مازلنا غاطسين في الميزيريا والتخلف والبصاصة!؟
لازم إيكون عندنا حب للوطن اللي ماتوا في سبّاه أبهاتنا لوّلين .. أهو توّا الوطن صار دكاكين بورديللو امتاع كمشة خنّابة زمزاكة ما عندهمش لا دين لا ملّة!
باهي شن الاتجاهات المطلوبة في حزب ليبيا؟
أنى نقول الحزب لازم يكون مفتوح لجميع الآراء والاتجاهات من الإسلاميين لجماعة - قارله مرقص - (يعني كارل ماركس) لليبيراليين للقوميين لدراويش سيدي بن لادن ومعاه سيدي الشيخ محمد عبد الوهاب أو حتى سيدي بن تيمية ... لجماعة الإخوان من صنف القرضاوي لغاية صنف سيد قطب للمحافظين للاشتراكيين لليمينيين لليساريين مفيش مانع حتى جماعة لكتاب لخضر وكشمة فروايخ التورة ...! إحنى أحسن منهم .. ما نقصوش لسان حد وما نقطعوش صوابع حد ....
لازم قلوبنا تكون مفتوحة لكل الناس ... ما فيناش حد كامل ... ما فيش اتجاه أو رأي أو فكر كامل مية مية .. لازم نتعلم من بعضنا لازم .. البونادم أصله ناقص ... اللي إيقول أنا بس عندي الحق .. معناها ما عنده غير الباطل ... الوطن لينا كلنا مش لبارتيتا وحدة أو زوز ... إللى إيقول عنده الحقيقة كاملة والحل النهائي لمشاكل البشرية .. صدقوني هادا ما عنده غير حب التسلط ومعاها دمنقل فوتو فارغ .... ووزياط واحد ضاربه دشيشة بالفول!
المهم الحزب يشجع الناس ويورّي لحكومة أنه ما زال فيه شعب يحب وطنه ... غصبا عنها!
فيه هلبة خيّاب عندنا صحيح ... لكن يا جماعة صيّور الخير يطرد الشر ...
قرار لحكومة اللي فيه خير علينا جميع نقدموه لقدام .... لكن قرارات الحكومة الفاشكو أهو أنتو عاد تعرفوا كيف تفرشكوها ... الخراب ساهل يا أكبادي ... قرارات فرض ضرائب الاستهلاك لازم نحاربوها .. لازم نحاولوا نتهربوا من الضرائب خاطر حرام تدفعوا فلاويس و ما نعرفش وين تمشي ... الضرائب في بلاد الديموقراطية معناها نواب البرلمان هم اللي يصرفوها ويحاسبوا عليها .. مش كل من جي هب ودب يغرف من تاليه ..
الراجل البطال لازم نتكلموا عليه وننشروا أخباره بجميع الوسائل .. لازم نعزلوه اجتماعيا ...
الراجل الباهي لازم نتكلموا عليه بالطيب ونذكروه بالخير ...
المواطن لما يدخل في مصلحة لازم أنوروه سنيناتنا .. يعني نتبسموا في وجوه الناس .. مش نقابلوه بتكشيخه تهبط القلب ... وكلامي هدا خصوصا للدكاترة الليبيين اللي اتعلموا كل حاجة في الطب ونسيوا يتعلموا كيف يقابلوا الناس ويعاملوهم ب بتواضع وإحسان كيف دكاترة أوروبا وتونس والأردن ....
باهي شن موقفنا وطلباتنا؟
أول لازم نظام حكمنا يكون ديموقراطية حرة بالانتخابات وفصل السلطات بالكامل (تشريعية وتنفيذية وقضائية) ... وحرية رأي وحرية تعبير بالكامل ومسائلة إجبارية وشفافية ومحاسبة وتكافؤ الفرص ... طبعا إحنى عارفين أن الديموقراطية الغربية عندها مشاكلها وفيه ناس يقولوا أن الليبيين ما زالوا مش جاهزين ليها .... هدا كلام فاضي ... الديموقراطية حتى ولو كان فيها أخطاء وتسمح بتجاوزات لكن فيها ميكانيزمو .. آليات إصلاح ذاتية ... تصلح روحها بروحها!
طبعا الكلام هادا ما زال بدري عليه ... لكن مش مستحيل ... لازم نحطّوه قدام عيوننا وما فيش باس نتعاونوا مع سيدي سيف الإسلام حتى نشوفوا لوين تمشي حكاية الإصلاح امتاعه أو في أما مكان يرسّي زنطرونه ؟ ..
طبعا إحنى عارفين ... الجوفانوتتو الشبّوب يحب يكون مكان بوه (بعد عمر طويل انشا الله) ما فيش باس هذا شي طبيعي ... تتأجل حكاية الديموقراطية شوية؟ ... لا يمكن أبدا! ... لا ما نسكتش على المطالبة بيها أحني إيسدّنا من الخطوط الحمر والخضر والزرق ... لكن غاية حزب ليبيا أن الحكم لازم يكون عادل وشفاف وفيه مسائلة ... موافق يا سيدي سيف؟ تورّينا منين تجيب الفلوس؟ تورّينا كام واحد دخلوا الحبوس في 38 عام بالظلم والدسائس؟ تورّينا كام واحد مات في الفاضي؟ في التشاد وأوغندا وأوروبا؟ تورينا كم واحد ... إحنى وراك ....
لكن يا سيدي سيف لازم تتواضع شوية لما تحب تتكلم مع الناس باش ينتخبوك في أول تصويت على الرئاسة .... بلاش منها بوزات العسكر ورومي وإلا نكسر قرنك ... هادولا حاجاتك عمرهن ما خدمن وطن ... وما تفرحش هلبة بالسلطة والمال والسلاح .... ليبيا والعالم يا ما شاف..... من غراتسياني لموسيليني لرومل لبارباروسا لقراقوش ليوسف باشا القرمللي للفاطيمستا للرقريق للرومان .. وين صاروا هادولا كلهم يا سيف؟ وين راحن فلاويسهم؟ وين راح عزّهم وزياطهم ؟ يا وليدي سيف ما يفضل فيها غير وجه ربك والصيت الطيب .. اتحب تخش التاريخ ... خلي سيرة عامرة وراك واخدم عليها من توا ... وخلّي صيتك طيب من عامص!
طبعا أنتو عارفين شن قال سيدي بن تيمية زمان .. قال حاكم كافر عادل خير من حاكم مسلم ظالم؟ الله يرحمك يا سيدي بن تيمية .. الجماعة فاهمينك غلط .... واخدين غير قشورك!
نصفية الحسابات مع التوار القتالة والخنابة!؟
باهي مرة تانية .. .عندنا مشكلة الخنّابة والزقرللوا كيف نعاملوهم؟
أول شيء ... قبل الفلوس.... .. يطالب حزب ليبيا بما يلي :
تقديم كشف حساب بكل من دخل الحبوس حتى ولو يوم واحد ... كل واحد دخل الحبس بتهمة سياسية في التمانية وتلاتين عام اللي فاتوا يعلن رسميا مظلوم وبريء ... لازم ينعملوا كشوفات كاملة بالحي والميت ... المواطنين أعضاء الحزب لازم يجهزوا كشوفات باش نتحاسبوا عليها .. ولازم ياخدوا تعويض عن كل ساعة قعدوها في جخاريب لحكومة ... لازم يكون تعويض يرضيهم .... ويجبر بخاطرهم... ولازم أسماء السجناء اللي كلهم مظاليم ينشتروا على الانتيرنيت وينطبعوا ويتوزعوا على الناس .... باش الناس تعرف حجم الجريمة ...
أما تاني حاجة لازمة .... نبوا نسمعوا اعتراف وطلب سماح وتقديم اعتذار رسمي، من كل واحد مدّ إيده على مواطن بالضرب والفلقة والكورّينتو وحبل المشنقة أو يكون خدا رزقه وزوّر عليه تهم وشارك في تعذيبه ...
أحني الناس الضحايا الليبين ما فيناش حد يحب يقتل ويعذب ... لو عملنا مثلهم انكونوا كيفهم سوا سوا ... إحنى ناس متحضرين ما ناش لجان تورية مهابيل ...
المسؤولين عن التعذيب وحبس الناس وقتل الناس لازم يطلعوا قدام الناس ويتكلموا بكل صراحة ويحكوا شن داروا ... ويطلبوا السماح ... ويقدموا طلب العفو ويعتذورا ويتأسفوا علني على التلفزيوين والإذاعة ... وكل هذا ينكتب في الجرايد وينطبعن بيه كتابات مع الوثائق والصور .. إحني مستعدين نسامح ونقبل الاعتذار ... لكن لازم اعتراف بارتكاب الظلم علني .....
من أما راتزا ... توريين فشّاكة .. زقرللوات ضباط جيش ضباط بوليس .. كابوات بصاصة مواطين غير صالحين قضاة وكلاء نيابة محامي شياطين ... الخ.
اللي خنبوا فلوس ... يتقدموا همّا لخرين ... قدام الناس ويقولوا خنبنا ونصبنا وسرقنا وخدينا رشاوي وعطينا رشاوي ولازم يسموا كافة الأسماء اللي شاركتهم في خنبة الشعب ...
بعدين يرجعوها وإحنى مستعدين نسامحوا .. نعتبروهم خدوا قرض وخدموا .. وأهم باش يرجعوه مع بعض الفوائد ..
القصد من المسامحة حتى ما يكونش فيه حزازات .. بكرة بعد بكرة تتغير القوفيرنو وإيجوا ناس تانية ... شن تبونا نعملوا في بعض ... نطبصوا قتال ف بعضنا كيف العراقيين لما طار القديس صدام من فوق العرش امتاعه؟ .. لا يا سويدي ... إحنى مستعدين نتازلوا عن الخصومات .. تعترفوا بالجرائم وتطلبوا السماح ... وانقولوكم اذهبوا أنتم الطلقاء ... .. لكن ترجيع الفلوس لازم منه ... (ممكن نخلولكم بعض الحاجة لمصروفكم .. خاطر أحنى ماناش مصاصين دم)...
هادي شوية أفكار حرة ... كل عضو في الحزب ليه الحق يفكر ويعبت لينا أفكاره واللي تشوفوه باهي تعملوا بيه ... ما فيش حد يمل عليكم .. والسلام ختام ...

بقلم: الحاج الطرابلسي
24 سبتمبر 2007


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home